Ціханоўская атрымала ўзнагароду ў Польшчы і расказала пра размову, падслуханую ў «Жабцы»
Святлана Ціханоўская была ўзнагароджана міжнароднай Прэміяй караля Эрыка Памеранскага ў Польшчы. Сёння яе ўручылі ёй у горадзе Дарлова на Балтыцы, піша Reform.news.
Прэмія была прысуджана за дзейнасць па садзейнічанні дэмакратычным пераўтварэнням у Беларусі і ўмацаванні адносін краіны з еўрапейскай супольнасцю.
Прэмія заснаваная ў Дарлаве ў гонар народжанага ў гэтым горадзе караля Даніі, Швецыі і Нарвегіі Эрыка Памеранскага (1381 — 1459) — першага манарха, які ўзначаліў тры краіны ў межах Кальмарскай уніі.
Святлана Ціханоўская, выступаючы пасля ўручэння прэміі, падкрэсліла, што беларусы, украінцы і палякі змагаюцца за адны і тыя ж каштоўнасці.
«Учора ў краме «Жабка» на вуліцы Морска я падслухала цікавую размову.
Прадавец і пажылы пан абмяркоўвалі менавіта гэтую ўзнагароду. Прадавец сказаў: «Узнагароду зноў уручаюць, але не нашым людзям». «Ну так, — ветліва адказаў пан, — але беларусы таксама нашы. Сёння яны змагаюцца за свабоду, як і мы тады».
І ён меў рацыю. Беларусы, украінцы і палякі — мы ўсе ўдзельнічаем у адной і той жа барацьбе. Мы змагаемся за адны і тыя ж каштоўнасці і супрацьстаім аднаму і таму ж злу», — сказала яна.
«Хаця на гэтым дыпломе напісана маё імя, я хацела б прысвяціць гэтую ўзнагароду тысячам беларусаў, якія працягваюць змагацца за свабоду, нягледзячы на страх, рэпрэсіі і выгнанне. Некаторыя дзейнічаюць падпольна, некаторыя дапамагаюць, перадаючы інфармацыю. Некаторыя падтрымліваюць палітвязняў і іх сем’і. Некаторыя змагаюцца за Украіну. Некаторыя прасоўваюць беларускую мову і культуру, і сёння гэта таксама форма супраціву», — дадала Ціханоўская.
Яна адзначыла, што не імкнулася стаць палітыкам, але часам жыццё не пытаецца, ці гатовыя мы.
«Яно проста ставіць нас перад выбарам: прыняць несправядлівасць або супрацьстаяць ёй. І я проста зрабіла тое, што лічыла правільным для сваёй сям’і і сваёй краіны. Як сказаў Анджэй Пачобут, мы проста стараемся паводзіць сябе годна ў нягодныя часы», — сказала яна.
Ціханоўская адзначыла, што Польшча разумее барацьбу беларусаў як ніхто іншы. Палякі ведаюць, як гэта — жыць пад тыраніяй і змагацца, калі надзеі амаль не засталося. Яна нагадала, што ў палякаў і беларусаў ёсць агульнае ў гісторыі і культуры.
«Мы разам змагаліся ў паўстаннях супраць Расійскай імперыі, і ў нашай гісторыі ніколі не было канфліктаў, якія маглі б падзяліць нашы народы. У 2020 годзе Польшча адчыніла свае дзверы і сэрцы для тысяч беларусаў, якія ўцякалі ад рэпрэсій, для незалежных СМІ, праваабаронцаў, людзей культуры і бізнесу.
Мы разглядаем Польшчу як прыклад і мадэль для Беларусі. Мы хочам, каб Беларусь была падобная да Польшчы — моцнай, дэмакратычнай і квітнеючай. Калісьці мы адновім нашу краіну і вернемся ў еўрапейскую сям’ю народаў, да якой мы гістарычна належым», — сказала яна.
Яна заклікала Польшчу захоўваць падтрымку.
«Я прашу вас заставацца вернымі гэтым прынцыпам, працягваць падтрымліваць Украіну і Беларусь. Мы не дазволім дыктатарам нас шантажаваць. Дыктатараў нельга ўлагодзіць, іх нельга перавыхаваць — з імі можна толькі змагацца. Таму я прашу працягваць аказваць ціск на рэжым. Падтрымлівайце жорсткія санкцыі, пакуль не ўбачым рэальных змен: пакуль не будуць вызвалены ўсе палітычныя зняволеныя, не спыняцца рэпрэсіі і Беларусь не перастане быць часткай вайны Расіі», — сказала яна.
Ціханоўская таксама паўтарыла заклік адрозніваць беларускі рэжым і беларускі народ.
Каментары