Japonija na miažy novaha Čarnobyla. AES u Fukusimie chałodziać marskoj vadoj

Pačałasia evakuacyja 20-kiłamietrovaj zony. Urad zapeŭnivaje, što vybuch nie začapiŭ reaktara.

Hienieralny sakratar urada Japonii paćvierdziŭ fakt vybuchu na AES «Fukusima-1». Adnak jon zavieryŭ, što ŭzarvaŭsia nie reaktar. Na zdymkach ź miesca zdareńnia vidać vializny słup dymu i abvał častki budynku.

Pavodle apošnich źviestak, vybuchnuŭ vadarod, jaki vykarystoŭvaŭsia dla achałodžvańnia reaktara.

Urad zapeŭnivaje, što achałodžvańnie reaktara marskoj vadoj daje dobry vynik.

Pracavitaja Japonija vystajała pry apakaliptyčnym ziemlatrusie. Kolkaść razbureńniaŭ ad stychii takoha maštabu dzivosna nizkaja. Ale biada pryjšła ad sučasnych technałohij. Cunami razburyła elektrasietki vakoł dvuch AES. Heta pryviało da spynieńnia sistemy achałodžvańnia reaktaraŭ. Pahražaje katastrofa roŭnaja Čarnobylskaj. Ź dziesiacikiłamietrovych zonaŭ vakoł dźviuch AES za dzień evakujavali 300 tysiač žycharoŭ.

Vyhladaje, što raspłavilisia mietaličnyja abałonki, jakija abaraniajuć stryžni reaktara. Značyć, tempieratura ŭnutry reaktara moža dasiahać 1200 hradusaŭ.

Raniej paviedamlałasia, što cisk unutry avaryjnaha reaktara AES «Fukusima-1» pieravyšaje kaeficyjent zapasu tryvałaści korpusa ŭ 2,1 razu. Tempieratura i cisk unutry adnaho z reaktaraŭ AES pačali padymacca paśla zboju ŭ sistemie astudžeńnia.

«Na Fukusimie pačałasia niepaduładnaja nam łancuhovaja jadziernaja reakcyja», — paviedamiła ŭ subotu Ministerstva ekanomiki, handlu i pramysłovaści Japonii.

Paśla ziemlatrusu reaktar ​​aŭtamatyčna spyniŭsia. Ale cunami razburyła linii elektrapieradač vakoł AES i dyzielnyja hienieratary stancyi, tamu ŭ reaktar pierastała pastupać vada, nieabchodnaja dla jaho astudžeńnia. Uzrovień vady paniziŭsia, u vyniku čaho stryžni reaktara apynulisia nad jaje pavierchniaj. Usiu noč u astudžalnuju zonu reaktara sprabavali pampavać vialikija abjomy vady, kab padtrymać nieabchodny ŭzrovień. Vyhladaje, što pośpiechu dasiahnuć nie ŭdałosia.

Jak ličać śpiecyjalisty, asnoŭnaja častka paliva pa-raniejšamu zastajecca ŭ reaktary.

Dla źmianšeńnia cisku ŭnutry reaktaraŭ japonskaje Ahienctva jadziernaj biaśpieki dało zhodu na kantralavany vypusk pary. A heta pryviadzie da vykidaŭ radyjacyi ŭ atmaśfieru. Dy, kryj Boža, moža zdarycca i vybuch, jak u Čarnobyli.

Kantralavany vypusk pary — biesprecedentnaja apieracyja ŭ historyi japonskich AES.

Stancyju naviedaŭ prem'jer-ministr Japonii Naota Kan. Jon zavieryŭ žycharoŭ rajona, što pa-za10-kiłamietrovaj zonaj vakoł reaktara nijakaj niebiaśpieki dla ludziej pakul niama.

Ułady nie chavajuć, što ŭ kantrolnym pamiaškańni pieršaha reaktara na AES «Fukusima-1» ŭzrovień radyjacyi ŭ ciapierašni čas pieravyšaje narmalny ŭ 1 tys. razoŭ, a la hałoŭnych varot stancyi — u 8 razoŭ.

Kampanija Tokyo Electric Power Co, jakaja kiruje stancyjaj, paviedamiła ab padrychtoŭcy reziervovaha abstalavańnia dla padačy vady ŭ reaktar.

Surjoznaja situacyja składvajecca i na susiedniaj AES «Fukusima-2», dzie taksama majucca surjoznyja prablemy ź sistemaj achałodžvańnia reaktara.

U radyusie 3 km ad hetaj AES žycharam taksama zahadana evakujavacca. U zonie radyusam 20 km u rajonie hetych dvuch AES evakuacyi padlahajuć da 300 tys. čałaviek.

AES naviedaŭ prem'jer-ministr Japonii Naota Kan (Japoniju ŭznačalvaje premjer, impieratar vykonvaje tolki rytualnyja funkcyi).

Nahadajem, što paśla Čarnobylskaj AES infarmacyju pry vykid radyjacyi doŭhi čas chavali, a evakuacyja 30-kiłamietrovaj zony vakoł reaktara adbyłasia ź vialikaj zaciažkaj.

Adzin z najmacniejšych ziemlatrusaŭ našaha času adbyŭsia la ŭźbiarežža prefiektury Mijahi za 373 kiłamietry ad Tokia. Mahnituda jaho skłała 8,9. Ziemlatrus vyklikaŭ mocnuju cunami. U šerahu rajonaŭ vyšynia pryliŭnoj chvali pieravyšała dziesiać mietraŭ. Bolš za tysiaču čałaviek zahinuli i prapali bieź viestak.

Ziemlatrus u Japonii, jaki adbyŭsia ŭ piatnicu 11 sakavika, pryvioŭ da zrušeńnia vosi Ziamli na 15 sm. Akramia taho, pavodle papiarednich raźlikaŭ, praciahłaść ziamnych sutak skaraciłasia na 1,6 mikrasiekundy.

Cunami zaliła ŭ tym liku i rajony vakoł AES u Fukusimie. Supracoŭniki stancyi pieražyli strašnyja chviliny. Z adnaho boku, jany sutyknulisia ź nievyrašalnymi technałahičnymi prablemami. Z druhoha, jany nie viedali pra los svajakoŭ. Cunami nakryła haradki, dzie žyvuć ichnyja blizkija.

Pad vadoj akazałasia vialikaja častka horada Sendaj — darečy, pabracima Minska. Tam majucca šmatlikija paciarpiełyja i razbureńni. U tym liku vada całkam zaliła vialiki aeraport horada.

Japonskaje TV viadzie žyvuju tranślacyju ź miesca zdareńniaŭ. U krainie dziejničaje internet.

U horadzie Kamaisi prefiektury Ivate na vostravie Chansiu 10-mietrovaja cunami zmyła dziasiatki aŭtamabilaŭ.

Cunami taksama dajšło da Kurylskich vyspaŭ i Tajvania.

Zdymki ź viertalota z Sendaja šakujuć: cunami znosić damy, vałače mašyny i karabli, raźbivaje ich u bietonny most, i žaleznyja mačty vyłomvajucca, jak zapałki. Damy harać na płyvu. Aŭtamabilisty adčajna sprabujuć uciačy ad hihanckaj chvali pa šašy…

U centry japonskaj stalicy abrynuŭsia viadomy ŭ krainie dom pryjomaŭ «Kudy kajkan» — miesca praviadzieńnia mnohich aficyjnych mierapryjemstvaŭ.

U Tokia abrynuŭsia špil televiežy.

ZŠA zajavili pra hatoŭnaść terminova vysłać u Japoniju samaloty VPS z rečyvam-achaładžalnikam. Nieviadoma, ci takaja ekstranaja dapamoha zdoleje ŭratavać situacyju.

Usiaho ŭ vyniku stychii aŭtamatyčna spynili pracu piać japonskich AES. Na adnoj ź ich pačaŭsia pažar u turbinnaj zale, jaki pahasili pažarniki. Vykidaŭ radyjacyi nie adbyłosia.

Biełaruś — spakojnaja ŭ siejśmičnym sensie terytoryja. Adnak nievialikija ziemlatrusy mahčymyja i ŭ nas. U pryvatnaści,

adna z patencyjnych zonaŭ siejśmičnaj aktyŭnaści prachodzić u rajonie budučaj Astravieckaj AES.

Mienavita na Astravieččynie zafiksavany precedent samaha mocnaha biełaruskaha ziemlatrusu.

U 1909 h. vodhałas italjanskaha ziemlatrusu vyklikaŭ na Astravieččynie, kali vioski Siaržanty, źjaŭleńnie hłybokaha rovu «ź viarstu z poŭnačy na paŭdniovy ŭschod».

Biełaruskija navukoŭcy acanili toj ziemlatrus 1909 hodu ŭ 7 bałaŭ pavodle škały Rychtara.

Cunami ŭ Japonii vyklikali taksama spynieńnie pracy siami ciepłaelektrastancyj i 24 HES. Adnak na hetych abjektach niama niebiaśpieki avaryi, jakaja b pahražała navakolnamu asiarodździu. Tady jak atamnaja siła zdolnaja vychodzić z-pad kantrolu čałavieka.

Uzrovień radyjacyi na rasijskim Dalokim Uschodzie i ŭ Tokia pakul nie ŭźniaŭsia.

Ad AES u Fukusimie da Tokia — 260 kiłamietraŭ. Nahadajem, što ad płanavanaj Astravieckaj AES usiaho 60 km da Vilni i 30 — da pierliny Naračy.

• 0
• 0
• 0
• 0
• 0
• 0
• 0
• 0