Забіты ў Польшчы расійскі мастак адну з карцін прадаў за $20 тысяч і заданаціў УСУ. Вось што расказаў яго знаёмы беларус Бохан
Блогер Уладзіслаў Бохан, які быў знаёмы з Сямёнам Скрапецкім некалькі гадоў і перапісваўся літаральна напярэдадні трагедыі, расказаў «Белсату», чым жыў мастак, як зарабляў на творчасці і чаму апошнія гады рэгулярна атрымліваў пагрозы.
Яшчэ за некалькі гадзін да гібелі Сямён Скрапецкі абмяркоўваў з Уладзіславам Боханам новыя акцыі супраць расейскага рэжыму. Паводле яго слоў, у ноч з суботы на нядзелю Скрапецкі прапанаваў арганізаваць супольную акцыю ў Берліне або Варшаве пасля свайго нядаўняга перформансу каля расейскай амбасады ў Германіі. Канчатковых планаў яны выпрацаваць не паспелі.
Блогер быў знаёмы са Скрапецкім з 2022 года. Яны пазнаёміліся на выставе «ReBelarus» у Варшаве, якая праходзіла незадоўга да пачатку поўнамаштабнай вайны ва Украіне. Там расейскі мастак прадстаўляў свае працы з вострай палітычнай тэматыкай. Паводле Бохана, пасля гэтага яны падтрымлівалі сувязь, хоць і не былі блізкімі сябрамі. Стасаваліся пераважна вакол мастацтва, палітыкі і грамадскай дзейнасці.
«Як чалавек ён быў даволі складаны. З ім часам было цяжка стасавацца, бо ён быў вельмі эмацыйны і рэзкі ў сваіх выказваннях. Не заўсёды я быў згодны з тым, што ён казаў. Але як мастак ён быў сапраўдным геніем», — кажа Бохан.
На яго думку, ніхто з сучасных мастакоў не перадаваў так дакладна атмасферу «глыбіннай Расіі» за межамі Масквы. Скрапецкі быў родам з Алтайскага краю і часта звяртаўся ў сваёй творчасці да жыцця расейскай правінцыі.
Паводле Бохана, апошнія месяцы мастак пастаянна атрымліваў пагрозы. Асабліва пасля таго, як пачаў актыўна высмейваць кіраўніка Чачні Рамзана Кадырава. Скрапецкі нават публікаваў у сваім Telegram-канале скрыншоты агрэсіўных паведамленняў ад прыхільнікаў Кадырава.
Акрамя таго, у адным з допісаў ён паведамляў, што каля яго дома дзяжураць паліцэйскія. Бохан мяркуе, што гэта магло быць звязана са зваротам мастака ў праваахоўныя органы з-за пагрозаў. Пры гэтым пра нейкія канкрэтныя небяспекі ў асабістых размовах Скрапецкі не расказваў.
«Вакол яго мастацтва існавала вялікая супольнасць людзей»
Скрапецкі удзельнічаў не толькі ў расейскіх антыпуцінскіх акцыях, але і падтрымліваў беларускую дыяспару ў Польшчы. Паводле Бохана, мастак наведваў беларускія акцыі салідарнасці ў Белай-Падляшскай, а таксама ўдзельнічаў у супольных пратэстах каля расейскай амбасады ў Варшаве.
Бохан таксама расказаў, што Скрапецкі жыў пераважна за кошт сваёй творчасці. Паводле яго слоў, мастак атрымліваў каля 500 долараў штомесяц ад манетызацыі кантэнту ў YouTube і сацыяльных сетках. Асноўны ж прыбытак прыносіў продаж карцін. Пры гэтым некаторыя яго работы каштавалі вельмі дорага.
Скрапецкі займаўся палітычнай сатырай больш за пятнаццаць гадоў. Адзін са сваіх твораў ён, паводле Бохана, прадаў прыкладна за 20 тысяч даляраў і ахвяраваў гэтыя грошы на падтрымку Украіны і Узброеных сіл Украіны.
«У яго заўсёды былі кліенты, вакол яго мастацтва існавала вялікая супольнасць людзей, якія яго падтрымлівалі», — адзначыў блогер.
Навіна пра гібель мастака стала для Бохана поўнай нечаканасцю. Прачытаўшы паведамленні пра страляніну ў Белай-Падляшскай, ён адразу ўспомніў пра Скрапецкага, які жыў у гэтым горадзе. Пасля блогер спрабаваў звязацца з ім і яго жонкай, але не атрымаў адказу. Тады ён пачаў супастаўляць інфармацыю і фотаздымкі з месца здарэння з матэрыяламі, якія мастак публікаваў у сваіх сацыяльных сетках.
«Усё супадала — і ўзрост, і грамадзянства, і месца. Так я зразумеў, што, хутчэй за ўсё, гаворка ідзе менавіта пра яго», — расказаў Бохан.
Цяпер чытаюць
«У мяне толькі адна мара — вярнуць свайго Дзімку». Маці былога палітвязня Дзмітрыя Гопты расказвае пра новую бяду сына. І просіць замаўляць у яе больш тортаў, каб справіцца4
Каментары