На чэмпіянаце свету была блізкая сенсацыя. Зборная Англіі ледзь уратавалася ад кангалезцаў
Зборная Англіі была вельмі блізкая да таго, каб пакінуць чэмпіянат свету ўжо пасля першага раўнда плэй-оф. У матчы супраць Дэмакратычнай Рэспублікі Конга каманда Томаса Тухеля саступала больш за гадзіну, але ўсё ж здолела пераламаць ход сустрэчы і перамагчы з лікам 2:1.
Кангалезцы пачалі матч вельмі ўпэўнена і не аддалі суперніку ні мяч, ні ініцыятыву. Ужо на 7‑й хвіліне яны адкрылі лік: пасля хуткай камбінацыі Браян Сіпенга дакладна прабіў у бліжні вугал, а галкіпер Англіі Джордан Пікфард не здолеў выратаваць каманду. Для Сіпенгі гэта быў першы гол за нацыянальную зборную.
Прапушчаны мяч не прымусіў англічан адразу актывізавацца. Яны доўга дзейнічалі павольна, часта памыляліся ў перадачах і амаль не стваралі небяспекі каля чужых варот. Толькі бліжэй да перапынку зборная Англіі пачала гуляць больш упэўнена і стварыла некалькі добрых момантаў.
Аднак галкіпер ДР Конга Дзімітры Мпасі-Нзо правёў выдатны матч. Ён неаднаразова ратаваў сваю каманду пасля небяспечных удараў, а ў адным з эпізодаў абаронца Аарон Ван-Бісака вынес мяч амаль з лініі варот. Англічане таксама разлічвалі на пенальці ў некалькіх спрэчных сітуацыях, але суддзя не прызначыў адзінаццаціметровыя. У сваю чаргу кангалезцы перад перапынкам маглі павялічыць перавагу, але Ёан Віса трапіў у штангу.
У другім тайме Англія стала больш настойліва атакаваць. Тухель зрабіў некалькі замен, каб узмацніць гульню на флангах. Доўгі час Мпасі-Нзо працягваў выдатна дзейнічаць у варотах, але на 75‑й хвіліне ўсё ж капітуляваў. Пасля падачы Энтані Гордана Гары Кейн выйграў барацьбу ў абаронцаў і галавой адправіў мяч у сетку.
Пасля гэтага англічане працягнулі ціск і на 86‑й хвіліне вырвалі перамогу. Джуд Белінгем пачаў атаку, Гордан падабраў мяч і аддаў перадачу Кейну. Форвард у атачэнні трох супернікаў здолеў палепшыць пазіцыю і моцным ударам пад перакладзіну аформіў дубль.
У канцы сустрэчы зборная ДР Конга ўжо не змагла арганізаваць паўнавартасны адказ, хоць і атрымала права прабіць небяспечны штрафны ў кампенсаваны час.
Статыстыка матча сведчыць пра перавагу Англіі: 16 удараў па варотах супраць 7, сем удараў у створ супраць двух, а таксама вышэйшы паказчык чаканых галоў. Тым не менш зборная ДР Конга правяла вельмі годны матч, прымусіла аднаго з фаварытаў турніру змагацца да апошніх хвілін і заслужыла павагу сваёй смелай гульнёй.
У наступным раўндзе англічане сустрэнуцца са зборнай Мексікі — адной з трох гаспадынь гэтага чэмпіянату.
На чэмпіянаце свету з’явілася новая любімая фанатка. Усе шалеюць ад заўзятаркі зборнай Парагвая ШМАТ ФОТА
Францыя ўстанавіла рэкорд чэмпіянатаў свету! Але гэта дрэнны знак
Французы ў 1/16 фіналу не пакінулі ніякіх шанцаў шведам
Зборная Нарвегіі прайшла Кот д'Івуар дзякуючы пятаму голу Холанда
Нідэрланды — феномен чэмпіянатаў свету. 16 гадоў без паражэнняў — і ніводнага фіналу
Каментары
Мексіканцы, безумоўна, вельмі прыгожая каманда, удала спалучае лацінамерыканскі футбол з еўрапейскім, з высокім індывідуальным майстэрствам усіх футбалістаў і добрай каманднай гульнёй. Аднак лічу, што шанцы там 50 х 50 ...