Жыхары Ленінскага раёна Мінска выступаюць супраць ушчыльнення жылой забудовы
Аб гэтым паведаміў старшыня аргкамітэта па стварэнні грамадзянскай ініцыятывы «Еўраперспектыва» Віктар Янчурэвіч.
Паводле яго слоў, больш за адну тысячу грамадзян падпісаліся пад зваротам супраць зацвярджэння і рэалізацыі ў прапанаваным выглядзе праекта дэталёвага планавання тэрыторыі ў межах вул. Дзянісаўскай — вул. Маякоўскага — зав. Маякоўскага — чыгункі. Подпісы перададзеныя ў адміністрацыю Ленінскага раёна Мінска, якая з 2 па 26 лютага праводзіць грамадскае абмеркаванне праекта рэканструкцыі гэтай тэрыторыі.
«Абурэнне грамадзян выклікаў намер праекціроўшчыкаў крытычна ўшчыльніць жылую забудову шматпавярховымі новабудоўлямі каля дома 23 па вул. Козыраўскай і на тэрыторыі азялененага двара па вул. Барадзінскай, 31, а таксама пашырыць вул. Велікаморскую да трох палос з арганізацыяй аўтобуснага маршруту. На думку жыхароў раёна, праект рэканструкцыі павінен служыць мэце комплекснага добраўпарадкавання тэрыторыі, стварэння спрыяльнага асяроддзя жыццядзейнасці, забеспячэнню аб'ектамі сацыяльнай інфраструктуры, паркоўкамі і стаянкамі аўтатранспарту, а не быць інструментам банальнай кропкавай забудовы свабодных участкаў жылымі дамамі павышанай павярховасці», — адзначыў Янчурэвіч.
Ён паведаміў, што «галоўнымі праблемамі раёна грамадзяне называюць слаба развітую інфраструктуру, нізкую якасць дзіцячых і спартыўных пляцовак, катастрафічны недахоп парковак, у выніку чаго вуліцы і дваровыя тэрыторыі загрувашчаныя аўтамабілямі». Праект рэканструкцыі павінен вырашаць менавіта гэтыя праблемы, а не ствараць жыхарам новыя, лічаць жыхары.
Падвядзенне вынікаў грамадскага абмеркавання павінна адбыцца 27 лютага. «Грамадзяне спадзяюцца, што іх меркаванне будзе ўлічана і праект будзе адпраўлены на дапрацоўку, а пры вырашэнні пытання не на карысць грамадскай думкі маюць намер абскардзіць рашэнне і абараняць свае інтарэсы ў вышэйшых інстанцыях», — адзначыў актывіст.
На яго думку, «праблемы пры правядзенні грамадскіх абмеркаванняў горадабудаўнічых праектаў узнікаюць з-за адхілення грамадскасці ад удзелу ў працэсе планавання».
«Ні Мінгарвыканкам, ні праектныя інстытуты не лічаць патрэбным весці камунікацыю з гараджанамі на этапе распрацоўкі праекта развіцця канкрэтнай тэрыторыі, а лічаць за лепшае сілай праштурхоўваць тое, што выгадна камусьці, але не гараджанам. Сёння ўладам горада пара задумацца аб змяненні падыходаў да горадабудаўніцтва і праектавання, выбудоўваць з грамадскасцю дыялог, а не навязваць неабдуманыя рашэнні, наступствамі якіх з'яўляюцца пратэсты, недавер і азлобленасць», — лічыць Янчурэвіч.
Каментары