Studenckaja supolnaść EHU patrabuje vyzvaleńnia Mikałaja Dziadka

Studenckaja supolnaść Jeŭrapiejskaha humanitarnaha ŭniviersiteta patrabuje nieadkładnaha pierahladu prysudu, vyniesienaha pa kryminalnaj spravie ŭ dačynieńni da studenta-zavočnika EHU Mikałaja Dziadka. 

27 maja ŭ Zavodskim sudzie horada Minska sudździa Žanna Chvajnickaja vyniesła Mikałaju prysud — 4,5 hady pazbaŭleńnia voli (h.zv «sprava anarchistaŭ). Da hetaha momantu Mikałaj Dziadok užo bolš za 8 miesiacaŭ znachodziŭsia pad aryštam.

Paśla detalovaha aznajamleńnia z chodam śledstva i sudovaha pracesu, a taksama z atrymanym pravavym zaklučeńniem Studenckaje Pradstaŭnictva EHU i moładzievaja inicyjatyva StudAlliance patrabuje nieadkładnaha vyzvaleńnia Mikałaja Dziadka i prosić pryciahnuć da adkaznaści ludziej, jakija padviarhali studenta EHU Mikałaja Dziadka fizičnamu i maralnamu hvałtu, a taksama tych, chto supraćzakonna i amaralna pavodziŭ siabie na praciahu ŭsiaho śledstva.

Prezident Studenckaha Pradstaŭnictva EHU Maksim Miłto:

— Studenctva EHU ŭžo vielmi doŭha sočyć za tym, što adbyvajecca vakoł našaha kalehi Mikałaja Dziadka. My šakavanyja prysudam, i ŭsie fakty i śviedčańni, jakija my majem, kažuć pra nadumanaść dadzienaha pracesu i nievinavataść Mikałaja. My ŭžo zaručylisia padtrymkaj Litoŭskaha Sajuza studentaŭ u hetym pytańni i budziem usimi mahčymymi sposabami dapamahać Mikałaju vyjści z hetaj absurdnaj situacyi, jakuju tak dobra skanstrujavali biełaruskija śpiecsłužby.

Varta adznačyć, što padčas sudovaha pracesu Mikałaj šmat razoŭ zajaŭlaŭ, što nie ŭvachodzić u skład nijakich palityčnych ruchaŭ, u tym liku i ruchu anarchistaŭ. Na sudovym pracesie dziaržaŭnym abvinavaŭcam nieadnarazova rabilisia sproby pradstavić Dziadka jak «niefarmalnaha lidara» niejkaj «anarchisckaj hrupoŭki». U toj ža čas, supiarečačy sabie, dziaržaŭny abvinavaŭca śćviardžaŭ, što abvinavačvanyja źjaŭlajucca zvyčajnymi chulihanami, kryminalnikami, što lubiać padpalvać i chulihanić, što nijakaj palityčnaj padaploki i hramadskaha pratestu ŭ ich dziejańniach niama.

Kaardynatar moładzievaj inicyjatyvy StudAlliance Kirył Atamančyk:

— Hety sudovy praces pakazaŭ usiu absurdnaść biełaruskaj sistemy pravasudździa. Na vialiki žal, u žorny hetaj sudovaj vakchanalii patrapiŭ naš student. Sprava nosić vidavočna zakazny charaktar, tamu my možam apuścić vykanańnie jakich-kolviek zakonnych dziejańniaŭ, ci to heta byli b chadajnictvy pra abaronu, ci dadatki da materyjałaŭ spravy, jakija śviedčać pra nievinavataść Mikałaja; ale čaho my nie možam apuścić — dyk heta taho faktu, što Mikałaj padviarhaŭsia žorstkamu fizičnamu i maralnamu presinhu z boku biełaruskich siłavikoŭ. Padviarhaŭsia nie jon adzin. Usie śviedki zajavili ŭ sudzie, što na ich akazvaŭsia cisk. Pačynajučy ad pahrozaŭ nakont navučańnia — i da fizičnych raspravaŭ. Hetaha my tak prosta nie pakiniem. Mikałaj Dziadok pazbaŭleny voli za svaje pierakanańni. Pakarany za złačynstvy, jakich jon nie ździajśniaŭ. Jon palityčny zakładnik.

Studenckaja supolnaść Jeŭrapiejskaha humanitarnaha ŭniviersiteta maje namier źviarnucca da dypłamatyčnych pradstaŭnictvaŭ, mižnarodnych pravaabarončych arhanizacyj i studenckich sajuzaŭ roznych krain z prośbaj pra dapamohu i salidarnaść ź Mikałajem Dziadkom, a taksama pryciahnuć uvahu da ŭmovaŭ utrymańnia biełaruskich źniavolenych.

• 0
• 0
• 0
• 0
• 0
• 0
• 0
• 0