Кубак Беларусі па футболе, фінальная сэрыя ў хакейным першынстве, нечуваны посьпех беларусаў на чэмпіянаце сьвету па вэлятрэку, няўдача міні-футбалістаў.
Выходныя адзначыліся цэлым шэрагам цікавых спартовых спаборніцтваў. «НН» прапаноўвае чытачам невялікі агляд.
Футбол. Кубак Беларусі.
Адбыліся першыя чвэрцьфінальныя матчы Кубку Беларусі па футболе. Цэнтральная сустрэча праходзіла у між «Гомелем» і МТЗ-РІПА. На дзіва, упартай гульні не атрымалася. Менчукі ўпэўнена перамаглі суперніка – 4:0.
У другім матчы, які праходзіў у сталіцы, салігорскі «Шахцёр» зь цяжкасьцю перамог «Дарыду» – 2:1. Чэмпіён барысаўскі БАТЭ без праблем адужаў першалігавы «Хімік» са Сьветлагорску – 3:1. «Дынама» (Менск) і магілёўскі «Дняпро» сышлі з поля без забітых мячоў – 0:0.
Матчы ў адказ адбудуцца 2 красавіка.
Хакей. Фінал чэмпіянату Беларусі.
Адбыліся два першыя матчы фінальнай сэрыі чэмпіянату Беларусі па хакеі між «Керамінам» і «Юнацтвам». У абедзьвюх сустрэчах «драконы» атрымалі аднолькавыя перамогі зь лікам 2:1. Цяпер «Юнацтву», каб пераламаць хаду сэрыі трэба будзе вельмі пастарацца.
Каманды на наступныя матчы, якія пройдуць 2 і 3 красавіка, пераяжджаюць на каток у парку імя Горкага.
Вэлятрэк. Чэмпіянат сьвету.
Удала для беларусаў прайшоў чэмпіянат сьвету па вэлятрэку ў брытанскім Манчэстэры. Натуральна, мы спадзяваліся на прыму беларускага вэляспорту Натальлю Цылінскую, але на гэты раз удача ад яе адвярнулася. У гіце яна была толькі восьмай, а ў спрынце ўвогуле атрымала траўму і не змагла працягнуць спаборніцтвы.
Затое зазьзяла ў Манчэстэры новая зорка – Аляксандар Лісоўскі. Гамяльчук упэўнена перамог у скрэтчы, а таксама заваяваў бронзу ў омніюме.
Васіль Кіраенка выйграў залаты мэдаль у алімпійскай дысцыпліне – гонцы па пунктах.
Міні-футбол. Плэй-оф да чэмпіянату сьвету.
У нядзелю зборная Беларусі па міні-футболу ва Ўруччы правяла першы матч плэй-оф да чэмпіянату сьвету. Зь лёсаваньнем беларусам не пашанцавала – бронзавыя прызэры апошняга кантынэнтальнага першынства расейцы. Ужо на дзесятай хвіліне гульні гаспадары прайгравалі – 0:5. Пасьля гульня троху супакоілася і нашы хлопцы нават змаглі адыграць адзін мяч. Зрабіць большага не атрымалася – 1:5.
Матч у адказ 13 красавіка ў Шчолкаве можа стаць звычайнай фармальнасьцю.
Каментары