U Japonii ŭpieršyniu za 80 hadoŭ halštuki bolš nie buduć uličvacca pry raźliku inflacyi. Dziaržaŭnyja statystyki vyrašyli, što jany ŭžo nie adlustroŭvajuć paŭsiadzionnych vydatkaŭ bolšaści japoncaŭ. Što jašče vyklučyli sa spažyvieckaha košyka i jakija novyja tavary zaniali ich miesca, paviedamlaje Financial Times.
Raz na piać hadoŭ Biuro statystyki Japonii pierahladaje tak zvany spažyviecki košyk — pieralik tavaraŭ i pasłuh, na asnovie jakoha raźličvajecca indeks spažyvieckich cen. Paśla čarhovaha abnaŭleńnia, jakoje ŭstupić u siłu z nastupnaha miesiaca, upieršyniu z 1948 hoda ŭ im nie budzie halštukaŭ.
Halštuk — nie adzinaja achviara hetaj histaryčnaj «čystki». Razam ź imi sa śpisu vyklučyli i žanočyja pančochi dy kałhotki, jakija doŭhi čas byli nieadjemnaj častkaj ofisnaha dres-koda.
Heta pieršy pierahlad spažyvieckaha košyka paśla pandemii COVID-19, jakaja pryniesła ŭ japonskija kampanii dystancyjnuju pracu, anłajn-sustrečy i inšyja novyja praktyki. Jak pakazaŭ čas, hetyja źmieny akazalisia bolš ustojlivymi, čym čakałasia. Viartańnia da strohich ofisnych pravił nie adbyłosia, a tradycyjny kaścium japonskaha ofisnaha supracoŭnika ŭsio čaściej sastupaje miesca futbołkam i štanam-čynasam.
Adnak, jak adznačajuć ekśpierty, hety praces pačaŭsia jašče zadoŭha da pandemii. Pradstaŭniki haliny źviazvajuć jaho ź dziaržaŭnaj prahramaj Cool Biz, uviedzienaj ŭ 2005 hodzie. Jana zaklikała supracoŭnikaŭ u letni pieryjad admaŭlacca ad halštukaŭ i pinžakoŭ, kab mienš karystacca kandycyjanierami i ekanomić elektraenierhiju.
Pavodle adnaho ź vieteranaŭ japonskaj vytvorčaści halštukaŭ, mienavita paśla zapusku hetaj prahramy ŭ hramadstvie zamacavałasia ŭjaŭleńnie, što nasić halštuk užo nie pryniata. Jon adznačyŭ, što abjomy vytvorčaści na jaho fabrycy skaracilisia amal na 90%.
Hetuju tendencyju paćviardžaje i statystyka. Takijskaja asacyjacyja vytvorcaŭ halštukaŭ paviedamlaje, što ich vytvorčaść i impart skaracilisia prykładna da 11 miljonaŭ štuk — heta tolki tracina ad uzroŭniu 2009 hoda.
Padobnaja situacyja skłałasia i z žanočymi pančochami. Pavodle Japonskaj asacyjacyi vytvorcaŭ škarpetkavych vyrabaŭ, z 2016 hoda ich hadavyja pastaŭki ŭpali bolš jak udvaja — da 125 miljonaŭ par. Dla paraŭnańnia, u kancy 1980‑ch štohod pradavałasia bolš za miljard par.
Admova japonskich ofisaŭ ad halštukaŭ i kałhotak supała ź imklivym rostam papularnaści japonskaha brenda paŭsiadzionnaha adzieńnia Uniqlo. Za apošnija 30 hadoŭ hetaja marka zaniała 12,5% usiaho ŭnutranaha rynku adzieńnia.
Na vyzvalenaje ŭ spažyvieckim košyku miesca prychodziać tavary, jakija adlustroŭvajuć novyja pryjarytety maładziejšaha pakaleńnia. Adnym z samych prykmietnych dapaŭnieńniaŭ staŭ prateinavy parašok.
Sučasnyja japoncy značna bolš za svaich baćkoŭ zakłapočanyja fizičnaj formaj i naroščvańniem myšačnaj masy. Prodažy białkovych dabavak, batončykaŭ i napojaŭ imkliva rastuć, pieratvarajučysia ź nišavaha praduktu dla bodzibiłdaraŭ u elemient štodzionnaha racyjonu zvyčajnaha haradžanina.
Akramia prateinavaha parašku, u śpis upieršyniu trapili strachavańnie chatnich žyvioł, ananasy i viełasipiednyja šlemy. Apošnija — u suviazi z pryniaćciem novych normaŭ, nakiravanych na pavyšeńnie biaśpieki darožnaha ruchu.
Niahledziačy na źmianšeńnie popytu, pradstaŭniki haliny nie ličać, što halštuk całkam źniknie. Na ich dumku, siońnia jon užo mienš usprymajecca jak modny aksesuar i ŭsio bolš asacyjujecca z aficyjnymi mierapryjemstvami, dziełavym etykietam i situacyjami, kali treba padkreślić surjoznaść i pavahu da abstavin.
Kamientary
Kstati, v kursie žie, počiemu eto - kłaśsika? Skolko let vo vsiem civilizovannom mirie važnyje ludi obłačajutsia v kostiumy, a vsie ravno mnohije druhije dažie nie znajut, počiemu nie zastiohivajut na nižniuju pidžak ili začiem prorieź na łackanie (kotoruju v diešiovych kostiumach pusť diekorativnuju, no ostavlajut)