Аўтар адной з самых прадаваных кніжных эпапей у гісторыі Джоан Роўлінг высока адгукнулася аб сваіх фанатах, якія захавалі ў таямніцы сюжэт п'есы «Гары Потэр і праклятае дзіця», прэм'ера якой адбылася ў суботу ў Лондане.
«Я так рада, што мы дачакаліся гэтага дня, нічога не сапсаваўшы», - заўважыла шатландская пісьменніца.
Апоўначы па Лондане стартавалі продажы кніг з тэкстам п'есы на англійскай. Такім чынам Роўлінг зрабіла сабе своеасаблівы падарунак: 31 ліпеня ёй спаўняецца 51 год. Дарэчы, згодна з сюжэтам кнігі, дзень народзінаў Гары Потэра — 31 ліпеня.
Многія кніжныя крамы ў Брытаніі працавалі ў ноч на нядзелю ў сувязі з выхадам кнігі.
У верасні п'еса выйдзе на рускай мове. На беларускую, на жаль, «Гары Потэр» так аператыўна не перакладаецца і афіцыйных перакладаў наогул няма.
Адказваючы на пытанне журналістаў пра магчымую брадвейскую пастаноўку, Роўлінг сказала, што была б рада і гэтаму: «Хачу, каб яе пабачыла максімальна вялікая колькасць фанатаў Потэра».
Дзеянне п'есы адбываецца праз 19 гадоў пасля падзей фінальнага рамана сагі «Гары Потэр і дары смерці».
Папярэднія паказы спектакля па п'есе выклікалі захапленне крытыкаў, аднак не ўсе фанаты эпапеі прынялі чарнаскурую актрысу Ному Думезвені ў ролі Герміёны Грэйнджэр. Роўлінг парыравала, што Герміёна цалкам можа быць цемнаскурай, і назвала праціўнікаў такога кастынгу «купкай расістаў».
З 1997 года кніжная серыя пра чараўніка ў акулярах разышлася накладам больш за 450 млн экзэмпляраў.
Цяпер чытаюць
«Надзея Сцяпанаўна». Мікіта Найдзёнаў апублікаваў паэму, якая нарадзілася ў Жодзінскай турме. Такога паэтычнага эпасу ў беларускай паэзіі ХХІ стагоддзя яшчэ не было44
Каментары