«Biełarusbank» pradaje dyvany, vino i śviniej

Adzin z hałoŭnych bankaŭ krainy, «Biełarusbank», vydaje bieźlič lhotnych kredytaŭ na padtrymku zaniadbanych pradpryjemstvaŭ. Tyja viarnuć hrošy nie mohuć, a biudžetnaja padtrymka prychodzić daloka nie zaŭsiody. U takich vypadkach bank sprabuje spahnać kredyt praz sud, ale pradpryjemstva-bankrut razvodzić ruki — niama hrošaj! U vyniku «Biełarusbank» musić samastojna realizoŭvać pradukcyju biełaruskich fabryk i zavodaŭ, atrymanuju ŭ košt doŭhu.

15 tysiač dyvanoŭ

U apošnija tydni ŭ centry ŭvahi biełarusbankaŭskaha kiraŭnictva akazalisia dyvany. AAT «Dyvany Bresta» — adzin ź lidaraŭ ajčynnaha rynku, 99% akcyj naležyć «Biellehpramu». Jašče ŭ 2008 hodzie pradpryjemstva było vinavata «Biełarusbanku» bolš za $2 miljony. Sudovaja vałakita ciahnułasia hod za hodam, doŭh ros, ale ŭrešcie bank atrymaŭ zamiest hrošaj prava na prodaž budynku fabryki i dyvany. Pa papiarednich padlikach, ich bolš za 15 tysiač.

Naprykład, adna ź filijaŭ «Biełarusbanka» ŭ abłasnym centry atrymała na realizacyju 345 dyvanoŭ.

«Niekalki tydniaŭ tamu, kali ŭ našaje adździaleńnie pryjazdžaŭ inkasatar, jon pacikaviŭsia, ci pryvieźli nam našy dyvany, — raskazaŭ „NN“ adzin z kasiraŭ „Biełarusbanka“. — Tady supracoŭniki nie zrazumieli jahony „žart“, ale ciapier da nas pryjšoŭ śpiecyjalny list».

Dematyvatary pracy

Kožnaje adździaleńnie atrymała list «Ab realizacyi dyvanovaj pradukcyi» z nastupnym źmiestam:

«…ustanovami banka pravodzicca praca pa realizacyi dyvanovaj pradukcyi AAT „Dyvany Bresta“, pryniataj u jakaści adstupnoha. Načalnikam filijałaŭ… ustalavać asabisty kantrol za realizacyjaj dadzienaj pradukcyi ŭ maksimalna karotkija terminy.

Uličvajučy nieabchodnaść infarmavańnia kiraŭnictva banka, filijałam… varta štotydzień pa paniadziełkach pradstaŭlać infarmacyju ab realizacyi pradukcyi».

Ale kamu treba dyvany koštam 100–150 tysiač rubloŭ? Pavodle infarmacyi «NN»,

kiraŭnictva niekatorych adździaleńniaŭ «Biełarusbanka» pryniało «sałamonava rašeńnie» — najlepšyja supracoŭniki atrymajuć zamiest premii dyvany!

Pładovaje, ale nadta vyhadnaje

Ale nie dyvanami adzinymi. Časam minskim supracoŭnikam «Biełarusbanka» padvozili niedarahuju bulbu i navat rybu — usio ŭ košt raniejšych kredytaŭ. Poŭny śpis pradukcyi, jakuju pradaje bank, prymušaje schapicca za hałavu.

Naprykład,

u filijał № 121 «Biełarusbanka» ŭ Pinsku možna źviartacca pa darmovy ałkahol. Pradajecca 600 tysiač paŭlitrovych butelek pładovaha vina pa 2000 rubloŭ i jašče 360 tysiač butelek pa 0,7 ł za 2800 rubloŭ.

Aŭtapark na rasprodažy składajecca ź dziasiatka traktaraŭ «Biełarus», raskidanych pa ŭsioj krainie i navat adnaho «Kadziłaka» 2000 hoda vypusku, jaki znachodzicca ŭ Słonimie.

Narešcie, u Maładziečanskim rajonie pradajucca «śvińni žyvoj vahoj».

• 0
• 0
• 0
• 0
• 0
• 0
• 0
• 0