Tydzień našaha žyćcia

 Tydzień našaha žyćcia

Čutki pra adstaŭki

U Miensku chodziać čutki pra adstaŭku Michaiła Miaśnikoviča, kiraŭnika administracyi Alaksandra Łukašenki, i sakratara Rady biaśpieki Viktara Šejmana. Chartyja-97 kaža navat pra sychod z uradu ministra zamiežnych spravaŭ Urała Łatypava. Ale aficyjnyja čynoŭniki ŭsio admaŭlajuć abo prosta maŭčać — maŭlaŭ, usie zaniatyja źjezdam deputataŭ savietaŭ deputataŭ.

Polšča ŭviadzie vizy

U siaredzinie 2001 hodu Polšča ŭviadzie vizy dla biełarusaŭ. Palaki kažuć, što ciažkaści z vyjezdam pačnucca tolki dla nielehałaŭ. Biełarusy sprabujuć prabić dazvoł na biaźvizavy režym dla asobnych katehoryjaŭ hramadzian dy siakija-takija inšyja ilhoty, bo pra ŭstupleńnie Biełarusi ŭ Šenhienski sajuz razam z Polščaju kazać prosta śmiešna.

Leśnikovič

28 vieraśnia Alaksandar Łukašenka pryznačyŭ Anatola Leśnikoviča staršyniom Dziaržaŭnaha kamitetu pa navucy i technalohijach Biełarusi na źmienu Viktaru Hajsionku, jakoha pasłali ambasadaram u Aŭstryju. Łukašenka taksama pastaviŭ Barysa Chrustalova rektaram Politechničnaj akademii, a Michaiła Baturu — rektaram byłoha RTI, a ciapier Universytetu infarmatyki i radyjoelektroniki.

Prybytki dy vydatki

28 vieraśnia ministar finansaŭ Mikałaj Korbut pradstaviŭ biudžet Biełarusi na 2001 hod. Dachodnaja častka składzie 5,7 tryljony rub. Na 81,2% jana składajecca z padatkaŭ. Vydatkavać zaplanavana krychu bolš — 5,9 tryljony rub. Patraciać najbolš na abaronu — 153,3 młrd. rub.; na pravaachoŭnuju dziejnaść (to bo milicyju i KDB, nia błytać z achovaj pravoŭ čałavieka) — 316,7 młrd.; na achovu zdaroŭja, fizkulturu i sport — 853,5 młrd.; adukacyju — 918,7 młrd.; navuku — 84,4 młrd.; sielskuju haspadarku — 577,4 młrd. 97,8 młrd. puściać na mižnarodnuju dziejnaść.

Naftavaje pahadnieńnie

27 vieraśnia biełaruski ŭrad dy biełaruska-rasiejskaja naftahazavaja kampanija “Słaŭnafta” pahadzilisia pradoŭžyć rekanstrukcyju Mazyrskaha naftapierapracoŭčaha zavodu. Uvieś prajekt kaštuje 120 młn. dalaraŭ, a da kanca hetaha hodu “Słaŭnafta” ŭžo daść 10 miljonaŭ. Ščodryja kampańjony Łukašenki prapanujuć sumiesna zdabyvać naftu ŭ Zachodniaj Sibiry, a taksama razam pradavać paliva biełaruskim spažyŭcam praź sietku sumiesnych zapravak.

Benzyn padaražeŭ

26 vieraśnia na 10% padvysili košty na naftapradukty. Čaćvierty raz za miesiac. Zaraz vyhodniej zapraŭlacca ŭ susiednich krainach — biełaruskija košty ci nie ŭ 1,5 raza vyšejšyja za ŭkrainskija dy rasiejskija.

Niemaŭla zabłudziła ŭ lesie

26 vieraśnia ŭ lesie kala vioski Žytlin Ivacevickaha rajona Bresckaj vobłaści narešcie adšukali dzicia, jakoje zhubiŭ u huščary niadbajny baćka. Dzicionka, jakomu krychu bolej za hodzik, šukali blizu troch sutak. 29 vieraśnia jaho pieraviali z reanimacyi ŭ dziciačaje adździaleńnie Ivacevickaj rajbolnicy. Daktary dziviacca, jak małoje pieraniesła hetkaje vyprabavańnie.

Śmierć pad burakami

28 vieraśnia 23-hadovy palavod kałhasa “40 hadoŭ Kastryčnika” Ihar U. zrabiŭsia achviaraju ŭboračnaj kampanii. Jon vyvaliŭsia ŭ vakno traktara MTZ-952 dy trapiŭ pad koły pryčepu, paŭniutkaha cukrovych burakoŭ. Śledztva miarkuje, što pryčyna ŭsiamu — alkahol, znojdzieny ŭ kryvi palavoda dy kiroŭcy traktara Vasila Ł., jaki zaraz moža trapić u turmu na dziesiać hadoŭ. A moža, nia varta było prymušać ludziej pracavać kruhłasutačna (trahiedyja adbyłasia a 4-j ranicy)?

Vystava ŭ Iviency

28 vieraśnia ŭ Iviency, što la Nalibockaj puščy, u muzei F.Dziaržynskaha adčynili vystavu draŭlanaj skulptury «Sustreča» mienskaha raźbiara Valerja Kalasinskaha. Sp.Kalasinski — aŭtar biusta karala Ściapana Batury, što ciapier znachodzicca ŭ Farnym kaściole ŭ Horadni. Praciahniecca vystava da kanca listapada.

Z Novym hodam, žydy!

Uviečary 29 vieraśnia biełaruskija žydy sustreli novy 5761 hod ad stvareńnia śvietu. 28 tys. našych žydoŭ vitaŭ Jury Dorn, prezydent Judziejskaha relihijnaha abjadnańnia ŭ Biełarusi. Žydy vierać, što ŭ Novy hod usie ludzi stajać pierad sudom Usiavyšniaha, jaki vyrašaje, što adbudziecca ŭ žyćci kožnaha ź ich. Śviatkavali nia tolki ŭ siemjach, ale i ŭ 18 synahohach, raskidanych pa ŭsim krai.

Pavodle paviedamleńniaŭ BiełaPAN

Niaklajeŭ pierabyvaje ŭ Miensku

U Miensku źjaviŭsia staršynia Sajuzu biełaruskich piśmieńnikaŭ Uładzimier Niaklajeŭ, jaki pravioŭ apošni hod u Polščy i Finlandyi. Viarnuŭsia jon, kab vyrašyć peŭnyja pryvatnyja prablemy z pašpartam. Uik-end jon pravioŭ u Rakavie, na Isłačy.

B.T.