Pieranos

Ukraina i Biełaruś musiać ahułam zakupić usie estonskija šproty na piać hadoŭ upierad. Z udziačnaści. Piša Alaksandar Fiaduta.

Ja śviadoma nie vykazvaŭ svajho staŭleńnia da taho, što adbyłosia ŭ Talinie vakoł zachavańnia reštkaŭ savieckich sałdataŭ. Ja čakaŭ 8 traŭnia.

Tamu što mienavita na 8 traŭnia — na dzień zakančeńnia Vialikaj Ajčynnaj vajny — było pryznačana adkryćcio novaha zachavańnia sa starym pomnikam — tym samym «bronzavym sałdatam».

Hetaha momantu ja i čakaŭ. Mnie było cikava, jak siabie budzie pavodzić estonskaja palityčnaja elita.

Jana paviali siabie prystojna. Premjer‑ministar Estonii ŭskłaŭ da mahiły vianok ad imia ŭradu, cudoŭna viedajučy, što heta vykliča ŭ apanenta jašče bolšaje razdražnieńnie.

Apanent — Rasieja.

Ja nie mahu padtrymać tyja matyvy, jakimi, na moj pahlad, kiravaŭsia estonski ŭrad, pastanaŭlajučy pra heta samaje niaščasnaje pierazachavańnie pareštkaŭ sałdataŭ. Adpačatku było zrazumieła, jak mienavita rasiejskamoŭnaje nasielnictva Estonii, a taksama rasiejskija medyi, čyimi vusnami viaščała da peŭnaha momantu rasiejskaje kiraŭnictva, buduć traktavać henyja padziei. Ale pryniaŭšy hetaje niasłušnaje, niasvoječasovaje, palityčna vybuchovaje rašeńnie, dalej urad Estonii pavodziŭ siabie karektna.

Pomnik pieranieśli na mohiłki biez paškodžańniaŭ.

Prach ekshumavali ŭ strohaj adpaviednaści zakanadaŭstvu i pieranieśli bieź jakoha‑kolviek hańbavańnia.

8 traŭnia, jak i abiacali, hałava ŭradu ŭskłaŭ da manumenta vianok.

Ja maju pretenzii da matyvaŭ, ale nia maju pretenzijaŭ da dziejańniaŭ.

Palityčnaje hłupstva było vykanana absalutna kulturna. Kali nie ličyć pahromaŭ kramaŭ, pabitych demanstrantaŭ (biełaruskaha AMAPu na ich nie było), paralizavanaha estonskaha pasolstva ŭ Maskvie. I trupa rasiejca.

Apošniaje — padzieja vyklučnaja. Jak raspaviadajuć — znoŭ‑taki, rasiejskija — srodki masavaj infarmacyi, jon braŭ udzieł u akcyjach pratestu i zahinuŭ. Estonskija srodki masavaj infarmacyi, vierahodna, niešta i kažuć, ale my nia viedajem ichnaj movy, nia čuli, u bolšaści vypadkaŭ, pra ichnaje isnavańnie, a sama Estonija zajmaje ŭ našaj śviadomaści nastolki niaznačnaje miesca, što kali niešta i čuli, dyk — zabylisia.

Ale ž pra zabitaha zabycca trudna. Niemahčyma. I Rasieja, vusnami svaich dyplamataŭ i žurnalistaŭ, praciahvaje pra heta nahadvać.

Viadoma ž, jana tut daje rady našmat lepiej, čym Estonija. Jak toj kazaŭ, chto na što vučyŭsia. I chto čaho vučyŭsia.

Rasieja vyvučyłasia asnovaŭ prapahandy i ahitacyi.

Estonija — asnovaŭ ekanomiki.

Tamu estonski ŭrad adkazaŭ prosta. U toj samy dzień, 8 traŭnia 2007 h., premjer‑ministar Estonii admoviŭsia sustrecca z byłym kancleram Niamieččyny Hierhardam Šroderam. Vielmi mocny ŭdar.

Nie pa Niamieččynie ŭdar. Pa Rasiei. Tamu što sp.Šroder užo daŭno nia siabar «suśvietnaha Palitbiuro», zatoje značycca na słužbie ŭ rasiejska‑niamieckim hazatranspartnym pradpryjemstvie.

Abmiarkoŭvać rasiejski słužboŭca sp.Šroder, treba mierkavać, mieŭsia pytańni budaŭnictva hazapravodu pa terytaryjalnych vodach, što kantralujucca Estonijaj. Ź im nie zachacieli razmaŭlać.

Nie tamu, što Šroder — čałaviek niepryjemny. Nie. Naadvarot, pryjemny va ŭsich adnosinach, jak prasłavutaja hohaleŭskaja dama. Ale jon značycca na słužbie ŭ rasiejskim SP (taki ŭ jaho status ciapier). A z Rasiejaj hutarka asablivaja. Vy, spadarovie, patrabavali bajkotu estonskich šprotaŭ? Bajkatujcie. Adkaz maje zakranuć vašyja ekanamičnyja intaresy.

Asabistyja intaresy sp.Pucina. Tamu što mała chto mieŭ sumnievy, što jon sydzie ŭ toj samy kansorcyjum, što i jahony niamiecki siabra i niedzie navat paplečnik — adrazu pa zakančeńni prezydenckaha terminu. I ŭ hetaj jakaści jany buduć pa‑raniejšamu kiravać Eŭropaj — praz ventyl na hazavaj trubie.

Abodvuch pastavili na miesca. Idealahičnaj vajnie procipastavili vajnu ekanamičnuju. Davajcie, pachavajem usich sałdataŭ, a potym i budziem razmaŭlać.

U rasiejska‑estonskaj vajnie zahinuŭ usiaho adzin čałaviek — hety samy Dźmitry H.? Dziakavać Bohu, što tolki adzin. Voś, davajcie, jaho pachavajem. Vyjaśnim, ci byŭ jon palityčnaj achviaraj varjackaj neafašystoŭskaj palityki estonskaha ŭradu ci vałancioram, jaki vyrašyŭ pad šumok paŭdzielničać u pahromie kramaŭ. A z Hierhardam Šroderam sustreniemsia paźniej — niama kudy śpiašacca.

Ukraina i Biełaruś musiać ahułam zakupić usie estonskija šproty na piać hadoŭ upierad. Z pačućcia ŭdziačnaści. Čym bolej nia budzie pracavać paŭnočnaeŭrapiekjski hazapravod, tym praściej žyć hetym manapalistam tranzytnaha biznesu. Jość čym tarhavacca z Rasiejaj.

Sama ž Rasieja ŭ takoj sytuacyi vyhladaje jak mała hodny pierajemnik Savieckaha Sajuzu. Va ŭmovach, kali ŭ SSSR isnavaŭ idealahičny stryžań systemy — taja samaja kamunistyčnaja idealohija — usie kontraprapahandysckija vojny mieli sens. Ciapier kamunistyčny Sajuz raspaŭsia. Rasieju pryniali — dziakavać Harbačovu i Jelcynu — u šerahi cyvilizavanych zvyšdziaržavaŭ. Jana ž pavodzić siabie nia prosta niedarečna — na škodu ŭłasnym finansavym i hieapalityčnym intaresam. Ci vy možacie ŭjavić słana, jaki breša na mośku? Voś heta Rasieja pierad Estonijaj. Mabyć, jany hetaha nie chacieli, ale — tak vyjšła.

Vyjšła tamu, što sami rasiejskija kiraŭniki vyrašyli pieranieści ŭsiu nakoplenuju stomu ad adnosinaŭ z zachodnimi pratnerami na maleńkuju bałtyjskuju krainu. Ciažka pavodzić siabie ŭvieś čas prystojna, treba ŭžo i nohi na stoł vyciahnuć. Maŭlaŭ, kab nie svarycca z Amerykaj ci Vialikabrytanijaj, adciahniemsia na Estonii! «Nie pačuli» adnaho «niuansu»: havorka adpačatna išła nie pra ZNOS pomnika zahibłym savieckim sałdatam, a pra jahony PIERANOS. Pra cyvilizavanuju praceduru.

Dyk i pavodźcie siabie cyvilizavana.

Nie zachacieli. Śviadoma — nie zachacieli.

Voś vam.

Ale ž nijaki Brusel nie prymusić hałavu ŭradu suverennaj Estonii sustrakacca sa słužboŭcami rasiejska‑niamieckich SP. Navat kali ich budzie lehijon. Navat kali kožnaha ź ich buduć zvać nia toje što Šroderam — Pucinym! Navat kali ŭsia Eŭropa budzie pakutavać na niastaču rasiejskaha hazu. Ničoha — adpakutujuć! Nie ŭ Sibiry, badaj, žyvuć!

Usia hetaja rasiejskaja histeryja vyhladała niahiehła i navat śmiešna. Pieršy vice‑premjer, ministar zamiežnych spravaŭ, mer stalicy, śpikiery abiedźviuch pałat parlamentu vystupajuć pa televizii — pra što?!

Ciapier nie zahavoryš pra intaresy «Hazpromu». Hetaha ŭžo psychika siaredniestatystyčnaha rasiejca nie pieraniasie. Heta budzie vyhladać jak sproba naładzić dyjaloh z tymi, kaho «našysty» mienavali «fašystami» i čyju kilku admaŭlajecca spažyvać Jury Łužkoŭ z pryncypovych mierkavańniaŭ. To bok, sami ž sabie na chvoś zmušanyja buduć nastupić.

Voj, vielika Fiedora, da dura...

Nie, peŭnie, Łukašenka musić zaprasić svajho estonskaha kalehu na kubačak harbaty z kiliškam «Staroha Talina». Choć hetaha Rasieja i zusim nie stryvaje.

• 0
• 0
• 0
• 0
• 0
• 0
• 0
• 0