Dakumentalny film Majkła Mura, papiarednik ulaŭravanaha ŭ Kanach «11 vieraśnia pa Farenhiejtu». Trahičny incydent u kaledžy Kałumbiny, kali padletki pierastralali svaich adnaklaśnikaŭ, pasłužyŭ zychodnym punktam dla režyserskaha raśśledavańnia. Čamu tak adbyvajecca? Chto ci što za hetym staić? Halivud, rok-muzyka, rasavaja nianaviść? A mo amerykancy histaryčna schilnyja da hvałtu?
Kali hledačy vyrašać, što dakumentalnaja karcina, dy jašče na dalokuju ad ich temu, budzie niecikavaja, to jany pamylajucca. Majkł Mur biare ŭ abarot ź pieršych kadraŭ i nie adpuskaje da apošniaj chviliny. Bliskučy talent apaviadalnika, dynamičny mantaž, niečakanyja j panaramnyja śviedčańni — i intanacyja, prasiaknutaja bolem, luboŭju i atrutnaj ironijaj.
Jak ni dziŭna, nieihravaja stužka Majkła Mura časam nahadvaje satyryčny šedeŭr Stenli Kubryka «Doktar Strendžłaŭ», ale Mur — sam udzielnik i śviedka absurdnaj rečaisnaści, kali maralnaja kryvadušnaść prytulajecca da zbroi, a ehaizm sparadžaje strach i zabojstvy.
Kali raptam ahladalniki BT vyrašać, što jany taksama dakumentalisty-satyryki, dyk iznoŭ ža pamylacca: im da Majkła Mura — jak da Alfa Centaŭry pieški. Amerykanski režyser, u adroźnieńnie ad ich, ludziej lubić — i jon jašče adkazny j talenavity.
Film prosta abaviazkovy dla prahladu palitykam, hramadzkim i kulturnym dziejačam. Ale j luby inšy hladač acenić hetaje pałkaje, hłybokaje — i vidoviščnaje kino.
Andrej Rasinski
u «Kinafarmacie 4ch4»
«Boŭlinh dla Kałumbiny» («Bowling for Columbine»)
ZŠA, 2002, kalarovy, 114 min.
Žanr: Dakumentalnaje raśśledavańnie-satyra.
Adznaka: 8,5 (z 10).
Kamientary