Jašče ŭ žniŭni minułaha hoda dylerami była zareziervavana ŭsia płošča «Futbolnaha manieža», a heta, miž inšym, 12 tysiač kvadratnych mietraŭ. Arhanizatary padličyli, što dla taho, kab zadavolić zajaŭki ŭsich achvotnikaŭ, spatrebiłasia b nie mienš za 20 tysiač kvadratnych mietraŭ. Ale maniež, na žal, nie humavy. Uziać udzieł u «Motaršoŭ» paščasciła ŭładalnikam 33 aŭtamabilnych brendaŭ, jakija ahułam vystavili na pakaz minčanam i haściam biełaruskaj stalicy 250 mašyn. Pavodle słoŭ adnaho z arhanizataraŭ vystavy, dyrektara AAT «Remark» Dzmitryja Jaroty, heta rekordnaja kolkaść za ŭsiu historyju isnavańnia «Motaršoŭ».
Raniej na takija aŭtamabilnyja ahledziny dylery vystaŭlali nie bolš za 110 mašyn. Na dumku kiraŭnika Biełaruskaj aŭtamabilnaj asacyjacyi Ludmiły Šabanavaj, aktyŭnaść handlaroŭ aŭtamabilami abumoŭlena rezkim usploskam prodažu novych mašyn u našaj krainie, jaki adbyŭsia letaś, paśla ŭnifikacyi mytnych pošlin na ŭvoz inšamarak dla jurydyčnych i fizičnych asobaŭ. U minułym hodzie biełarusy nabyli bolš za 10 tysiač novych aŭtamabilaŭ i, jak ličyć, Ludmiła Šabanava, popyt budzie rasci. Pavodle jaje mierkavańniaŭ, jomistaść biełaruskaha aŭtarynku nieŭzabavie moža dasiahnuć prykładna 50 tysiač novych aŭto ŭ hod. Naturalna, što «Motaršoŭ» zacikaviŭ amal usich aŭtahihantaŭ. Sioleta pad dacham «Futbolnaha manieža» ŭpieršyniu pradstaŭleny adrazu try niamieckija vołaty: «Audi», «BMW» i «Miersiedies».
Aproč niemcaŭ u «Motaršoŭ» biaruć udzieł viadučyja japonskija aŭtavytvorcy: «Mazda», «Honda», «Suzuki», «Subaru».
Nadzvyčajnuju aktyŭnaść prajavili i navički suśvietnaha aŭtaprama — kitajcy. Aŭtavytvorcy z Padniabiesnaj vystavili niekalki madelaŭ kampanii «Hafiei Motor».
Admietna, što ŭ hetym hodzie na «Motaršoŭ» niazvykła cicha. Hučyć spakojnaja muzyka, jakaja stvaraje kamfort dla naviedvalnikaŭ. Padobny fon — zusim nie biełaruskaje vynachodnictva. Heta — mižnarodny standart praviadzieńnia aŭtavystaŭ. Aŭtamabilny biznes, jak i bankaŭski, taksama lubić cišyniu. Niama sioleta na «Motaršoŭ» i tradycyjnaha «chedłajniera». Raniej, naprykład, na rolu «viasielnych hienierałaŭ» pryvozili brytanskuju rakietu «Noblie» i italjanski supierkar «Lamborghini Gallardo». Arhanizatary ščyra pryznalisia, što ŭ hetym hodzie chacieli paradavać voka naviedvalnikaŭ vystavy šykoŭnym «Fierrari». Ale niešta ŭ ich nie atrymałasia. Ale biez «šparkaha italjanca» na «Motaršoŭ» jość što pahladzieć, a pry žadanni i kupić upadabany aŭtaekzemplar. Vybar — ahromnisty. Na luby hust i pamier kašalka. Prychodźcie i pierakanajeciesia ŭ hetym sami. Vystava budzie pracavać da 9 maja z 10 da 21 hadziny. Uvachod płatny. Košt bileta —15 tysiač rubloŭ.
Fota motorshow.by
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary