Aleś Arastovič: «Ułada mahła nie dapuścić ludziej na druhuju płošču»

15 lutaha ź izalatara KDB vyzvalili pad padpisku pra niavyjezd Alesia Arastoviča, davieranuju asobu eks-kandydata ŭ prezydenty Mikałaja Statkieviča. Aleś Arastovič, pavodle śledčych, «chutka stanie pierad sudom».

Aleś Arastovič na maju prośbu zhadaŭ padziei 19 śniežnia. Pra toje, jak byŭ na mitynhu spačatku na Kastryčnickaj płoščy, a potym na płoščy Niezaležnaści, adtul syšoŭ, ale nie paśpieŭ adyści daloka, jak jamu na telefon pazvaniŭ Mikałaj Statkievič:

«Jon skazaŭ, dzie znachodzicca, i my ź im sustrelisia. Potym pajšli na vakzał, uziali taksoŭku i pajechali da mianie. A

le kala Hałoŭnaha paštamtu nas zatrymali.

U vyniku mnie vystaŭlenaje abvinavačańnie pavodle 293 artykuła — heta arhanizacyja masavych nieparadkaŭ. Vinavatym ja siabie nie pryznaju i adrazu pra heta kazaŭ na dopytach».

— I šmat było ŭ vas dopytaŭ?

— Try dopyty. Ludzi, jakija tam sapraŭdy hramili, — jany i zaraz znachodziacca ŭ «amerykancy».

— Vočnych stavak ź imi ŭ vas nie było?

— Nie. Nie było.

— Vy zaraz pad padpiskaj ab niavyjeździe?

— Tak. Ab niavyjeździe i naležnych pavodzinach. Pa Miensku mahu pierasoŭvacca, a kab vyjechać za horad, treba paprasić dazvołu.

— Učora była infarmacyja, što vam nibyta zabaronienyja kantakty z žurnalistami. Heta, vidać, niapraŭda?

— Ja ž z vami razmaŭlaju. Što da zabarony… Skazali hetak: sam nie inicyjuj kantaktaŭ. Patelefanujuć tabie — raspaviadzi, što było. A budzieš vystupać zanadta, rabić roznyja zajavy — znoŭ viernieśsia siudy. Skažu ščyra, jak ja i damoŭ pisaŭ, kab nie chvalavalisia:

umovy ŭ „amerykancy“ narmalnyja. Zrazumieła, što da sapraŭdnych pahromščykaŭ staŭleńnie było inšaje, a da nas…

— Adkul vy viedajecie, što da ich staŭleńnie inšaje?

— A tam ža ŭsio čutno.

— Što čutno? Jak ich bjuć i jany kryčać?

— Nie. Čuvać, jak ich vodziać. „Chutčej!“ Prykładam, mianie z kamery vyvodziać, dyk ja idu jak zvyčajna, a im kamandy addajuć…

— Ci papiaredzili vas, kali moža być sud?

— Papiaredzili, što sud budzie abaviazkova. Jak chutka? Usio budzie zaležać ad roznych rečaŭ. U tym liku, chto daść pakazańni na mianie.

— A jaki vaš prahnoz na hety sud? Što tam moža adbycca?

— Miarkuju, ja ni ŭ čym nie vinavaty. Pavodle taho artykuła, jaki mnie inkryminujuć, abvinavačańnie nie paćvierdzicca. Ja ni ŭ čym nia braŭ udziełu.

— Adkažycie, kali mahčyma, čym budzie dalej zajmacca?

— Pracavać. Ja navukovy supracoŭnik, pavodle adukacyi inžyner, šmat hadoŭ vykładaŭ, budu dalej pracavać. Ci nia zvolnili mianie z pracy, jašče nia viedaju, nie zvaniŭ, ale miarkuju, što ŭsio narmalna.

Na majo asobnaje pytańnie, jak jon aceńvaje padziei 19 śniežnia, Aleś Arastovič adkazaŭ, što niedapracavała ŭłada:

«Davajcie takija pytańni nia stavić. Ja prosty ŭdzielnik, analitykaj nie zajmajusia. Skažu hetak, što ŭłada mahła b nie dapuścić ludziej na druhuju płošču. Vielmi prosta. Papiaredžvajučy, što hety mitynh niesankcyjanavany, prosiačy razychodzicca. Zrabić dva-try kardony, i na druhuju płošču prajšło b u dziesiać, sto, tysiaču razoŭ mieniej. A mahli b i ŭvohule nie prajści».

• 0
• 0
• 0
• 0
• 0
• 0
• 0
• 0