U Miensku stvorana hramadzkaja kamisija pa reabilitacyi achviar režymu

16 maja 2007 hoda ŭ Minsku ŭ ofisie Partyi BNF adbyłosia pasiadžeńnie rabočaj hrupy pa stvareńni arhkamiteta pa farmiravańni hramadskaj kamisii pa reabilitacyi achviar režymu.

«Hetaja hramadskaja inicyjatyva vyklikana nieabchodnaściu pryniaćcia efiektyŭnaj sistemy mier supraćdziejańnia represijam praviačaha režymu ŭ dačynieńni da svaich apanientaŭ», — paviedamiŭ BiełaPAN adzin z zasnavalnikaŭ arhkamiteta, juryst Ihar Rynkievič.

Na pasiadžeńni prysutničali viadomyja pravaabaroncy Hary Pahaniajła, Aleh Vołčak, Zinaida Hančar, Iryna Toŭścik. Inicyjatyva stvareńnia hramadskaj kamisii była padtrymana Irynaj Krasoŭskaj i inšymi jurystami, palitykami i hramadskimi aktyvistami Biełarusi.

Pasiadžeńnie prajšło ŭ formie kruhłaha stała, udzielniki jakoha pryznali, što prablema reabilitacyi palityčna represavanych u sučasnaj Biełarusi źjaŭlajecca adnoj z važnych i składanych dla realizacyi. Pad reabilitacyjaj represavanych udzielniki pasiadžeńnia padrazumiavali pierš za ŭsio pryznańnie va ŭstanoŭlenym zakonam paradku nievinavataści hramadzian, pryciahnutych biez dastatkovych padstaŭ za svaje pierakanańni i hramadskuju dziejnaść da kryminalnaj adkaznaści (uklučajučy nie tolki nieabhruntavana asudžanych, ale i niepravamierna zatrymanych), z nastupnaj kampiensacyjaj im škody i adnaŭleńniem ich u pravach.

Asablivaja ŭvaha budzie nadavacca realizacyi pravoŭ achviar na spraviadlivaje pravasudździe i najchutčejšuju kampiensacyju naniesienaha im ŭronu.

Udzielniki abmierkavańnia vykazali šerah praktyčnych prapanoŭ, jakija pavinny pryvieści da stvareńnia arhkamiteta i nadalej da raboty hramadskaj kamisii pa reabilitacyi palityčna represavanych u Biełarusi.

Na dumku jurysta, pravaabaroncy Hary Pahaniajły, aptymalny šlach raźvićcia hetaj inicyjatyvy, kali b jaje taksama padtrymali abjadnanyja demakratyčnyja siły, u asablivaści partyi. Uładzimir Ramanoŭski, pradstaŭnik kamiteta abarony pravoŭ achviar stalinskich represij, ukazaŭ na važnaść padrychtoŭki adzinaj zakanadaŭčaj bazy pa reabilitacyi biełaruskich hramadzian, palityčna represavanych jak u savieckija časy, tak i ciapier.

Jak paviedamiŭ I.Rynkievič, kali zaraz padrychtavać reabilitacyju niezakonna represavanych hramadskich aktyvistaŭ, vyznačyć miežy adkaznaści dla addańnia pad sud asob, jakija majuć dačynieńnie da hrubych parušeńniaŭ pravoŭ i svabod biełaruskich hramadzian, to možna adnavić davier da sistemy pravasudździa i harantavać vykanańnie pravoŭ čałavieka ŭ budučaj svabodnaj Biełarusi.

Hramadskaja inicyjatyva, adznačyli jaje stvaralniki, nie patrabuje rehistracyi, pakolki nie maje fiksavanaha členstva, arhanizacyjnych struktur, rachunkaŭ u banku, heta značyć nie źjaŭlajecca jurydyčnaj asobaj. Jak zajaviŭ I.Rynkievič, hetaja inicyjatyva nosić adkryty charaktar, jaje ŭdzielniki hatovy da supracoŭnictva z usimi ajčynnymi i zamiežnymi pravaznaŭcami, palityčnymi dziejačami i pravaabaroncami.

• 0
• 0
• 0
• 0
• 0
• 0
• 0
• 0