Z usioj krainy

Z usioj krainy

Karovy trapili pad ciahnik

Vosiem karoŭ, jakija vybiehli na čyhunku miž pierajezdami Nasiłava i Asanava Maładečanskaha rajonu, byli źbityja pasažyrskim ciahnikom “Kalinihrad—Maskva”. Pry hetym adna zastałasia lažać na rejkach, zrabiŭšy niemahčymym dalejšy ruch ciahnikoŭ pa hetaj linii. Jon adnaviŭsia tolki praz paŭhadziny. Niaščasnyja žyvioliny paciarpieli, bo razarvaŭsia “elektrapastuch”.

BiełaPAN

Śmierć taksista

Sotnia słuckich taksoŭščykaŭ jechali za katafałkam z trunoj svajho kalehi. Śmierć napatkała 24-hadovaha Ł. apoŭnačy, kali jaho vyklikali pa mabilnym telefonie i paprasili advieźci ŭ pryharadnuju viosku Klapčany, ab čym jon paśpieŭ paviedamić svajmu dyspetčaru. Ł. znajšli ranicaj u lasku pamiž Navadvorcami j Klapčanami ŭ svajoj mašynie z trynaccaćciu nažavymi ranami kala serca. Zabojcy nie kranuli ni mahnitafonu, ni ścipłaha zarobku kiroŭcy. Padobnaje zabojstva taksoŭščyka było ŭčyniena hod tamu pablizu vioski Jačava i zastałosia nieraskrytym. Pa fakcie novaha prakuratura ŭzbudziła kryminalnuju spravu. Paśla Ł. zastałasia siamja.

Razabraŭ vahon

Miascovy žychar B. zalez pad hruzavy vahon, što stajaŭ na čyhunačnaj stancyi Słucak, dy adkruciŭ dźvie mahistralnyja detali pavietraraźmierkavalnikaŭ tarmaznoj systemy. Ich adsutnaść padčas ruchu sastavu mieła b trahičnyja vyniki. 8-kilahramovyja detali złodziej źbiraŭsia zdać u pryjomnik kalarovych metałaŭ, ale byŭ zatrymany supracoŭnikami milicyi. Kaštujuć skradzienyja detali 460 tys. rubloŭ.

Michaś Kutniaviecki, Słucak

Pachavańnie strały

13 červienia ŭ Janavie, Staŭbunie, Pieraloŭcy, Niehlubcy, Butramiejeŭcy, Kazackich Bałsunach i inšych vioskach Vietkaŭščyny j Čačerščyny možna pabačyć trajecki abrad Pachavańnia strały. Tam, pryblizna za 400 km ad Miensku, jon zachavaŭsia ŭ niekranutym vyhladzie da našych dzion. Pra hety staražytny biełaruski karnavał viedajuć falklarysty ŭsioj Eŭropy. U hety dzień na Paleśsie vypraviłasia ekspedycyja amataraŭ etniki ź Miensku — pavučycca rytualnych pieśniaŭ, karahodaŭ i “kryvych tankoŭ”, pabačyć sam abrad.

Alaksiej Frałoŭ

Rekanstrukcyja rynku

U Voršy adčyniŭsia pieršy mini-parkinh. Jon pabudavany na haradzkim rynku, jaki apošnim časam pieražyvaje karennuju rekanstrukcyju. Pryvabny vyhlad nabyvaje rynkavaja płošča, dzie mieścičy miasili brud u pošukach patrebnaha tavaru ledź z XIV st.

Niemcy ŭ kałhasie

Niamieckaja firma “Štotc” arandavała na 50 hadoŭ 400 ha ziamli ŭ kałhasie imia Čapajeva (Aršanski rajon). Niemcy planujuć vykupić majomaść kałhasu dy ŭkłaści ŭ jaho investycyi. Skaračeńniaŭ pakul nie planujecca, ale pjanicam dy hultajam u sumiesnym pradpryjemstvie miesca nia budzie. Zatoje kałhaśnikam harantujecca štomiesiačny zarobak biez zatrymak, a pensijaneram — sacyjalnaja padtrymka. Ziamlu ŭrablać u haspadarcy ciapier buduć pa sučasnych technalohijach na niamieckaj technicy. Jaje prasoŭvańnie na biełaruski rynak i źjaŭlajecca hałoŭnaj metaj inšaziemcaŭ.

Viktar Lutynski, Vorša

Nastaŭnikaŭ skaračajuć

Da 1 vieraśnia ŭ systemie adukacyi Mahiloŭščyny zvolniać 4,5 tys. čałaviek. Pakul z usich rajonaŭ tolki ŭ Hłusku j Drybinie adoleli planavy rubiež — 10% skaračeńnia pedahahičnych kadraŭ. Drybincy až pierastaralisia, pakinuŭšy biez raboty 22% ad ahulnaj kolkaści pedahohaŭ i techničnych rabotnikaŭ.

“Leninski šlach”

Prypiski ŭ BPSM

Zavyšeńnie kolkaści pieršasnych arhanizacyjaŭ BPSM i ichnych čalcoŭ vyjaviŭ kamitet dziaržkantrolu padčas pravierki mahiloŭskaha BPSM. Tak, u Centralnym rajonie Mahilova raźbiežka pamiž “papiarovymi” j realnymi siabrami arhanizacyi składaje 1336 čałaviek (1940 i 604). U Leninskim rajonie — 974 (1974 i 1000). U Kastryčnickim — 431 (1954 i 523 čałavieki).

Jašče pravierka vyjaviła, što pieršy sakratar Mahiloŭskaha abkamu BPSM płaciŭ sabie premii (navat ekanomiačy na apłacie pracy rabotnikaŭ aparatu), pamier jakich dachodziŭ da 219% ad zarobku. Ahułam zarobak “pieršaha” z usimi nadbaŭkami siahaŭ sioleta ŭ studzieni 580000 rubloŭ.

Pakroŭski

Strajki ŭ Drybinie

U kałhasie “Drybinski” znoŭ bastujuć. Kałhaśniki dabivajucca vypłaty hrošaj, zaroblenych u časie siaŭby.

Siarhiej Murzin, Drybin

Seks pa babulinym telefonie

Žycharka vioski Ołtuš Małaryckaha rajonu ledź nie zhubiła prytomnaść, daznaŭšysia, što musić zapłacić za telefon 624 tysiačy rubloŭ. Jak vyśvietliłasia, nahavaryŭ hetulki jejny ŭnuk, što karystaŭsia praz babulin aparat pasłuhami “seks pa telefonie”. Hrošy z pensyjanerki buduć spahnanyja praz sud.

I.Chviedarovič, Bieraście