«Высакароднае золата». Як аформяць вуліцы і плошчы Мінска да Дня народнага адзінства
Як упрыгожаць сталіцу да 17 верасня, якое ўлады абазначылі як Дзень народнага адзінства, «Мінск-Навінам» распавяла начальніца аддзела дызайну «Мінскрэкламы» Таццяна Бугаркова.
Паводле дызайнеркі, у гэтым годзе ў якасці асноўнага фону графікі было абрана «ўрачыстае і высакароднае золата, якое сімвалізуе рост дабрабыту, росквіт і бяспеку». Акрамя таго, прысутнічаюць афіцыйныя чырвона-зялёныя колеры. У афармленне дададуць абрысы кветак канюшыны, лёну, пшанічныя каласы.
«Дапоўніць цэласнасць карцінкі сілуэт бусла, што ляціць» — сімвала сталасці, высакароднасці, міру і дабра«, тлумачаць задуму дызайнеры.
Да 17 верасня аформяць усе асноўныя лакацыі Мінска.
— Будынак педагагічнага ўніверсітэта імя Максіма Танка традыцыйна ўпрыгожыць 40-метровае пано. Абʼёмныя мастацкія канструкцыі будуць устаноўлены ля стэлы «Мінск — горад-герой», габарытная інсталяцыя ў форме 9-метровага контуру краіны зʼявіцца ля «Мінск-Арэны». На Кастрычніцкай плошчы размесціцца 12-метровая імправізаваная тэматычная стэла, на плошчы Незалежнасці размесціцца светлавая канструкцыя «Салют», — удакладніла суразмоўца. — Маштабнай кампазіцыяй аформім пляцоўку ля будынка Нацыянальнага выставачнага цэнтра «Белэкспа». Калоны гарадской ратушы таксама набудуць урачыстае аблічча. Галоўныя праспекты будуць вітаць мінчан і гасцей сталіцы святочнымі пілонамі, а гарадскія вуліцы ўпрыгожаць тэматычныя банеры, — сказала Бугаркова.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ36
Каментары