Na haradzienskim piŭzavodzie značna źniziłasia vytvorčaść. Kančatkovaha rašeńnia ŭłaśnika — «Abłcharčpramu» — jašče niama, ale dla ŭładaŭ pytańnie praktyčna vyrašana: stary piŭzavod zakryjuć.
Plusy i minusy haradzienskaha piva
U centry horadu ja ź ciažkaściu adšukaŭ u kramie dźvie plastykavyja butli ź miascovym pivam, a jašče niadaŭna ŭłady stvarali ŭ Horadni pieraškody navat dla «lidzkaha», i cełyja chaładzilnyja šafy byli naładavanyja haradzienskim pivam. Jano, ułasna kažučy, nia vytrymała kankurencyi, chacia zavod isnuje z 1877 hodu. My pacikavilisia ŭ jaho dyrektara Andreja Łosieva: ci vypuskajecca siońnia piva, ci nie?
«Pakul nie mahu skazać ni tak, ni nie, — adkazvaje Łosieŭ. — Tamu što skažuć vypuskać — vypuskaju, a skažuć nie vypuskać — nie vypuskaju. Tak što heta nievialikaja kamercyjnaja navat, moža być, tajamnica».
U čym ža minusy haradzienskaha piva? Andrej Łosieŭ pryznajecca:
«U kožnaha svaje tradycyi, u kožnaha svaje plusy i minusy — u kožnaha tavaru. My vypuskajem absalutna naturalny pradukt, biez kanservantaŭ. Adziny minus, vielmi vialiki minus, što robić dla handlu niavyhadnym naš pradukt — terminy realizacyi. Naš pradukt treba ciaham miesiacu pradać, praź miesiac piva vypadaje ŭ asadak».
Ci praŭda, što ŭ Horadni mahčymy vyrab českaha piva?
Namieśnik kiraŭnika administracyi SEZ «Hrodna‑invest» Alaksandar Panamaroŭ paviedamiŭ, što adbyvajecca pošuk novych sučasnych technalohij i abstalavańnia, kab pradukavać na budučym zavodzie dva miljony dekalitraŭ piva za hod.
«Razhladajucca try varyjanty: poŭnaściu ź biudžetu budzie pabudavany novy zavod i my kupim novyja technalohii, druhi varyjant — sumiesnaje pradpryjemstva, treci varyjant razhladajecca taksama, pavodle jaho budzie zamiežnaje pradpryjemstva», — raskazvaje Panamaroŭ.
«Ci praŭda, što ŭ Horadni mahčymy vyrab českaha piva?» — pacikavilisia my ŭ spadara Panamarova.
Panamaroŭ: «Moža być českaha, moža być hiermanskaha, my razmaŭlajem i z českimi, i z hiermanskimi, navat švedzkija, dackija firmy jość užo. Nam treba nia prosta vyrablać piva, a piva dobraj jakaści, jakoje budzie pradavacca, budzie rentabelnym».
Što datyčyć pracaŭnikoŭ ciapierašniaha piŭzavodu, a ich kala sta čałaviek, dyk jany atrymajuć pracu na novym pradpryjemstvie, zapeŭniŭ namieśnik kiraŭnika administracyi SEZ «Hrodna‑invest» Alaksandar Panamaroŭ.
Haradzienskija ŭłady zaśpiašalisia z zakryćciom piŭzavodu tamu, što jon staić na bierazie Niomana kala samaha Staroha mostu, jaki jany źbirajucca zakryć na rekanstrukcyju. Asnoŭny budynak piŭzavodu znachodzicca ŭ byłym pałacy Sapiehaŭ, jaki na pałac daŭno nie padobny. U śpisie pomnikaŭ jaho niama, i što ź im budzie — pakul nieviadoma.
Ciapier čytajuć
Jak skłaŭsia los internacyjanalnych dziaciej, jakich vychoŭvali ŭ Žodzinie ŭ pieršym u Biełarusi dziciačym domie siamiejnaha typu?5
Kamientary