Z usioj krainy

Z usioj krainy

Hvałtaūnik papaūsia

U vioscy Aharevičy Hancavickaha rajonu zatrymany mańjak. Nočču jon napaū na dziaūčynu kala jaje chaty, kali taja viartałasia dadomu. Schapiū za šyju, ale jana zdoleła zakryčać. Brat dziaūčyny pačuū lamant i vyskačyū na dapamohu. Hvałtaūnik udaryū dziaūčynu nažom u hrudzi j kinuūsia naūcioki.

Brat zdoleū dahnać mańjaka, źbić z noh i zatrymać. Paśla była vyklikanaja milicyja j chutkaja dapamoha. Zatrymany, jak vyśvietliłasia, — žychar Bieraścia. Dziaūčyna ciapier u špitali.

Rusłan Raviaka, Baranavičy

Pjanyja kalectvy

U kałhasie imia Kirava traktaryst davaŭ zadni chod svajmu MTZ i patruščyŭ rebry pamočniku, jaki dapamahaŭ čaplać pryčep. Praz tydzień u ahrafirmie “Biełaruś” traktaram K-700, padčas vykanańnia takoha ž maneŭru, iznoŭ byŭ ciažka traŭmavany čałaviek. U abodvuch vypadkach mechanizatary byli vypiŭšy. “Bitva za ŭradžaj” nie praćviareziła jaje ŭdzielnikaŭ. Byŭ navat vypadak, kali milicyjaneru daviałosia samomu vieźci zbožža na tok, zamiest niećviarozaha šafiora, adchilenaha ad pracy. Ahułam padčas žniva ŭ krainie zahinuli 5 čałaviek, jašče 17 pakalečylisia. Pryčyny śmierciaŭ — niaspraŭnaść techniki i pjanstva.

Pradajecca komin

Damanaŭski vytvorča-handlovy kambinat, što na Ivaceviččynie, zavinavaciŭsia rajonnamu biudžetu 108 młn. rubloŭ. Kamisija pa rabocie z majomaściu, stvoranaja ŭ rajvykankamie, ciapier pradaje nieruchomaść pradpryjemstva: cech šyrspažyvu, lesazavod, haraž, tarny cech, mechmajsterniu, skład hatovaj pradukcyi, zapravačnuju, cech drevaapracoŭki, budynak sanbytavych pamiaškańniaŭ, kacielniu. Mahčyma, na hetyja abjekty pakupniki znojducca. A voś ci znojducca jakija dzivaki, kab vykłaści hrošy za komin, artezijanskuju śvidravinu, vodanapornuju viežu, prachadnuju, pažarnuju sažałku i aharodžu z žalezabetonnych plitaŭ, taksama vystaŭlenych na prodaž, skazać ciažka.

Aleś Łaŭraniuk, Ivacevičy

“Viedamaściaŭ”
nie zarehistravali

Haradzienskaja rada TBM vyrašyła abskardzić u prakuratury rašeńnie harvykankamu, što nia daŭ zhody na raźmiaščeńnie ŭ Horadni hazety “Viedamaści”. Planavałasia, što hety hramadzka-palityčny tydniovik, zasnavany TBM, budzie raspaŭsiudžvacca va ŭsioj krainie. Heta ŭžo treciaja admova, jakuju atrymaŭ haradzienski TBM. Papiarednija dźvie tyčylisia hazetaŭ “Kałoža” i “Ranica”.

Andrej Mialeška, Horadnia

Mini-rynak zamiest KBA

Na druhim paviersie Ašmianskaha kambinatu bytavoha absłuhoŭvańnia pačaŭ pracavać pieršy ŭ rajonie kryty mini-rynak. 15 pradprymalnikaŭ na 5 hadoŭ arandavali hetaje pamiaškańnie, zrabili ramont i pastavili tam sučasnyja handlovyja punkty. Zhodna z damovaj, jany jašče musiać adramantavać fasad budynku. Usie pradprymalniki raniej pracavali na rynku rajspažyŭtavarystva, ale vyrašyli pierajści pad dach — uzimku nia tak chałodna.

Michaś Vasilevič, “Nioman-infarm”

Letnik dla dziaŭčynak
na Brasłavach

Biełaruski letnik dla dziaŭčynak raspačaŭ svaju pracu na Brasłaŭskich aziorach. Z pryvatnaje inicyjatyvy pradprymalnika Vasila Hrynia dočki biznesoŭcaŭ vyvučajuć tradycyjnyja biełaruskija ramiostvy, sialanski pobyt i falklor. Vasil Hryń vieryć u pośpiech svajoj spravy: “Znakava toje, što biełaruskaja buržuazija źviartaje ŭvahu na takija rečy. Heta padabajecca, a kali padabajecca, heta šanujecca. Dziaŭčatki buduć karoŭki daić, kieramiku rabić, vyšyvać”. Vychavacielki ŭ lahiery spraktykavanyja, a nastaŭniki — vopytnyja. Naprykład, sakrety kieramiki raskryvaje viadomy ŭ Biełarusi hančar Valery Ziankievič.

Pavodle radyjo “Svaboda”

Ctalovyja barety

25 žniŭnia niezarehistravanaja patryjatyčnaja arhanizacyja “Bieły lehijon” naładziła dla svaich siabroŭ ekzamieny na atrymańnie “Stalovaha baretu”. Svaje siły sprabavali 14 chłopcaŭ. Da apošniaha vyprabavańnia — sparynhaŭ — dajšli tolki 11. Jany prajšli 30-kilametrovy marš-kidok, 3-kilametrovy kros, “stometroŭku”, zdali šerah fizyčnych praktykavańniaŭ (naprykład, 50 adciskańniaŭ treba było zrabić za chvilinu), prajšli pałasu pieraškodaŭ. Mienavita na pałasie i atrymaŭ traŭmu adzin z chłopcaŭ. Jon zaskočyŭ u zadymleny budynak, adkul treba było “vylecieć” praz akno. Ale ŭ dymie chłapiec nie zaryjentavaŭsia i zamiest akna trapiŭ hałavoj u ścianu. Kryŭdna: hetak rychtavaŭsia, a za baret daviadziecca zmahacca jašče i naleta.

6 lehijaneraŭ zasłužyli prava nasić “Stalovy baret” — adznaku hvardyi. Pa nabranych bałach pieramoh chłopiec nia ź Miensku, a z pravincyi. Pry kancy mierapryjemstva “Bieły lehijon” naładziŭ kancert staražytnaj biełaruskaj muzyki. Na jaho sabralisia kolki dziasiatkaŭ miascovych žycharoŭ — jany ŭsio znachodzilisia pad uražańniem ad vidovišča, jakoje im padaravali chłopcy ŭ kamuflažy.

Aleh Tačony

U Horadni ŭtvaryŭsia svoj Ruch

25 žniŭnia ŭ Horadni ŭtvaryŭsia “Ruch demakratyčnych siłaŭ horadu”. Staršyniom novaje pieradvybarčaje inicyjatyvy abrany Źmicier Ivanoŭski — mastak, namieśnik staršyni haradzkoj arhanizacyi BNF. Sustaršyniami — Alaksandar Pahulajeŭ z AHP i Valancin Brancevič z Klubu pradprymalnikaŭ. Ruch nazvany “Haradzienskim vybaram”. Zaćvierdžanaja emblema — aleń śviatoha Huberta (hierb horada) z adpaviednym nadpisam.

Źjaŭleńnie Ruchu vyklikanaje patrebaj stvaryć kaalicyju z “aktyŭnych hramadzianaŭ”. Na heta, zdavałasia b, jość Kaardynacyjny kamitet “Haradzienskaja inicyjatyva” (toj samy, jaki niadaŭna ačolvaŭ Domaš), ale jon zastajecca klubam staršyniaŭ partyjnych i hramadzkich supołak. Stvaryć na jahonaj asnovie štości šyrejšaje nie atrymałasia. Maŭlaŭ, kiraŭniki partyjnych supołak nie žadajuć, kab isnavaŭ novy šyroki ruch nakštałt niadaŭniaha hramadzkaha ruchu BNF, u jaki ŭvachodzili ŭ poŭnym składzie niekatoryja partyjnyja dy hramadzkija arhanizacyi. A partyi, jak viadoma, adpałochvajuć šmat kaho. Ruch — heta bolš neŭtralnaja, bolš demakratyčnaja forma.

U Horadni abjadnańnie ŭ Ruch adbyłosia paźniej, čym va ŭschodnich haradach krainy. Ale nia vyklučana, što Horadnia viernie sabie reputacyju horadu z aktyŭnaj hramadzkaściu. Palityčna aktyŭnaj — skazać nie vypadaje. Bo zasnavalniki padkreślivali sacyjalny charaktar novaha Ruchu. Maŭlaŭ, treba źjadnać namahańni demakratyčna nastrojenaj publiki, kab vyrašać miascovyja sacyjalna-ekanamičnyja prablemy. Kali heta ŭdasca, možna budzie raźličvać i na pośpiech na chutkich vybarach u haradzki Saviet.

Va ŭstanoŭčym schodzie ŭdzielničaŭ 21 siabar Ruchu. Jany pradstaŭlajuć AHP, BNF, ASDP, “Moładź AHP”, “Maładuju hramadu”, pradprymalnikaŭ, siabroŭ Niezaležnaha prafsajuzu. Abranaja Rada z 10 asobaŭ. Udzielnikaŭ Ruchu vinšavali deputaty pałaty pradstaŭnikoŭ Valery Frałoŭ i Hanna Burava. Jany abiacali svaju dapamohu.

Siarhiej Maksimovič