У Германіі ў пятніцу, 18 сакавіка, памёр былы міністр замежных спраў краіны Гіда Вестэрвеле. Пра яго смерць паведаміў Фонд Вестэрвеле ў Берліне на сваёй старонцы ў Facebook.
«Мы змагаліся. Мэта была ў нас перад вачыма. Мы ўдзячныя за неверагодна выдатны час, праведзены разам. Любоў застаецца», — гаворыцца ў паведамленні, размешчаным пад фатаграфіяй Гіда Вестэрвеле.
Прычынай смерці 54-гадовага палітыка стала лейкемія. З лістапада 2015 года ён увесь час знаходзіўся ў шпіталі, прычынай чаго быў пераход на новыя медыкаменты пасля праведзенай трансплантацыі касцявога мозгу.
Дыягназ «лейкемія» Гіда Вестэрвеле паставілі ў 2014 годзе - праз паўгода пасля сыходу ў адстаўку з пасады кіраўніка нямецкім МЗС. У лістападзе мінулага года ён прэзентаваў кнігу «Паміж двума жыццямі» і выступіў па тэлебачанні, дзе распавёў аб сваёй барацьбе з ракам.
Тады шэраг нямецкіх СМІ выказаў надзею, што Вестэрвеле ўдалося перамагчы хваробу, аднак ужо ў снежні 2015 года яго зноў шпіталізавалі. У якасці афіцыйнай прычыны шпіталізацыі быў названы пераход на новыя медыкаменты пасля праведзенай трансплантацыі касцявога мозгу. У бальніцы Вестэрвеле заставаўся да сваёй смерці.
З канца 1980-х гадоў Гіда Вестэрвеле граў прыкметную ролю ў нямецкай палітыцы. Будучы членам Свабоднай дэмакратычнай партыі (СвДП) і доўгі час знаходзіўся ў апазіцыі, у 2009 годзе ён стаў міністрам замежных спраў Германіі — пасля таго як свабодныя дэмакраты разам з блокам ХДС/ХСС выйгралі выбары ў бундэстаг. На гэтай пасадзе Вестэрвеле заставаўся да 2013 года.
Каментары