Naviny

 Naviny

Dajarki ledź nie zahinuli pad zavałami

Na małočna-tavarnaj fermie ŭ vioscy Vyviery, što na Maładečanščynie, nie paśpieli dajarki ranicaj pryjści na pracu, jak na ich abvaliŭsia dach i cahlanaja pieraharodka. Pad abvał trapili dźvie dajarki, jakija ź ciažkimi traŭmami apynulisia ŭ bolnicy. Ferma była pabudavanaja 25 hod tamu.

M.V.

 Kantralory j chimiki

Dziaržkantrol pravieryŭ mahiloŭskaje «Chimvałakno» i vyjaviŭ šalonyja niepłaciažy ŭ biudžet. Nibyta chimiki staili 636 młn. novych rub., kala 860 tys. dalaraŭ, bolš za 900 tys. rasiejskich rubloŭ i amal 130 tys. niamieckich marak. Na abjadnańni kažuć, što kali hetyja hrošy spłociać, pradpryjemstva laśniecca.

Skrali 30 km drotu

U Krasnapolli kraduć, jak biaruć. Rajon možna śmieła zanosić u knihu rekordaŭ Hinesa. Ź linii elektrapieradačy pamiž vioskami Sabali j Paleśsie źniali i źniesli až 30 km aluminievaha drotu. Nieviadoma, chto i kali.

Čmara nia sknara

Sudździa Čmara, jakaja zasudziła Vasila Staravojtava, a potym sudziłasia z «Biełorusskoj diełovoj hazietoj» i dabiłasia ad jaje 100 miljonaŭ rubloŭ za maralnyja straty ad artykułu Viktara Marcinoviča, nabyła na tyja hrošy medyčnyja pryłady dla rajbolnicy ŭ svaim Kiraŭsku.

Śledčyja-amatary

Na Mahiloŭščynie 15 śledčych nia majuć jurydyčnaj adukacyi, — paviedamiŭ načalnik miascovaha śledčaha kamitetu Valer Brycikaŭ.

Symon Hłazštejn

«Vertykal» z ksiandzami havaryła

Astravieckija «vertykalščyki» sustrakalisia sa śviatarami. Pieršyja skardzilisia na haspadarčyja ciažkaści j na padletkaŭ. Druhija abaviazalisia rabić specyjalnyja imšy, za moładź.

Marjan Vianhroŭski

Abarončyja systemy

Vice-premjer rasiejskaha ŭradu pa vajenna-pramysłovym kompleksie Illa Klabanaŭ i Siarhiej Linh padpisali pahadnieńnie pra stvareńnie Miždziaržaŭnaj finansava-pramysłovaj hrupy «Abarončyja systemy».

Pahadnieńnie praduhledžvaje, što šerah abaronnych pradpryjemstvaŭ Biełarusi, u pryvatnaści, NVA «Ahat» i tankaramontnyja zavody, stanucca častkaj adzinaha hołdynhu z rasiejskaj FPH «Abaranicielnyja siściemy», jakaja abjadnoŭvaje niekalki vyrabnikoŭ zbroi i pasiarednickich kampanijaŭ. U dalejšym dapuskajecca častkovaja pryvatyzacyja MFPH i pieradača joj funkcyjaŭ hieneralnaha zamoŭcy abarončych systemaŭ (na dadzieny momant hieneralnym zamoŭcam źjaŭlajucca ministerstvy abarony Rasiei i Biełarusi). Adnak na šlachu vajaŭničaj intehracyi ŭźnikaje nievialičkaja pieraškoda: rasiejski składnik budučaha sajuznaha hołdynhu — FPH «Abaranicielnyja siściemy» de-jure bolš nie isnuje, bo jašče ŭ krasaviku 1999 h. ministerstva ekanomiki Rasiei vydała zahad na pierarehistracyju FPH u suviazi sa źmienaj składu jaje ŭdzielnikaŭ. Adnak AS tak i nie źviarnuli na heta ŭvahi, što i pryviało da farmalnaj likvidacyi hrupy. Pavodle niekatorych krynic, kali hetaja infarmacyja «ŭspłyvie na pavierchniu», hrymnie mižnarodny vajenna-pramysłovy skandał. Nie zrazumieła taksama, ci infarmavany biełaruski bok ab planach pryvatyzacyi MFPH.

Staršynia rajvykankamu abvinavačvaje «orhany» ŭ karupcyi

Ctaršynia Klimavickaha rajvykankamu Ŭładzimier Kanavałaŭ niečakana vystupiŭ z adkrytym listom u rajonnaj haziecie. Jon abviesciŭ, što niejkija «ŭpłyvovyja» klimavickija asoby cisnuć na jaho, patrabujuć, kab jon zapluščvaŭ vočy na machlarstvy i prapanoŭvajuć chabar. A jon admaŭlajecca toj chabar brać i ŭvohule nia choča mieć sa złodziejami ničoha ahulnaha. Niečakana, što Kanavałaŭ abvinavaciŭ u karumpavanaści «orhany». Maŭlaŭ, u ich šmat takich, jakija sami paturajuć złačyncam. Z Mahilova adrazu prysłali kamisiju, kab razabracca, chto kamu nie daje žyć. Ci nie ŭpieršyniu ŭ Biełarusi vertykalščyk vystupaje jak samastojnaja fihura, jakaja dziejničaje publična. Čas pakaža, u čym hetaja samastojnaść.

Symon Hłazštejn

Dzień Śv. Cepelina zabaranili

Anansavany «NN» kancert Kasi Kamockaj u TIUHu, jaki mieŭsia adbycca ŭ dzień Śviatoha Valancina, byŭ niečakana admienieny administracyjaj teatru. Vidovišča miełasia atrymacca fajnaje... Miełasia... Za tydzień da imprezy hałoŭny Karabas-Barabas junych hledačoŭ paviedamiŭ, što na paniadziełak zaplanavanaja premjera novaha spektaklu, jakuju nielha adkłaści, i tamu, biełaruskija rokiery, prabačcie... Takim čynam, Kasiny zaściarohi spraŭdzilisia: mienskaja publika iznoŭ zastałasia biez karaleŭny sceny. Adnak, Biełaruski fond «Dzieciam Čarnobyla», jaki źjaŭlajecca pramotaram vystupu, nie hublaje nadziei i aktyŭna šukaje pamiaškańnie, jakoje nia moža być eksprapryjavanaje z prychamaci administracyi.

A.Pras.