У Брэсце 16-гадовы школьнік у снежні мінулага года параніў з пнеўматычнага газабалоннага пісталета свайго 15-гадовага прыяцеля ў правае вока, калі яны з кампаніяй прыяцеляў адправіліся ў лес пастраляць па слоіках, паведаміла афіцыйны прадстаўнік упраўлення Следчага камітэта па Брэсцкай вобласці Марына Дранькова.
Адбылося гэта ў лесапаласе паблізу гаражнага масіву па вул. Гродзенскай. Вядома, што днём 16 снежня 2016 года кампанія з пяці маладых людзей прыйшла ў лесапаласу, каб пастраляць з пнеўматычнай зброі па слоіках. Па словах пацярпелага, у нейкі момант падазраваны пачаў цэліцца яму ў твар. Ён ігнараваў неаднаразовыя просьбы прыбраць пісталет, пасля чаго мэтанакіравана націснуў на спускавы механізм.
Траўма прывяла да поўнай страты зроку на правае вока, і, згодна з заключэннем судова-медыцынскай экспертызы, аднесена да катэгорыі цяжкіх цялесных пашкоджанняў.
Пісталет належаў бацьку аднаго з маладых людзей.
У дачыненні да 16-гадовага падлетка заведзена крымінальная справа па ч.1 арт. 147 (наўмыснае прычыненне цяжкага цялеснага пашкоджання). Санкцыя гэтага артыкула прадугледжвае пакаранне ў выглядзе пазбаўлення волі на 8 гадоў.
Каментары