Adkul hrošy na pasiaŭnuju

List mianie prymusiła napisać papierka, prykładzienaja ciapier da hetaha pasłańnia. Zirnicie: «adzin z najbujniejšych vytvorcaŭ sielskahaspadarčaj pradukcyi Mienskaj vobłaści» sioleta nia ŭ stanie paśpiachova pravieści «viasnova-palavuju kampaniju».

Tamu Mienski rajvykankam źviartajecca da pradpryjemstvaŭ rajonu z prośbaj «akazać razavuju finansavuju dapamohu». Hetak, u jaŭna pryvatnaha pradpryjemstva — TAA «Aŭtacentar KaMAZ», što mieścicca ŭ Kaladzičach pad Mienskam, — rajonnaja «vertykal» prosić 500 tys. rubloŭ. Z rezalucyi na liście vidać, što kiraŭnictva TAA sprabuje praličyć finansavyja mahčymaści firmy. Na žal, niezrazumieła, ci zmahli adrasaty lista niešta achviaravać rajonnym kałhasam, ci nie.

Cikava: kolki takich adrasataŭ atrymali aficyjnyja prośby dapamahčy «najbujniejšamu vytvorcu sielhaspradukcyi»? Jakim pryncypam kiravałasia «vertykal», adbirajučy pradpryjemstvy, kab źviarnucca pa hrošy? I jakaja ŭsio ž častka pasiaŭnoj lehła na plečy tych, chto nia maje pavodle rodu dziejnaści nijakich adnosinaŭ da sielhaspradukcyi?

Dokazy taho, što ajčynnaja systema sielskaj haspadarki, prabačcie, pajšła pa śviecie z torbaj, užo valajucca prosta pad nahami. Hety aficyjny dakument, jakomu niama padstavaŭ nie davać viery, znajšoŭ na prypynku transpartu moj muž.

Jašče cikavaja reč: u mnohich sielsavietach Mienskaha rajonu nijakaje daviedki atrymać niamožna, pakul nia spłaciš padatkaŭ na ziamlu… da kanca biahučaha hodu. Zvyčajna apošni termin apłaty hetych padatkaŭ — 1 listapada. Supracoŭniki sielsavietaŭ kažuć, što ich pryśpiešvaje vyšejšaje načalstva. Sami ž orhany miascovaj ułady biednyja, niekatoryja nia majuć navat kamputaraŭ, zarobki supracoŭnikaŭ — prosta śmiešnyja. Naprykład, u Juzafoŭskim sielsaviecie (Mienščyna) raniej pracavaŭ ziemlamier, jaki zajmaŭsia ŭsimi pytańniami pryvatnych ziamielnych učastkaŭ. Ale zvolniŭsia, bo atrymliŭvaŭ 90 tysiač u miesiac. Jahonyja abaviazki lehli na plečy staršyni sielsavietu, jaki j tak ledź daje rady: kałhasu ŭ Juzafovie daŭno niama, i absalutna ŭsie pytańni musić vyrašać adzin čałaviek. Voś staršynia i razryvajecca pamiž padatkami, praryvam vodapravodu, pahrozaj zakryćcia palikliniki, selektarnymi naradami. U hetaj i susiednich vioskach jość kamu pracavać, na maich vačach ludzi navat kuplajuć damy i pierasialajucca siudy z haradoŭ. Ale na pracu amal usie jeździać u Miensk. Heta jość prykładam biełaruskaj vioski biez kałhasaŭ u peryjad paŭraspadu apošnich.

Taciana Śnitko

• 0
• 0
• 0
• 0
• 0
• 0
• 0
• 0