Генеральны дырэктар ААТ «БелАЗ-холдынг» Пётр Пархомчык сказаў у інтэрв'ю праграме «Контуры» тэлеканала АНТ, паказаным увечары 27 лістапада, што БелАЗ гатовы стаць лакаматывам усяго беларускага машынабудавання. Пра гэта паведамляе БелаПАН.
«Амбіцыі ў нас даволі сур'ёзныя», — сказаў ён.
Пархомчык распавёў, што ў кампаніі ёсць канцэпцыя «2Д». «Першае «Д» — гэта дыверсіфікацыя бізнэсу. Другое — дыверсіфікацыя рынкаў, што патрабуе прэзідэнт», — патлумачыў ён.
У кампаніі, паводле слоў гендырэктара, спрабуюць стварыць новыя напрамкі бізнэсу, акрамя вытворчасці кар'ерных самазвалаў. У Старых Дарогах завяршаецца будаўніцтва невялікага прадпрыемства — дадаткова 1.500 кв. м вытворчых плошчаў — па выпуску фрыкцыйных вырабаў: тармазных калодак для «БелАЗаў», сельскагаспадарчай тэхнікі. Раней гэтыя камплектуючыя завозіліся з Украіны. Будаўніцтва завода плануецца завяршыць да канца гэтага года.
У Слуцку ствараецца прадпрыемства па пад'ёмна-транспартным абсталяванні. Гэта — маставыя і казловыя краны ад 6 да 240 тон. «Калі будзе дрэнна ў галіне продажу кар'ерных самазвалаў, мы будзем выжываць на продажы іншага абсталявання», — запэўніў Пархомчык. Ён таксама нагадаў, што БелАЗ з'яўляецца галоўным акцыянерам у праекце «Белджы» па вытворчасці легкавых аўтамабіляў.
Пётр Пархомчык распавёў, што ў 2017 годзе будзе паказаны першы самазвал, які працуе на газе. «Пакуль у нашых канкурэнтаў такога няма», — заявіў ён.
У адказ на пытанне пра сітуацыю на прадпрыемстве гендырэктар паведаміў, што «заробак набліжаецца да 900 рублёў». У снежні ён будзе складаць 930-950 рублёў. І ў студзені-лютым, на думку Пархомчыка, задача прэзідэнта па заробку ў 500 даляраў у эквіваленце будзе выкананая.
Каментары