Ekzarchat: Padstavaŭ dla pierahladu zakonu «Ab svabodzie sumleńnia» niama

Kiraŭnictva Biełaruskaha ekzarchata Ruskaj pravasłaŭnaj carkvy nie bačyć padstaŭ dla pierahladu zakona «Ab svabodzie sumleńnia i relihijnych arhanizacyjach» i zaklikaje pravasłaŭnych hramadzian ustrymacca ad udziełu ŭ niejkich kampanijach pa hetym pytańni. Pra heta havorycca ŭ infarmacyi pres‑słužby Biełaruskaha ekzarchata.

Paviedamlajecca, što 25 krasavika 2007 hoda ŭ budynku staličnaj carkvy «Novaje žyćcio» Abjadnańnia abščyn chryścijan poŭnaha Jevanhiella ŭ Respublicy Biełaruś adbyłasia pres‑kanfierencyja. «Na hetym mierapryjemstvie, jakoje prachodziła ŭ miežach hetak zvanaj «Kampanii pa abaronie pravoŭ na svabodu sumleńnia», było abjaŭlena ab zbory podpisaŭ u padtrymku źmianieńnia zakona «Ab svabodzie sumleńnia i relihijnych arhanizacyjach», — havorycca ŭ infarmacyi. Pres‑słužba ekzarchata zaznačaje, što «Biełaruskaja pravasłaŭnaja carkva nie maje nijakaha dačynieńnia da nazvanaj kampanii». Kliryk Śviata‑Pakroŭskaha prychoda Minska śviatar Alaksandr Šramko, jaki vystupiŭ padčas pres‑kanfierencyi, nie mieŭ carkoŭnaha błahasłavieńnia na ŭdzieł u joj. U svaim vystupleńni jon vykazaŭ tolki svoj asabisty punkt hledžańnia, havorycca ŭ paviedamleńni.

«Pazicyja Biełaruskaj pravasłaŭnaj carkvy datyčna pryniataj u kastryčniku 2002 hoda novaj redakcyi zakona «Ab svabodzie sumleńnia i relihijnych arhanizacyjach» nie źmianiłasia: hety dakumient sadziejničaje padtrymańniu relihijnaha miru i kanfiesijnaj stabilnaści ŭ Biełarusi, utrymlivaje pazityŭny suśvietny vopyt zakanadaŭstva ab relihii, najpierš — praktyku jeŭrapiejskich krain. U 2002 hodzie hramadzianie respubliki sabrali bolš za 200.000 podpisaŭ za pryniaćcie abnoŭlenaha zakona. Tady zakonaprajekt byŭ padtrymany nie tolki pravasłaŭnymi chryścijanami, ale taksama pradstaŭnikami kiraŭnictva i viernikami inšych tradycyjnych vieravyznańniaŭ: katalickaha, musulmanskaha, iudziejskaha, jevanhielična‑luteranskaha», — havorycca ŭ paviedamleńni.

Nahadajem, što arhanizatary kampanii, jakaja pačałasia ŭ krainie 22 krasavika, raźličvajuć sabrać nie mienš za 50 tysiač podpisaŭ pad adkrytym zvarotam da kiraŭnika dziaržavy, Kanstytucyjnaha suda, Pałaty pradstaŭnikoŭ Nacyjanalnaha schodu z zaklikam pryvieści ŭ adpaviednaść z Kanstytucyjaj zakon «Ab svabodzie sumleńnia i relihijnych arhanizacyjach», jaki dziejničaje z kanca 2002 hoda.

• 0
• 0
• 0
• 0
• 0
• 0
• 0
• 0