Украінцы кантралююць паветра вакол Крыма. За ноч знішчана яшчэ 10 танкераў
Камандуючы Сіламі беспілотных сістэм Украіны Роберт Броўдзі («Мадзяр») заявіў, што ўночы 10 ліпеня ў акваторыі на падыходах да акупаванага Крыма былі нанесены ўдары па 13 суднах, якія, паводле яго слоў, уваходзяць у так званы «ценявы флот» Расіі.
Роберт Броўдзі сцвярджае, што сярод цэляў, якія ўдалося знішчыць, былі дзесяць танкераў, адзін сухагруз, адзін паром і адзін марскі буксір. Паводле яго інфармацыі, усе гэтыя судны знаходзяцца пад міжнароднымі санкцыямі.
Таксама «Мадзяр» паведаміў, што за апошнія пяць сутак падраздзяленні беспілотных сістэм знішчылі 48 плывучых сродкаў, і назваў гэта вынікам сістэматычнага аслаблення расійскай лагістыкі на моры.
Акрамя таго, ён заявіў, што ў межах аперацыі пад назвай «Крымскі рубільнік off» уночы 10 ліпеня былі атакаваныя пяць электрападстанцый у акупаваным Крыме. Паводле яго слоў, гаворка ідзе пра аб'екты ў населеных пунктах Малочнае, Сакі, Еўпаторыя і Мядзведзева.
Паводле гэтай жа заявы, цягам ночы беспілотнікі таксама нанеслі ўдары па 41 вайсковым аб'екце на тэрыторыі Крыма і паўднёвай частцы акупаваных тэрыторый Украіны. Акрамя таго, паведамляецца, што за суткі на лініі фронту ўдалося знішчыць 1660 варожых цэляў, у тым ліку, як сцвярджаецца, ліквідаваныя 426 расійскіх вайскоўцаў.
Цяпер чытаюць
Стаў вядомы прысуд экс-памочніку Лукашэнкі Ігару Брыло3
Каментары