Čym strašnyja steroidy

Čym strašnyja steroidy

Steroidy — hrupa chimičnych złučeńniaŭ. Viadomyja try vidy steroidaŭ:

1) “kortykasteroidy” (jany jość u kremach i maziach dla skury);

2) žanočyja pałavyja harmony (užyvajucca ŭ supraćzačatkavych preparatach);

3) mužčynskija pałavyja harmony, bolš viadomyja pad nazovam anabaličnych steroidaŭ (ci prosta anabolikaŭ). Hałoŭnaja ŭłaścivaść anabaličnych steroidaŭ — zdolnaść padtrymlivać pryrost muskulnaj tkanki, za što ich vielmi ceniać spartoŭcy.

Šmat chto z spartoŭcaŭ ličyć, što svaimi dasiahnieńniami jon musić być udziačny tolki ŭžyvańniu steroidaŭ.

Najchutčej vyvodziacca z arhanizmu ślady ŭžyvańnia aralnych steroidaŭ. Spartoŭcy časta źviartajucca mienavita da ich (kab lahčej praminuć dopinh-kantrol), choć takija preparaty vielmi kiepska ŭździejničajuć na piačonku. Injekcyjnyja steroidy ŭvodziacca praz špryc u ciahlicu, a nia ŭ vienu. Na chimičnym ŭzroŭni jany zasvojvajucca lepiej, čym aralnyja anaboliki, tamu im addajuć pieravahu tyja, chto karystajecca steroidami praciahły čas. Adnak injekcyjnyja anaboliki abminajuć naturalnyja abarončyja mechanizmy čałavieka, i “pieradoz” tut moža być vielmi niebiaśpiečny.

Cykł steroidnaj “zahruzki” doŭžycca ad 4 da 18 tydniaŭ, a potym pierapyniajecca na termin ad miesiaca da hodu. Dozy, jakija spartoŭcy ŭžyvajuć ciapier, u siarednim na tracinu bolšyja za tyja, što ŭžyvalisia ŭ 1960—70-ch. Zrešty, navukovych dośledaŭ u hetaj sfery nichto nie viadzie i paradaŭ nakont pravilnych dozaŭ i cykłaŭ dać nia moža. Pieravažnaja balšynia anabolikaŭ nabyvajecca nielehalna, što spryjaje pašyreńniu roznych padrobak. Počastu vykarystoŭvajucca veterynarnyja steroidy. Upłyŭ na arhanizm čałavieka preparataŭ, raspracavanych dla žyviołaŭ, pradkazać składana, bo jaho nichto nie daśledavaŭ.

Padrobnyja anaboliki vyrablajuć u padpolnych labaratoryjach. Vyhladajuć preparaty jak sapraŭdnyja, ale aktyŭnyja elementy ŭ ich mohuć być inšymi ci nie ŭ takich suadnosinach. Preparaty dla injekcyjaŭ, da taho ž, mohuć naahuł być niesterylnymi.

Na padletkaŭ u stadyi połavaha vyśpiavańnia anaboliki ŭździejničajuć asabliva mocna. Spyniajecca rost kostak, mohuć vypaści vałasy (pryčym, pavodle adnych źviestak, paśla taho jak pryjom anabolikaŭ spyniajecca, rost vałasoŭ adnaŭlajecca; inšyja kažuć, što praces niezvarotny). Doŭhaje ŭžyvańnie anabolikaŭ vyklikaje ŭ mužčynaŭ połavuju sterylnaść (adnaŭleńnie funkcyjaŭ arhanizmu adbyvajecca tolki praz paŭhodu paśla spynieńnia pryjomu steroidaŭ).

Adna z asnoŭnych “mišeniaŭ” anabolikaŭ — piačonka. Ci adnaŭlajecca paškodžanaja tkanka piačonki paśla admovy ad preparataŭ — nieviadoma. U vyniku atručańnia piačonki steroidami (asabliva aralnymi) u joj mohuć utvaracca połaści, zapoŭnienyja kryvioj.

Vialikija dozy anabolikaŭ źnižajuć uzrovień imunahlabulinaŭ A, G i M u kryvi, što pavialičvaje ryzyku raźvićcia surjoznych infekcyjaŭ.

Vykarystańnie niesterylnych šprycaŭ u časie injekcyjaŭ steroidaŭ moža vyklikać hiepatyt, a to j ŚNID. Dakumentalna zafiksavanyja prynamsi dva vypadki zaražeńnia ŚNIDam praz šprycy ŭ spartzalach.

Anaboliki źmianiajuć sardečnuju ciahlicu hetak sama, jak i han serca: jahonyja tkanki razrastajucca chutčej, čym nieabchodnyja kryvianosnyja sasudy. U vyniku sardečnyja tkanki kiepska zabiaśpiečvajucca kryvioju i admirajuć. Heta moža vyklikać raptoŭnuju śmierć ad sardečnaha prystupu. Aproč taho, ad anabolikaŭ ćviardziejuć ścienki kryvianosnych sasudaŭ, što moža vyklikać źjaŭleńnie trombaŭ.

Steroidy vyklikajuć pryzvyčajeńnie, i balšynia sprobaŭ “zaviazać” skančajecca ničym. Šmat času i siłaŭ pryśviačajecca pošuku harmonaŭ, karystańniu imi ci adnaŭleńniu paśla čarhovaha cykłu. Ci nia duža heta nahadvaje narkatyčnuju zaležnaść?

Užyvańnie anabaličnych steroidaŭ maje nia tolki fizijalahičnyja, ale i psychalahičnyja nastupstvy. Dla čałavieka, jaki złoŭžyvaje steroidami, charakternyja rezkija skački nastroju — ad eŭfaryi da suicydalnych schilnaściaŭ. Vialikija dozy mohuć vyklikać źmieny ŭ pavodzinach čałavieka. Źjaŭlajucca schilnaści, padobnyja da tych, što raźvivajucca ŭ alkaholikaŭ: častaje razdražnieńnie, žadańnie svarycca, kryčać na kahości, kidacca pradmietami, nieabchodnaść niekaha źbić, skalečyć.

Arkadź Šanski