І кожны мае магчымасць далучыцца да яе стварэння.
Беларускія навукоўцы палічаць і ацэняць стан дрэваў-доўгажыхароў. Гэтыя дадзеныя дапамогуць скласці базу дадзеных унікальных дрэў, якія растуць на тэрыторыі нашай краіны. Ужо з 16 жніўня батанікі накіруюцца даследаваць Гродзенскую вобласць.
У перыяд з 2016 па 2018 год Дзяржаўная навуковая ўстанова «Інстытут эксперыментальнай батанікі імя. В.Ф. Купрэвіча НАН Беларусі» рэалізуе праект па выяўленні, інвентарызацыі і ўліку векавых дрэваў і насаджэнняў.
Як паведамілі ў Інстытуце эксперыментальнай батанікі ім. В.Ф. Купрэвіча НАН Беларусі, праект дапаможа атрымаць інфармацыю аб колькасных і якасных характарыстыках векавых дрэваў і насаджэнняў, што ў далейшым дапаможа ў прыняцці рашэнняў па іх ахове і ўтрыманні.
«Асобныя ўнікальныя дрэвы-доўгажыхары і высокаўзроставыя насаджэнні з'яўляюцца эталонамі відаў, захавальнікамі найкаштоўнейшай дэндрахраналагічнай інфармацыі, неад'емнай часткай і важным кампанентам прыроднага ландшафту, забяспечваюць захаванасць генафонду біялагічнай разнастайнасці асобнай мясцовасці, краіны ў цэлым. Такія аб'екты павінны стаць здабыткам і гонарам краіны і ўвайсці ў рэгіянальныя турыстычныя кластары, — распавялі выканаўцы пра ідэю праекта. — Сёння ў Беларусі налічваецца каля 90 батанічных помнікаў прыроды рэспубліканскага значэння і каля 230 — мясцовага. Аднак улік аб'ектаў на гэтым абмяжоўваецца, а практыка паказвае, што на землях населеных пунктаў, у лясных масівах, на тэрыторыі прыватных сядзібаў і старадаўніх паркаў захавалася вялікая колькасць унікальных дрэў і насаджэнняў».
На першым этапе будзе сфарміравана заснаваная на ГІС-тэхналогіях база дадзеных «Рэдкія і ўнікальныя дрэвы і насаджэнні Беларусі». Асобныя дрэвы і насаджэнні, якія дасягнулі найбольшых параметраў, будуць абвешчаныя помнікамі прыроды.
Асноўным этапам прац стане пытанне жыццяздольнасці і даўгавечнасці драўняных раслін. «Натуральным з'яўляецца тое, што дрэвам-доўгажыхарам, як любому жывому арганізму, уласцівыя хваробы і старэнне. Сёння лячэнне дрэў не праводзіцца ці праводзіцца недастаткова, і адносіны да іх фармуюцца як да аб'екта аварыйнай небяспекі, які падлягае выдаленню», — лічаць навукоўцы. Вынікам дадзенага этапу стануць распрацаваныя рэкамендацыі па лячэнні, павышэнні ўстойлівасці і зніжэнні аварыйнасці дрэў і рэалізацыя іх на практыцы.
Нададуць увагу і папулярызацыі гэтых аб'ектаў. Выканаўцы праекта плануюць паднімаць пытанні экалагічнай адукацыі ў інтэрнэце, навукова-папулярных выданнях, ўключаць рэдкія, унікальныя дрэвы і насаджэнні ў сетку турыстычных аб'ектаў, далучаць зацікаўленых да аднаўлення і захаванню гэтых аб'ектаў.
Інстытут запрашае далучацца да важнай для краіны работы, якая дапаможа сфармаваць максімальна поўную базу рэдкіх і ўнікальных дрэў і насаджэнняў Беларусі. Дапамагчы можна ў зборы інфармацыі аб дрэвах і іх групах (не ўключаючы ўжо існуючыя помнікі прыроды).
Крытэрыі вылучэння такіх аб'ектаў наступныя:
- дрэвы, акружнасць ствала якіх дасягнула больш за 3 (для таполяў і верб — 4) метры на вышыні 1,3 м ад зямлі;
- група дрэў (не менш за пяць) з акружнасцю ствалоў больш за 2,5 м;
- паркі, алеі або іх фрагменты ўзростам 100 гадоў і старэйшыя.
Інфармацыю аб унікальных аб'ектах расліннага свету можна паведамляць на паштовы адрас інстытута (вул. Акадэмічная, 27, 220072, г. Мінск), электронны адрас ([email protected]) або па факсе (8-017) 284-18-53. У лісце неабходна таксама паведамляць звесткі аб месцазнаходжанні дрэў, па магчымасці дадзеныя падмацоўваць фотаздымкамі. Не забывайце ўказваць кантактны тэлефон адпраўніка!
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1212
Каментары