«Сардэчна запрашаем адсюль». Расіяніну прапанавалі працу ў Мінску за 4000 рублёў, але гэтага яму падалося мала
Беларусы патлумачылі, што з гэтым не так.
Жыхар Санкт-Пецярбурга Яўген Картамышаў напісаў у Трэдс пост для расіян, якія пераязджаюць у Мінск, заўважыла «Салідарнасць».
«Мне ўчора прапанавалі выйсці на працу з заробкам 4000 BYN. Кажуць, што для Мінска гэта вельмі добры заробак, але давайце лічыць:
2150 — арэнда кватэры,
250 — камуналка;
100 — садок аднаго дзіцяці;
100 — сaдок другога дзіцяці.
Атрымліваецца 4000 — 2600 = 1400 BYN.
Ні ў чым сабе не адмаўляйце. Вось і думайце, варта шукаць працу ў Мінску ці не».
Пост сабраў больш за тысячу каментарыяў.
«Дай беларусу заробак 4000 — ён будзе гаспадаром свету»
«Сардэчна запрашаем адсюль!», «Усё правільна! Жахлівы заробак, хутчэй едзьце дадому», — напісалі карыстальнікі Трэдса аўтару паста.
Большасць беларусаў пытаюцца, на якой працы расіяніну прапанавалі такі заробак. Ён патлумачыў, што вакансія — кіраўнік праекта ў цэху.
«У маім горадзе ёсць заробак 800 руб., 4000 тут толькі сніцца людзям», — напісалі яму.
«А вы на 1500 пражыць паспрабуйце. 1500 — гэта добры заробак лічыцца».
«Дай беларусу заробак 4000, ён будзе гаспадаром свету, купіць кватэру, гараж для свайго В5 і бульбы. Улетку стандартны Егіпет з жонкай. Але ў многіх такіх заробкаў няма».
«Сардэчна запрашаем у рэальнасць. 4000 — гэта радуйцеся, што вам прапанавалі. У Мінску 3000 — гэта ўжо шык заробак. І зняць кватэру тут нятаннае задавальненне».
Расіяніна паслалі ў калгас: «Усё ў разы танней будзе!»
«Навошта ў Мінск? Едзьце ў аграгарадок — там поўна працы, і дом дадуць умоўна бясплатна. Мы жывём у аграгарадку, і нам на сям’ю далі дом. Спецыяльна калгас будуе дамы для работнікаў. Тры пакоі, кухня, праўда, без мэблі. Жывём ужо год. Плацім толькі камуналку. Дзяцей 5 чалавек. Сад, школа побач, такіх гарадоў многа. Я ў школе працую, муж на ферме. Самі з Масквы».
«Акрамя жартаў — едзеце ў калгас, уладкоўваецеся механізатарам, атрымліваеце 5000‑6000 у сезон, 4000‑4500 зімой. Умоўна бясплатна атрымліваеце прыватны дом, дзе жыць! Бясплатны садок, школу, дапамогу да водпуску, яшчэ прадуктовы пакет з прадпрыемства. Жыццё наладжваецца! У Мінск не едзеце, і ўсё ў разы танней будзе! Цэны завышаныя ў сталіцы, у тым ліку дзякуючы расіянам».
Адзін з трэдчан пярэчыў, што такіх заробкаў у гаспадарках няма: 1000 — зімой, 4000 — летам.
Як выжыць на 13 рублёў на дзень — беларуска падзялілася досведам
Беларуска напісала, што ў яе заробак 2700 рублёў чыстымі, за крэдыт на новую кватэру яна выплачвае 1900, камуналка — 150, інтэрнэт — 50. Акрамя таго, у дзяўчыны ёсць яшчэ адзін крэдыт, за які штомесяц яна выплачвае 200 рублёў. Разам на харчаванне застаецца 400 рублёў — на аднаго чалавека з катом.
«Вось як жывуць беларусы. Выплачу кватэру, куплю аўто ў крэдыт», — падзялілася яна. Паводле слоў дзяўчыны, яна мала есць карыснага: «Грэчка, макароны, курыца. Агуркі, капуста. Шмат булачак і бліноў. У новай кватэры стала шмат пячы: запяканкі, кексы, пірагі».
Расіянін здзівіўся, як можна выжыць на 13 рублёў на дзень. Беларуска патлумачыла: «Так, толькі не на дзень. Закупляюся прыкладна на 60 рублёў на тыдзень. Штосьці дакупляю па дробязях на працягу тыдня. Сама гатую. Ніякіх сталовых і рэстаранаў, каву не п’ю ўсё жыццё. Усё вельмі строга».
У каментарыях таксама здзівіліся цане на арэнду жылля ў Мінску. Аўтар паста патлумачыў, што такія прапановы знайшоў на Куфары.
«Попыт нараджае прапанову, — разважае адзін з каментатараў. — Такія цэны на жыллё толькі таму, што ахвотных з грашыма ўсё яшчэ больш, чым тых, хто здае кватэры. І з наплывам рэлакантаў, асабліва з топ-3 расійскіх гарадоў, сітуацыя будзе ўсё горшай. Таму што з маскоўскімі ці піцерскімі заробкамі з дыстанцыйнай працай вельмі і вельмі камфортна можна жыць у Мінску, на шырокую нагу. Адсюль і сітуацыя на рынку жылля».
У бок аўтара паста пасыпаліся і абвінавачванні ў тым, што гэта з-за іх, расіян, арэнда ў Мінску 2150 рублёў замест 1000.
«Вы прыехалі са сваімі цэнамі ў Грузію, паднялі там цэны на арэнду. Цяпер вы прыехалі са сваімі цэнамі ў Беларусь, таксама паднялі цэны на арэнду. Калі вы гатовыя плаціць 500-800$ за арэнду, гэта не значыць, што мясцовыя з заробкам 600$, якія жывуць на арэндзе, могуць столькі плаціць. Сядзіце лепш у сябе дома і не псуйце людзям жыццё. І так, тут 4000 рублёў лічацца вялікімі грашыма, многія атрымліваюць гэтыя грошы за 2‑3 месяцы».
Але не ўсе з гэтым згодныя:
«Хопіць пісаць, што 4000 рублёў — добры заробак. Заробак «добры» на фоне нізкіх заробкаў і нізкага ўзроўню жыцця. У многіх у два разы ніжэйшы, але для жыцця гэтага мала. Татальная галеча».
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі10
Каментары
4К долларов, конечно. Хочешь "кіраўніком праекта ў цэху" - ну да, будет в рублях. Можно еще санитаркой в больницу и жаловаться, что на хатку в минск-мире не хапае.