КДБ Беларусі выявіў і спыніў карупцыйную дзейнасць генеральнага дырэктара ААТ «Гомельтранснафта Дружба» Сяргея Сасноўскага. Ён затрыманы з доказамі злачынства пры атрыманні хабару ў асабліва буйным памеры ($5 тыс.). Інфармацыя аб гэтым размешчаная на сайце Камітэта дзяржбяспекі.
У якасці хабарадавальніка выступаў Уладзімір Цімашпольскі — былы намеснік старшыні Прэзідыума НАН Беларусі, які таксама затрыманы.
Устаноўлена, што ў 2015 годзе Уладзімір Цімашпольскі дасягнуў дамоўленасці аб аказанні Сяргеем Сасноўскім за незаконнае грашовае ўзнагароджанне садзейнічання адной з украінскіх кампаній у атрыманні замовы на правядзенне рамонтных работ на нафтаправодзе «Мазыр-Брэст» коштам Br8 млрд (недэнамінаваных). Пры гэтым якасць паслуг не адпавядала патрабаванням беларускага заканадаўства.
У мэтах маскіроўкі злачыннай дзейнасці, «абыходу» патрабаванняў беларускага заканадаўства ў сферы вытворчасці будаўнічых работ, а таксама атрымання наяўных злачынных даходаў фігуранты распрацавалі злачынную схему з уцягваннем у яе падкантрольных камерцыйных структур і індывідуальных прадпрымальнікаў.
Фігурантаў справы адрознівала дакладнае размеркаванне абавязкаў. Займаючы высокае службовае становішча, Сяргей Сасноўскі суправаджаў рэалізацыю «дамоўнага» кантракту і забяспечваў пералічэнне ў адрас камерцыйных структур авансавых плацяжоў. Уладзімір Цімашпольскі у сваю чаргу забяспечваў атрыманне наяўных і размеркаванне грашовых сродкаў паміж удзельнікамі злачыннай схемы.
У дачыненні да Сяргея Сасноўскага распачатая крымінальная справа па ч. 3 арт. 430 КК (атрыманне хабару), у дачыненні да Уладзіміра Цімашпольскага — па ч. 2 арт. 431 КК (дача хабару). Да затрыманых прымененая мера стрымання ў выглядзе заключэння пад варту.
Праводзяцца неабходныя аператыўна-вышуковыя і следчыя дзеянні, накіраваныя на выяўленне і дакументаванне іншых эпізодаў супрацьпраўнай дзейнасці падазраваных.
Каментары