Jak vy staviciesia da vajny ŭ Iraku?

Apazycyjnyja partyi pakul nia vykazalisia nakont vajny ŭ Iraku. U Łukašenki jość pazycyja, u apazycyi — niama. Pakul apazycyja maŭčyć, pazycyju Łukašenki možna ličyć pazycyjaj usioj Biełarusi. Absalutnaja bolšaść biełarusaŭ suprać vajny. Antyvajennaja pastava dała b apazycyi ački. Raz apazycyja maŭčyć, mo jana za vajnu? Vajna ŭ Iraku cynična vyhadnaja biełaruskaj niezaležnaści, bo pryviadzie da padzieńnia cenaŭ na naftu. Ale i pra heta maŭčyć apazycyja. Kab palityki narešcie zahavaryli, my praviali apytańnie «NN».

Piatro Kraŭčanka, były pasoł u Japonii: Heta budzie vajna dźviuch cyvilizacyj, jakaja źniščyć i abrynie suśvietny pravaparadak. Jašče ŭ XVI st. Statut Vialikaha Kniastva Litoŭskaha zakłaŭ pryncypy mirnaha suisnavańnia dziaržavaŭ. Našy prodki zrabili heta pieršymi ŭ Eŭropie. Tolki pra heta nichto nia viedaje…

Pavał Kazłoŭski, były ministar abarony: Vyrašyć prablemu i pamianiać režym Chusejna biez kryvi j vajny — heta byŭ by razumny krok mižnarodnaj supolnaści.

Aleś Ancipienka, filozaf: Ja nie pacyfist, ale da mahčymaj vajny staŭlusia nehatyŭna. Vajna — heta hvałt, kryzys intelektu, kaštoŭnaściaŭ, adnosinaŭ. Tamu heta nia jość lepšy srodak vyrašeńnia prablemaŭ.

Siarhiej Kaścian, deputat pałaty pradstaŭnikoŭ: Hitler u 30-ja hady vioŭ baraćbu za suśvietnaje panavańnie, za «svabodu» i «demakratyju», a na samaj spravie zabivaŭ, rabavaŭ i paliŭ. Dakładna tak robić i kiraŭnictva ZŠA. Ja nie vinavaču amerykanski narod, jaki nia choča vajny, ale asudžaju palityku amerykanskaha ŭradu ŭ adnosinach da Iraku i inšych krainaŭ, u tym liku i Biełarusi.

Hienadź Dyleŭski, deputat pałaty pradstaŭnikoŭ: Vajujuć palityki, a cierpiać ad hetaha prostyja ludzi. Tamu spačatku treba davieści, što chtości — teraryst, i tolki paśla pačynać ź im vajnu.

Alaksiej Janukievič, siabra Sojmu BNF: Ja, jak i luby čałaviek, da vajny staŭlusia admoŭna. Ale, razam z tym, kali ad Iraku moža zychodzić niebiaśpieka zachodniaj cyvilizacyi, ja padtrymlivaju pazycyi ZŠA i Vialikabrytanii. Chavajučy infarmacyju pra vyrab chimičnaj zbroi, Irak nie pakidaje šancaŭ na mirnaje ŭrehulavańnie.

Alena Skryhan, namieśnica staršyni PKB: Ja suprać hetaj vajny nie tamu, što padtrymlivaju režym Chusejna. Mnie škada ludziej, jakija zaležać ad voli losu. Akramia taho, vajna — heta i ekalahičnaja katastrofa. My bačyli, što było paśla «Bury ŭ pustyni», ciapier ža budzie jašče horš.

Anatol Labiedźka, kiraŭnik AHP: Mianie bolš chvalujuć nie takija hlabalnyja prablemy, a sytuacyja ŭ Biełarusi. Što datyčyć kanfliktu ŭ Iraku, to mižnarodnaja supolnaść sprabuje vyrašyć prablemu palityčnaha režymu, jaki tam isnuje. Ja b ni za jakija hrošy nie palacieŭ by tudy na samalocie, jak niekatoryja pradstaŭniki Biełarusi, jakija chočuć abaranić Irak ad bambiožak.

Halina Siamdzianava, namieśnica staršyni BNF: Ja da lubych vajennych dziejańniaŭ staŭlusia admoŭna. Kanflikty treba vyrašać mirnym šlacham.

SIO

• 0
• 0
• 0
• 0
• 0
• 0
• 0
• 0