У фестывалі, што прайшоў на Глыбоччыне, змагаліся 40 карцін з 15 краін.
Дакументальная стужка «Расійскі запаведнік» Краснадарскай кінастудыі атрымала Гран-пры V Міжнароднага каталіцкага фестывалю хрысціянскіх фільмаў і тэлепраграм Magnificat.
Фестываль, у якім удзельнічалі прыблізна 40 карцін з 15 краін, прайшоў у Глыбоцкім раёне Віцебскай вобласці 24—27 чэрвеня.
«Расійскі запаведнік» (аўтар сцэнарыя і рэжысёр — Валерый Цімошчанка) распавядае пра самую бедную вёску ў Расіі, звычайны праваслаўны прыход, які разглядаецца аўтарамі стужкі як ідэальнае экапаселішча, рай на Зямлі.
Беднасць і скарачэнне сельскагаспадарчай вытворчасці ажывілі прыроду.
Ласі, бабры, журавы падышлі ўшчыльную да людзей і да храма, быццам да Ноева каўчэга Старога запавету.Знешняе выражэнне гэтай духоўнай супольнасці — нацыянальны праваслаўны ландшафт, унутры якога можна жыць і дыхаць, лічаць стваральнікі карціны.
У інтэрв`ю БелаПАН прэс-сакратар Беларускай рымска-каталіцкай царквы ксёндз Аляксандр Амяльчэня адзначыў «вельмі высокі і моцны» дух і настрой фестывалю, а таксам узровень прэзентаваных фільмаў, больш за палову якіх былі адзначаны журы. Паводле яго слоў, фестываль стаў сустрэчай людзей, якія думаюць часам па-рознаму, але мэта ў іх адна — абарона агульначалавечых каштоўнасцей і ідэй хрысціянства ў кінематографе. У сваіх работах удзельнікі фестывалю сцвярджаюць, што у жыцці чалавека Бог павінен быць на першым месцы, сказаў Амяльчэня.
Патранат творчай акцыі ажыццяўляе Канферэнцыя каталіцкіх біскупаў у Беларусі, заснавальнікамі з`яўляюцца каталіцкая асацыяцыя для камунікацый «Signis-Беларусь», Віцебская дыяцэзія, рэдакцыя часопіса «Дыялог» і прыватнае унітарнае прадпрыемства «Студыя «Стопкадр» (Мінск).
Пасля завяршэння фестывалю ў розных рэгіёнах краіны адбудзецца традыцыйная акцыя «Рэха фестывалю Magnificat», удзельнікі якой азнаёміцца з усімі конкурснымі работамі.
Усяго за пяць год працы фестывалю на ім былі паказаны больш за 230 фільмаў. У мінулым годзе Гран-пры «Магніфіката» атрымала дакументальная стужка «Ва ўсе дні» (кінастудыя «Беларусьфільм», аўтар сцэнарыя і рэжысёр — Міхаіл Жданоўскі).
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1212
Каментары