БАЖ пра блакіроўку сайтаў: Гэта спроба пакараць журналістаў за выкананне прафесійных абавязкаў
Грамадскае аб'яднанне «Беларуская асацыяцыя журналістаў» (БАЖ) занепакоенае хакерскай атакай на незалежныя анлайн-медыя — belapan.com і naviny.by. Пра гэта сказана ў заяве БАЖ у сувязі з DDоS-атакай на сайты інфармацыйнай кампаніі БелаПАН, прынятай 5 кастрычніка.
«Агрэсіўныя дзеянні супраць гэтых сайтаў пачаліся пасля публікацыі крытычных артыкулаў аб прымусовай яўцы студэнтаў на палітычную акцыю з рэлігійнай афарбоўкай «Малітва за Беларусь», — адзначаецца ў заяве. — Папярэдні вопыт (блакіроўка шэрагу незалежных сайтаў у канцы снежня 2014 года пасля асвятлення крызісу на валютным і спажывецкім рынку) дазваляе разглядаць гэта як спробу пакараць за выкананне прафесійных абавязкаў».
БАЖ звяртае ўвагу на тое, што «грубае ўмяшанне ў працу незалежных медыя адбываецца падчас электаральнай кампаніі, калі патрэбнасць людзей у рознабаковай непадцэнзурнай інфармацыі як ніколі высокая».
«Мы лічым гэта чарговай праявай сістэмнай палітыкі кантролю над інфармацыяй у нашай краіне з мэтай маніпулявання грамадскай свядомасцю», — гаворыцца ў заяве. БАЖ далучаецца да патрабавання кампаніі БелаПАН арганізаваць бяспечнае абслугоўванне сайтаў і абарону ад любых замахаў на іх паўнацэнную працу.
«ГА «БАЖ» заклікае спыніць любыя атакі на незалежныя медыя, каб забяспечыць канстытуцыйнае права грамадзян нашай краіны атрымліваць рознабаковую непадцэнзурную інфармацыю з розных крыніц», — падкрэсліваецца ў заяве.
З патрабаваннем спыніць блакіроўку сайтаў інфармацыйнай кампаніі БелаПАН выступіў таксама аргкамітэт па стварэнні партыі «Беларуская хрысціянская дэмакратыя». «Атака на незалежныя СМІ за тыдзень да дня галасавання падкрэслівае, што ў Беларусі не адбылося ніякіх станоўчых змяненняў на шляху да дэмакратызацыі. Наадварот, умяшанне ў працу СМІ па-ранейшаму лічыцца нормай», — падкрэсліваюць прадстаўнікі БХД.
Хрысціянскія дэмакраты заклікаюць міжнародныя структуры, у тым ліку АБСЕ, зафіксаваць факт блакіроўкі сайтаў у кантэксце правядзення выбарчай кампаніі. Аргкамітэт БХД таксама заклікае ўлады «неадкладна распачаць захады для забеспячэння доступу грамадзян Беларусі да рэсурсаў».
3 кастрычніка сервер кампаніі БелаПАН зведаў масіраваную DDоS-атаку, якая працягваецца дагэтуль.
Цяпер чытаюць
Лукашэнка: Пры цяперашнім цячэнні вайны Беларусь з Расіяй не змаглі б абараніць беларускай мяжы ад Украіны31
Каментары