Актрыса атрымала прэмію «Эмі» за агучку беларускай нянькі ў мультфільме
Амерыканская акторка Александрэа Барштэйн стала лаўрэатам прэміі Creative Arts Emmy Awards 2018 у катэгорыі «Найлепшае агучванне персанажаў».
Перамогу ёй прынесла праца над трэцім эпізодам 16-га сезона анімацыйнага сіткама Family Guy. Ён выходзіць на тэлеканале Fox і ў рускім варыянце носіць назву «Грыфіны».
Серыял распавядае аб няшчаснай сям'і Грыфін, якая складаецца з мужа і жонкі Пітэра і Лоіс, іх дзяцей Крыса, Мэг і Сцюі, а таксама сабакі Браяна.
Па сюжэце трэцяга эпізоду 16-га сезона, бацькі Лоіс — Барбара і Картэр П'ютэршміты — наймаюць для яе дзяцей няньку, каб унукі былі дагледжаныя, а ў дачкі быў час на зносіны з мужам.
Няньку клічуць Наталля, яна з Беларусі. Наталля паспяхова дае рады сваім абавязкам, але затым высвятляецца, што насамрэч яна — наёмны забойца.
У Наталлі ёсць ворагі. Яны з'яўляюцца і спрабуюць адпомсціць ёй. Нянька, ратуючы сябе і Сцюі, пазбаўляецца ад пераследвальнікаў, а затым скача ў самалёт з чырвона-зялёнай паласой уздоўж борта і злятае.
Александрэа Барштэйн агучвала ў гэтым эпізодзе Лоіс, Барбару і Наталлю, а таксама шэраг іншых персанажаў.
Прэмія Creative Arts Emmy Awards уручаецца за тэхнічныя дасягненні ў тэлеіндустрыі — гук, святло, музыку і гэтак далей. Яна праходзіць за тыдзень да галоўнай прэміі Emmy.
Цяпер чытаюць
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося13
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі77
Каментары