Piać faktaŭ pra pasła Stefana Eryksana

1. Vałodańnie biełaruskaj movaj

Viadoma, što ŭsim jon zapomniŭsia najpierš svajoj biezdakornaj movaj. «Dla mianie vyvučyć biełaruskuju movu było naturalnaj patrebaj, va ŭsich krainach, dzie pracavaŭ, vyvučaŭ movy», — kazaŭ sp. Eryksan. Zdajecca, naturalnaja reč, ale nie ŭ Biełarusi. Tamu i prychodziłasia Stefanu vysłuchoŭvać kamplimienty ŭ svoj bok.

Eryksan nie tolki razmaŭlaŭ paŭsiul publična pa-biełarusku, ale i pierakładaŭ z našaj movy na šviedskuju tvory Vasila Bykava, Uładzimira Arłova. Pry jahonaj padtrymcy vyjšli kłasičnyja knihi šviedskaj litaratury na našaj movie.

Niekalki razoŭ Eryksana zaprašali na dziaržaŭnaje telebačańnie, dzie viadučyja havaryli pa-rasiejsku, a Eryksan — pa-biełarusku. Napeŭna, praz Eryksana šmat chto z našych suajčyńnikaŭ zadumaŭsia: kali švied moža, to čamu my — nie?

2. Upieršyniu trapiŭ u Minsk u 1984

«Ja byŭ tady na stažyroŭcy ŭ Maskvie i vyrašyŭ naviedać Minsk. Biełaruś była absalutna zakrytaj savieckaj respublikaj», — adznačaŭ Eryksan.

Uvohule šviedski dypłamat — zaŭziaty padarožnik. Jon abjeździŭ amal usiu krainu. «Byŭ niekalki razoŭ u Horadni, Viciebsku, Pinsku, Połacku. Niečakana Babrujsk akazaŭsia vielmi cikavym. Kaniečnie, Navahradak, Mir, Niaśviž, Biełavieskaja pušča».

«Małady front» navat premiju ŭručyŭ pasłu «Lublu Biełaruś». Stefan pry ŭručeńni iranična adznačyŭ: «Ja padazravaŭ, što lublu Biełaruś. Ciapier viedaju heta dakładna».

3. Chadziŭ na sudy i mitynhi

U pieršyja chviliny paśla razhromu štaba kandydata ŭ prezidenty Uładzimira Niaklajeva tudy nakiravaŭsia pasoł Eryksan. «Jak ja zrazumieŭ, adbyvałasia mirnaje šeście, udzielniki jakoha byli žorstka źbity śpiecnazam. Heta vielmi zasmučaje», — skazaŭ jon tady.

Eryksan sam chadziŭ na mnohija sudy nad pradstaŭnikami apazicyi, kab na svaje vočy pabačyć, ci spraviadlivyja jany. Niekatoryja inšyja dyppradstaŭnictvy abmiažoŭvalisia daradcami pasła. Eryksan naziraŭ na svaje vočy za bolšaściu vuličnych akcyj.

Pytańnie pravoŭ čałavieka zaŭsiody stajała dla Šviecyi adnym z hałoŭnym. Razam z tym hetaja skandynaŭskaja kraina imknułasia, kab Biełaruś nie traplała ŭ bolšuju zaležnaść ad Rasii. Praz heta i ŭźnikła prahrama «Uschodniaje partniorstva», adnym z łakamatyvam jakoj była Šviecyja.

4. Sprabavaŭ pryvieści šviedski biźnies u Biełaruś

Z hetaj metaj u 2008 navat byŭ arhanizavany ŭ Stakholmie ekanamičny sieminar. «Na sustrečy pryjšło biznesmienaŭ bolš, čym ja čakaŭ», — adznačyŭ tady dypłamat.

Šviedski kapitał prysutničaje ŭ Biełarusi, ale zusim nie ŭ tych abjomach, jakich by chaciełasia. Časta šviedaŭ pałochaje palityčnaja situacyja ŭ krainie.

5. Chvaliŭ biełaruskaje piva i harełku

Stefan Eryksan kazaŭ, što Stakholm naviedvaŭ prykładna raz na dva miesiacy. Svaju kvateru ŭ Šviecyi jon zdavaŭ, a meblu pieravioz u Biełaruś. Razam ź im u Minsku była i siamja.

«Šviedu niakiepska žyviecca ŭ Biełarusi. Ježa nie tak užo i adroźnivajecca. Biełaruskaja harełka i piva nie horšyja za jeŭrapiejskija. I klimat padobny. Jość padabienstva miž śviatami. U nas isnuje śviata ŭ siaredzinie leta, u vas — Kupalle. U vas u listapadzie Dziady, u nas dzień usich śviatych. Biełaruś dla mianie nie ekzatyčnaja kraina, a jeŭrapiejskaja».

• 0
• 0
• 0
• 0
• 0
• 0
• 0
• 0