Kiraŭnik rasijskaj dziaržaŭnaj karparacyi «Rasatam» Alaksiej Lichačoŭ zajaviŭ, što hałoŭny inžynier Zaparožskaj atamnaj elektrastancyi Alaksandr Jakaŭleŭ zahinuŭ ranicaj 15 lipienia ŭ vyniku ŭdaru bieśpiłotnika.
Rasijski bok śćviardžaje, što ŭdar byŭ naniesieny dronam pa słužbovym aŭtamabili Toyota Camry kala miažy pramysłovaj terytoryi Zaparožskaj AES i horada Enierhadar.
Lichačoŭ zajaviŭ, što Alaksandr Jakaŭleŭ usio svajo prafiesijnaje žyćcio pryśviaciŭ atamnaj enierhietycy i, pavodle jaho słoŭ, zahinuŭ «na bajavym pastu» padčas vykanańnia słužbovych abaviazkaŭ.
Pavodle paviedamleńnia kiraŭnika «Rasatama», razam ź Jakaŭlevym zahinuŭ i kiroŭca słužbovaha aŭtamabila Dźmitryj Filipaŭ.
Lichačoŭ taksama paviedamiŭ, što pra zdareńnie ŭžo prainfarmavana palityčnaje kiraŭnictva Rasii. Akramia taho, rasijski bok čakaje ad Mižnarodnaha ahienctva pa atamnaj enierhii (MAHATE) apieratyŭnaj reakcyi na hibiel hałoŭnaha inžyniera Zaparožskaj AES.
Pavodle źviestak z ukrainskaj bazy «Miratvorac», Alaksandr Jakaŭleŭ naradziŭsia 5 studzienia 1980 hoda ŭ horadzie Kamienka-Dniaproŭskaja Zaparožskaj vobłaści, vyšejšuju adukacyju atrymaŭ u Adeskim politechničnym univiersitecie.
Svaju pracoŭnuju dziejnaść na Zaparožskaj atamnaj elektrastancyi pačaŭ z pasady mašynista nasosnych ustanovak. Paźniej pracavaŭ abchodčykam turbinnaha adździaleńnia. U 2008 hodzie byŭ pryznačany viadučym inžynieram pa kiravańni turbinaj, a paśla zajmaŭ pasadu načalnika enierhabłoka. Da pryznačeńnia hałoŭnym inžynieram Zaparožskaj AES vykonvaŭ abaviazki namieśnika hałoŭnaha inžyniera pa ekspłuatacyi stancyi.
Paśla zachopu Zaparožskaj AES Rasijaj viasnoj 2022 hoda pierajšoŭ na bok akupantaŭ i byŭ pryznačany im hałoŭnym inžynieram elektrastancyi.
Michaił Fiodaraŭ zajaviŭ pra adstaŭku z pasady ministra abarony Ukrainy i pieraličyŭ svaje dasiahnieńni
Daradca Minabarony Ukrainy: Retranślatary ŭ Biełarusi ŭsio adno vykarystoŭvajucca dla atak na Ukrainu
Rasijanie atakavali Adeskuju vobłaść — try čałavieki zahinuli
Kierč zastałasia biez elektryčnaści
Rasija źniščaje ŭkrainskija AZS. Jak i da čaho heta moža pryvieści
Kamientary