Pravy čałavieka
Dyk budzie klasa ci nie?
Kastuś Kašel, žychar mienskaha mikrarajonu Malinaŭka, źviarnuŭsia z adkrytym listom da ministra adukacyi Piatra Bryhadzina. Cp.Kašel choča, kab jahonaje dzicia vučyłasia ŭ biełaruskaj klasie. Jon sabraŭ zajavy baćkoŭ 16 budučych pieršaklaśnikaŭ, kab stvaryć jaje ŭ škole №218. Ale na baćkoŭskim schodzie zavuč małodšych klasaŭ Łarysa Novikava adhavaryła pałovu baćkoŭ.
Kastuś Kašel užo nia pieršy raz źviartajecca ŭ struktury adukacyi ŭ spravie stvareńnia biełaruskaj klasy. Adnak adkazy z hetych strukturaŭ jaho krajnie dziviać: rajonny adździeł adukacyi adkazaŭ, što biełaruskaja škoła ŭ rajonie budzie abaviazkova, a haradzki — što heta mahčyma tolki pry najaŭnaści 25 vučniaŭ u klasie. Ale ŭparty baćka nie źbirajecca zdavacca. Kopiju svajho lista jon źbirajecca nakiravać u siadzibu JUNESKA ŭ Paryžy.
Za alimentščyka adkažaš!
Aktyvist ruchu “Zubr” Alaksiej Šydłoŭski padaŭ u sud na hazetu “Sovietskaja Biełoruśsija” i jejnaha redaktara Paŭła Jakuboviča. Pryčyna — artykuł apošniaha “Umom tronutoje lico” (“SB” ad 8 traŭnia), u jakim było napisana, što Šydłoŭski trapiŭ u turmu, bo nie płaciŭ alimentaŭ.
Šydłoŭski sabraŭ materyjały taho pracesu, daviedki pra adsutnaść dziaciej i žonki dy adnios u sud Savieckaha rajonu. U svaim pazovie jon patrabuje publikacyi abviaržeńnia, a taksama materyjalnaj kampensacyi za maralny ŭron: pa 6 młn. rubloŭ ad Paŭła Jakuboviča asabista i ad “Sovietskoj Biełoruśsii”. Šydłoŭski spadziajecca vyjhrać praces. “Raz ja nia byŭ žanaty, dyk Jakuboviču tut nijak nie adkrucicca”, — miarkuje jon. Juryst Uładź Łabkovič taksama aceńvaje jahonyja šancy ŭ 99%. Adzinaje, što moža čakać “zubra”, — źmianšeńnie pamieraŭ materyjalnaj kampensacyi.
A.V.
Kamientary