23 студзеня а 18-й у памяшканні Беларускага ПЭН-цэнтру адбудзецца прэзентацыя кнігі «Жыццё Адольфа Янушкевіча і яго лісты з кіргізскіх стэпаў» з удзелам Ганны Матусэвіч, Адама Мальдзіса, Кастуся Цвіркі.
23 студзеня а 18-й у памяшканні Беларускага ПЭН-цэнтру (вул.Залатая горка, 2—101) адбудзецца прэзентацыя кнігі «Жыццё Адольфа Янушкевіча і яго лісты з кіргізскіх стэпаў» з удзелам Ганны Матусэвіч, Адама Мальдзіса, Кастуся Цвіркі.
Штогод часцей выходзяць кнігі, прысвечаныя гісторыі таго ці іншага гораду, мястэчка, вёскі, жыццю выбітных землякоў. За апошні год трапіла ў рукі некалькі такіх: ад рукапісных да шыкоўна выдадзеных за грошы сельскага савету... Кніга, падрыхтаваная спадарыняй Ганнай Матусэвіч, — з гэтага шэрагу, але мае адметнасці. Матусэвіч усё, ад пошуку першых выданняў і да арганізацыі выдання сучаснага, рабіла сама.
Адольф Янушкевіч — удзельнік паўстання 1831 году, пасля паразы высланы ў Сібір. Ён правёў там 25 гадоў і толькі пад самы канец жыцця вярнуўся дамоў, у вёску Дзягільна непадалёк ад Койданава.Усе гэтыя 25 гадоў паміж Адольфам і ягонай сям’ёй вялася актыўная перапіска. На аснове лістоў, па смерці Адольфа, ягоны сябар Фелікс Вратноўскі ўклаў кнігу «Жыццё Адольфа Янушкевіча і яго лісты з кіргізскіх стэпаў», выдадзеную ў 1861 г. у Парыжы, а затым перавыдадзеную ў 1875 г. ў Берліне. Спадарыня Ганна змагла адшукаць гэтыя выданні і перакласці кнігу на беларускую — або, як гаворыць яна сама, — «нашу, ліцьвінскую», мову.
Сталыя чытачы НН памятаюць цыкл Ганны Матусэвіч «Дыярыюш», які друкаваўся ў 1996 годзе — узор таленавітай, чыстай і трывожнай літаратуры.Асноўная асаблівасць душы, жыцця гэтай неардынарнай жанчыны — няспынная праца. Яна сама выхоўвае і падымае траіх дзяцей; дачка Вераніка стала яе першай памочніцай і ў працы па вяртанні да чытачоў «Жыцця Адольфа Янушкевіча...», і ў пошуках яго магілы, і ў добраўпарадкаванні старых Панскіх могілак у Дзягільне.
Для Ганны выдадзеная ёю кніга — найперш «духоўны скарб», «кніга пра носьбіта высокага Духу, якім быў Адольф Янушкевіч».
Выразная карціна тагачаснага жыцця паўстае з старонак кнігі, і чытаць яе будзе цікава ўсім, хто цікавіцца гісторыяй, краязнаўствам, літаратурай.
Набыць кнігу, пачуць ад самой перакладчыцы гісторыю яе пошукаў і ўзнаўлення, пакантактаваць з перакладчыцай і задаць пытанні можна будзе на прэзентацыі.
* * *
Жыццё Адольфа Янушкевіча і яго лісты з кіргізскіх стэпаў, І том \ пер. з польск., прадм. і камент. Г. Суднік-Матусэвіч. — Мінск: Медзісонт, 2008. — 208 с., з іл. 100 ас.
Каментары