U Hłusku strajkavali

U Hłusku strajkavali

I ŭ Hłusku pradprymalniki strajkavali da 8 lutaha — jak tyja, što handlujuć na rynku, tak i ŭładalniki kamercyjnych kijoskaŭ. Strajk byŭ vielmi arhanizavany. Na ranicy hłuščanie pilnavali na ŭvachodzie ŭ rynak, kab nie dapuścić zryvu masavaj akcyi pratestu niejkimi, kali b znajšlisia takija, nieśviadomymi miascovymi j nietutejšymi handlarami. Urešcie jany dabilisia pryjomu ŭ namieśnika rajvykankamu U.Adnamacha i ŭ kiraŭnictva padatkavaj inspekcyi. Damovilisia, što ichnyja pretenzii buduć razhladacca na nastupnaj sesii rajonnaj rady deputataŭ.

Hłuskija pradprymalniki, aproč ahulnadziaržaŭnych padatkaŭ, płaciać jašče transpartny zbor (2% ad vałavaha dachodu), zbor na ŭtrymańnie balnic (1% ad vałavoha dachodu) i haradzkoj infrastruktury (2% ad vałavoha dachodu), padatak na ŭtrymańnie dziciačych ustanovaŭ (5% ad čystaha dachodu). Heta j dabivaje pryvatnikaŭ (a ich u Hłusku tolki na rynku handluje pad 30 čałaviek). Pradprymalniki nia suprać pasablać sadkam i paliklinikam, ale naŭprost, bo pry ciapierašniaj sytuacyi jany nia viedajuć, kudy hrošy iduć — ci to na dziaciej, ci to na prapahandu dy ahitacyju.

Uvohule ž, strajk pradprymalnikaŭ byŭ baraćboj nia stolki za svaje zarobki, kolki za spraviadlivaść. Jasna, što čałaviek, jaki pracuje sam na siabie, choć ty jamu pryznač padatak u 90%, znojdzie, jak zrabić tak, kab siabie nie pakryŭdzić. Ustanaŭlajučy takija padatki, pry sumlennym spłočvańni jakich prafesijnaja dziejnaść pierastaje być vyhodnaj, dziaržava šturchaje ludziej na ŭtojvańnie prybytkaŭ i abaračeńnia, na inšyja padpolnyja i machlarskija aperacyi. Tym samym ludzi staŭlajuć siabie za zakonam, pačynajuć žyć pad viečnym stracham vykryćcia. Na takich ludziej prosta źbirać kampramat, ich lohka šantažavać i trymać pad kaŭpakom. Voś što patrebnaje ŭładzie. Tak jana dziejničaje, padbirajučy ludziej na najvyšejšyja dziaržaŭnyja pasady, tuju ž systemu jana chacieła b naładzić i ŭ maštabie ŭsioj krainy. Škada.

U vyniku ciapier prava handlavać, pavodle padlikaŭ uładalnika papularnaje ŭ Hłusku kramki «Cieščyn kutok», abychodzicca ŭ 100 tysiač novych rubloŭ u miesiac pry tym, što abarot składaje kala 10 tysiač u dzień. Što majem u vyniku? Majem toje, što handlary vymušanyja padnimać ceny na toje, što pradajuć. Voś i vyjšła inflacyja ŭ studzieni pad 14% pry planie ŭ 4%.

Cikava jašče, što akcyja pradprymalnikaŭ stała adnoj ź niešmatlikich formaŭ pratestu suprać biełaruskaj rečaisnaści, jakuju nie zmahła ihnaravać navat aficyjnaja miascovaja presa. Tak, hłuskaja hazeta «Radzima» i rajonnaje radyjo pryśviacili hetamu materyjały, pryčym u ich ludzi adnaznačna kazali, što im pradprymalniki patrebnyja, bo dastaŭlajuć usio lepšaje i tańniejšaje, čym dziaržaŭnyja kramy.

Barys Tumar, Ihar Kiryn, Hłusk