Pra «Junimiłk» i «hod pradprymalnaści»

Toje, što hetyja dźvie naviny prahučali amal adnačasova, padałosia durnym žartam: adnoj rukoj biełaruskija ŭłady abvieścili 2011 hod «Hodam pradprymalnaści», a druhoj Alaksandr Łukašenka pahražaje vyhnańniem ź Biełarusi «Danone-Junimiłk».

Voś takaja «pradprymalnaść»

Biełaruskija ŭłady apošnija paru hadoŭ tolki i zajmalisia tym, što sprabavali stvaryć pryciahalny imidž krainy ŭ vačach inviestara. Biełaruskija pradstaŭniki kalasili pa mižnarodnych ekanamičnych kanfierencyjach, inviestycyjnyja forumy ładzilisia i samoj Biełaruśsiu ŭ Miensku, Łondanie i Frankfurcie-na-Majnie.

Byvała navat tak, što vysiłki pa stvareńniu imidžu nabyvali i zakanatvorčuju formu dziela pavyšeńnia miesca Biełarusi ŭ mižnarodnych rejtynhach.

I treba ž było ŭ taki krytyčny čas uziać i prahučać navinam, jakija ŭ stanie pierakreślić hetuju karpatlivuju pracu, vykinuć na śmietnik plon daŭhich starańniaŭ.

Biełaruskaja ŭłada ŭ samy niazručny momant pa-chamsku pahražaje zamiežnamu inviestaru, a pierad tym napałochała infarmacyjnuju prastoru ŭviadzieńniem dziaržaŭnaha kiravańnia na pryvatnym «Pinskdrevie».

Pra pierabirańnie bulby

Chtoś zapiarečyć: pradprymalnaść pradprymalnaściu (tym bolej, hod ža pradprymalnaści, a nie pradprymalnictva), a pravy pryvatnaha inviestara (pahatoŭ bahataha zamorskaha buržuja) palahajuć u tym, kab addavać svaje hrošy i «vykonvać» chamavatyja «daručeńni» prezidenta Łukašenki.

Ale pryvatny biźnies byvaje nie tolki drobny, ale i vialiki, i zamiežny taksama. I kab ułasnaje drobnaje biełaruskaje pradprymalnictva niekali vyrasła da siaredniaha i bujnoha, treba z pavahaj stavicca da luboha pryvatnaha pradprymalnictva.

Dziaržava nie musić umiešvacca ŭ spravy pryvatnaje kampanii dy nie pavinna kamandavać, što joj rabić z tym niaščasnym małakom, kudy i kolki jaho pradavać i nakolki hłyboka jaho pierapracoŭvać (zabaŭna, jak u dačynieńni da małaka z vusatych vusnaŭ biełaruskaj dziaržavy hučyć zvykłaja naftavaja terminałohija).

Dziaržava ŭvohule nie musić udavacca ŭ takija detali ekanomiki, jak vytvorčaść małaka, vyrab zedlikaŭ ci tam pierabirańnie bulby, jak u tym viadomym pra jaje, dziaržavu, aniekdocie. Stvarycie ludziam spryjalnyja ŭmovy dla pracy na biełaruskim rynku i stvareńnia rabočych miescaŭ vašym ludziam, sačycie, kab jany naroŭni z usimi vykonvali zakony — i ŭsio.

Raz małako niedastatkova hłyboka pierapracoŭvajecca, značyć heta niavyhadna rabić. Raz heta niavyhadna rabić, značyć prymušać da hetaha pradprymalnika — usio roŭna što vypichvać jaho ŭ susiedniuju krainu, dzie jon budzie pracavać tak, jak jamu metazhodna. Chaj navat i daŭšy chabar.

Kali vy, navat budučy prezidentam jeŭrapiejskaj krainy siaredniaha pamieru, chočacie padparadkavać sabie zakony rynku ci zakony pryrody — rychtujciesia da rasčaravańnia.

Što heta było?

Viadoma, na fonie reabilitacyi zvykłaha vobrazu łukašenkaŭskaj Biełarusi jak dziaržavy, dziakujučy jakoj i demakratyčnaja jeŭrapiejskaja siamja nie zastajecca biez prykrych vyklučeńniaŭ, a pahatoŭ paśla źjaŭleńnia realnaj pierśpiektyvy ekanamičnych sankcyjaŭ, narakać na ckavańnie pryvatnaha biźniesu i zamiežnych inviestaraŭ — toje samaje, što płakać pa vałasach, zhubiŭšy hałavu. Biełaruś nie ŭ tym stanoviščy, kab hetak hrebavać adzinkavymi zamiežnymi inviestarami, što pryjšli ŭ krainu. Reputacyja, pahatoŭ u pałachlivych inviestaraŭ, budujecca ciaham hadoŭ, a razburycca moža ad adnaho nieaściarožnaha žestu, jakich za apošni čas sabrałasia zašmat.

Ab pryčynach takich dziejańniaŭ možna tolki zdahadvacca. Naŭrad ci biełaruskim uładam užo nie patrebnyja zamiežnyja kapitałaŭkładańni, bo alternatyŭnyja krynicy dla raźvićcia krainy tak i nie znajšlisia (prodaž usiaho Rasii ci Kitaju? Supolnyja prajekty ź Vieniesuełaj?).

Inšaja viersija, pra jakuju davodziłasia razvažać raniej, — heta padrychtoŭka da maštabnaha pieradziełu dziaržaŭnaj majomaści pamiž nabližanymi da dvara, udziełu ŭ jakoj zamiežnych inviestaraŭ sapraŭdy nie praduhledžvajecca.

Treciaja viersija — u asoby, pad jakuju zatočanaje kiravańnie ŭsimi klučavymi pracesami ŭ Biełarusi, zdajuć niervy, i biaśsilnaja złość ad taho, što hleba sychodzić z-pad noh, pieravažvaje racyjanalnyja arhumienty. To bok krytyčnyja pamyłki praciahvajucca.

• 0
• 0
• 0
• 0
• 0
• 0
• 0
• 0