Šviedy śćviardžajuć, što bambardavali rezidencyju Łukašenki cackami z zaklikami da svabody
Adnak ni na adnym fota nie vidać Minska.
Jak śćviardžajuć šviedskija ŚMI, hrupa šviedaŭ z ryzykaj dla žyćcia praviała śmiełuju akcyju ŭ padtrymku biełaruskaha ruchu za svabodu.Stakholmskija vydańni pišuć, što junaki pajšli dalej za Matyjasa Rusta. Jany nie prosta abyšli biełaruskuju supraćpavietranuju abaronu na nastupny dzień paśla paradu Dnia Niezaležnaści, ale i skinuli na ranišni Minsk 800 cacak. Da plušavych miadźviedzikaŭ byli pryčepleny łozunhi ŭ padtrymku svabody.
Piłoty śćviardžajuć, što kala 5.00 ranku skinuli cacki ŭ rajonie rezidencyi Alaksandra Łukašenki.
Paźniej u sieradu šviedy raspaŭsiudzili foty, nibyta zroblenyja ŭ časie akcyi ich siabrami na miescy padziei. Adnak ni na adnym ź ich nie vidać Minsk.
Metaj akcyi była padtrymka demakratyčnych pracesaŭ u Biełarusi. Chto kankretna jaje zadumaŭ — nie ŭdakładniajecca.
Zarehistravany ŭ Šviecyi samalot, jak śćviardžajecca, vylecieŭ z terytoryi susiedniaj Litvy i biez dazvołu pranik u pavietranuju prastoru Biełarusi.Startavaŭ jon z aeradroma ŭ Pačunach (Pačunaj) kala Koŭna. Šviedy bajalisia, što samalot moža być źbity biełaruskaj SPA. Adnak niekalkihadzinny palot zaviaršyŭsia biez zdareńniaŭ.
«Nie viedaju, ci zasiakli nas radary.
My lacieli na małoj vyšyni», — adznačaje piłot.
Pavodle infarmacyi haziety Aftonbladet, akcyja była arhanizavana pry finansavaj padtrymcy rekłamnaha ahienctva Studio Total. U minułym heta ahienctva mieła dačynieńnie, u pryvatnaści, da akcyi ŭ padtrymku pravoŭ žančyn: jano vydała fieministkam hrošy (100 tysiač kron), jakija jany spalili ŭ znak pratestu suprać dyskryminacyi žančyn pa zarobkach.
Pieršapačatkova šviedy źbiralisia skinuć na Minsk ulotki, ale paśla spynilisia na cackach.
Ideja akcyi šviedam mahła pryjści pad uražańniem pierformansu biełaruskaj hrupy moładzi «Zmiena».U lutym były palitviazień Pavieł Vinahradaŭ i jahonyja siabry arhanizavali «Mitynh cacak»: pierad uvachodam u Mienski harvykankam. Tam byli źmieščany plušavyja cacki z nadpisami, źviernutymi da biełaruskich uładaŭ: u pryvatnaści, «Dzie svaboda słova?» i «Alechandra! Adpuści ludziej». Apošni nadpis tyčyŭsia palitviaźniaŭ. Ułady tady žorstka pakarali arhanizataraŭ akcyi «Cacki mitynhue»: usie jany atrymali administracyjnyja terminy. Infarmacyja pra kreatyŭnuju akcyju i nieadekvatnuju reakcyju biełaruskaj dyktatury prajšła ŭ suśvietnych ŚMI. «U Minsku aryštavali cacki», pisali haziety.
Varta adznačyć, što šviedy paśladoŭna padtrymlivajuć ruch nacyjanalnaha vyzvaleńnia ŭ Biełarusi.U pryvatnaści, jany dapamahajuć adzinamu biełaruskamoŭnamu telekanału «Biełsat» i EHU.
Hazieta Aftonbladet — adna z samych papularnych u Šviecyi.
Vydańnie śćviardžaje, što viedała pra padrychtoŭku akcyi zahadzia.«Nam padabajecca ideja zmahańnia z dyktatarami z dapamohaj humaru. Najhoršaje dla dyktatara — kali ź jaho śmiajujuca», — skazali šviedy ŭ intervju haziecie pierad vyletam. Jany pryznavalisia, što bajacca, bo samalot mohuć źbić abo prymusova pasadzić, a ich — zatrymać. Ale «žurnalisty i dysidenty ŭ hetaj krainie žyvuć pry štodzionnaj ryzycy źniavoleńnia» i «my chacieli, kab śviet źviarnuŭ uvahu na hetych ludziej».
Foty z samoj akcyi ŭ ranišnich vydańniach nie publikujucca.
Imia piłota i jahonaha spadarožnika nie paviedamlajecca pa jahonaj prośbie, ź mierkavańniaŭ biaśpieki.Dakumientalnych paćvierdžańniaŭ akcyi pakul niama. Reparciory NN kala 11.00 nie zaŭvažyli kala Administracyi prezidenta ani cacak, ani pavyšanaj aktyŭnaści siłavikoŭ. Minabarony Biełarusi zajaviła, što parušeńniaŭ pavietranaj prastory Biełarusi ŭnačy na 4 lipienia nie fiksavałasia.
U cełym, usia hetaja historyja vyhladaje na vysakarodnuju pijar-akcyju.
Ciapier čytajuć
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca
Kamientary