ZŠA patrabujuć vyzvaleńnia biełaruskich palitviaźniaŭ

Złučanyja Štaty Ameryki znoŭ zaklikajuć Biełaruś da nieadkładnaha i biezumoŭnaha vyzvaleńnia ŭsich asob, zatrymanych z palityčnych matyvaŭ.

Pra heta havorycca ŭ admysłovaj zajavie pra sytuacyju ŭ Biełarusi, ź jakoj vystupiŭ kiraŭnik delehacyi ZŠA pry ABSE Ien Keli na pasiadžeńni Stałaj rady ABSE ŭ Vienie.

Tekst zajavy raźmieščany na aficyjnym sajcie delehacyi ZŠA ŭ ABSE.

«Złučanyja Štaty chacieli b jašče raz źviarnuć uvahu na nieprymalnuju sytuacyju ŭ Biełarusi, — skazaŭ Keli. — My pa-raniejšamu surjozna zaniepakojenyja nievykanańniem uradam demakratyčnych pryncypaŭ; represijami suprać hramadzianskaj supolnaści, jakija pradaŭžajucca, uciskam niezaležnych ŚMI i apazycyjnych palityčnych partyj i ruchaŭ; pačatkam sudovych pracesaŭ i vyniasieńniem surovych prysudaŭ u dačynieńni da zatrymanych; ckavańniem jurystaŭ, jakija pradstaŭlajuć intaresy zatrymanych; abmiežavańniem dostupu siemjaŭ da asobaŭ, zatrymanych i źmieščanych va ŭstanovach KDB, i niedastatkovym jurydyčnym pradstaŭnictvam dla hetych asobaŭ; umovami, u jakich utrymlivajucca zatrymanyja, i abychodžańniem ź imi ŭ čas znachodžańnia pad vartaj, a taksama zakryćciom ofisu ABSE ŭ Miensku».

Pa słovach Keli, chutkija sudovyja pracesy i prysudy «demanstrujuć novyja sproby pazbaŭleńnia ludziej voli ź vidavočna palityčnych pryčyn». «Jany taksama pakazvajuć na toje, što ŭrad Łukašenki naŭmysna praciahvaje ŭcisk tych, čyje dumki adroźnivajucca ad punktu hledžańnia ŭradu. Inšymi słovami, ułady pa-raniejšamu sprabujuć paviarnuć svoj narod nazad i padarvać ruch Biełarusi ŭ napramku da Eŭropy», — reziumavaŭ Keli.

Jon padkreśliŭ, što, niahledziačy na zapeŭnieńni biełaruskaha boku pra namier kanstruktyŭna pracavać z ABSE pa ŭsich pytańniach, Biełaruś tak i nie adkazała na prośbu pradstaŭnika pa pytańniach svabody ŚMI Duni Mijatavič dać joj mahčymaść naviedać krainu i nie dazvoliła pradstaŭnikam Biuro demakratyčnych instytutaŭ i pravoŭ čałavieka ABSE svabodna nazirać za chodam sudovych pracesaŭ nad zatrymanymi ŭdzielnikami akcyi 19 śniežnia.

«Choć ministar zamiežnych spraŭ paabiacaŭ kanstruktyŭna supracoŭničać z vykanaŭčymi strukturami ABSE, hetyja słovy pavinny być padmacavanyja spravami», — skazaŭ Keli.

Pa słovach kiraŭnika delehacyi ZŠA pry ABSE, asablivuju zaniepakojenaść vyklikaje zajava, zroblenaja 28 lutaha eks-kandydatam u prezydenty Biełarusi Alesiem Michalevičam. «Spadar Michalevič zajaŭlaje, što jon i inšyja zatrymanyja systematyčna zaznavali katavańni z boku pradstaŭnikoŭ KDB. Jon śćviardžaje, što byŭ vymušany pahadzicca stać infarmataram KDB, kab jaho vyzvalili. My rašuča zaklikajem urad Biełarusi dazvolić niezaležnaje raśśledavańnie hetych vielmi surjoznych abvinavačańniaŭ», — zajaviŭ Keli.

Jon taksama adznačyŭ uzmacnieńnie cisku na advakataŭ, jakija abaraniajuć fihurantaŭ spravy ab masavych biesparadkach 19 śniežnia.

• 0
• 0
• 0
• 0
• 0
• 0
• 0
• 0