Хто той беларус, які загаласіў на мітынгу, што Сяргей і Святлана Ціханоўскія — «ганьба і пагроза нацыянальнай бяспекі Літвы»
Святаслаў Міляйкоўскі даводзіць, што ў 2020-м збіраў подпісы за Віктара Бабарыку і Валерыя Цапкалу. Але невядома, ці варта яму верыць.
Святаславу Міляйкоўскаму 44 гады. Ён мінчук. Па адукацыі — гісторык. Жанаты, мае дваіх дзяцей.
У Беларусі Святаслаў працаваў у бізнэсе. У яго быў статус індывідуальнага прадпрымальніка, а таксама ён быў вядучым спецыялістам аддзела міжнародных продажаў у кампаніі «БІМ Рашэнні». Сферы дзейнасці кампаніі — кансультацыйныя паслугі ў галіне камп'ютарных тэхналогій, раней яшчэ аптовы гандаль.
Да 2020-га Міляйкоўскі не быў палітычна актыўны. Але ў 2020-м паверыў у перамены і стаў каардынатарам ініцыятыўнай групы па зборы подпісаў за Віктара Бабарыку ў Фрунзенскім раёне Мінска. Святаслаў казаў, што ён сабраў амаль 50 тысячаў подпісаў у раёне і больш за 500 — уласнаручна.
Таксама ён быў у штабе Цапкалы. Працаваў там забеспячэнцам, займаўся сімволікай. Але пасля разышоўся са штабам Цапкалы.
Але тут ёсць нюансы. У чатах беларусаў Літвы тады распаўсюджваліся звесткі пра тое, што Міляйкоўскі — не той, за каго сябе выдае. Пісалі, што аніякіх подпісаў ён не здаваў, паводзіў сябе падазрона і яго пазбягалі, лічачы агентам спецслужбаў. Іншыя пісалі, што дэ-факта Міляйкоўскі не быў каардынатарам па Фрунзенскім раёне, што ён хлусіць і просіць грошы. Праверыць гэтыя сведчанні цяпер складана.
Міляйкоўскі расказваў у інтэрв'ю блогеру-канспіролагу Віталю «Вірусу» Кандраценка ўлетку 2021 года, што нібыта сутыкнуўся з ціскам — атрымліваў пагрозы, у ягоную хату спрабавалі ўварвацца, і ён быў змушаны вывезці сям'ю. Сам Міляйкоўскі з'ехаў у Літву 18 жніўня 2020-га пасля таго, як даведаўся пра арышт Юрыя Васкрасенскага.
Спачатку ён жыў у лагеры для бежанцаў на дапамогу розных дабрачынных арганізацыяў. Пасля пазнаёміўся з літоўцам, які прытуліў яго з сям'ёй.
У Літве Міляйкоўскі спачатку працаваў на фізічных працах — на лесапавале і лесапілцы. Цяпер у яго ў сацсетках напісана, што ён займаецца нечым, звязаным з аўтамабілямі. Жыве ў Вільні па жаданні жонкі.
Ён ужо ў 2021 годзе крытыкаваў Святлану Ціханоўскую і Валерыя Цапкалу, але хваліў Віктара Бабарыку. Дзейнасць ОСЦ ён называў правальнай і параўноўваў яе з рэжымам Лукашэнкі.
З таго часу ён заўзята крытыкуе дзейнасць Офіса Святланы Ціханоўскай. На сваіх старонках ён публікуе тэматычныя відэа. Вядома таксама, што Міляйкоўскі перыядычна ходзіць на мітынгі дыяспары ў Літве і на мерапрыемствы ў «Замку» Наталлі Калегавай. Падтрымліваў кантакты і з арганізацыяй «Наш Дом». Быў ён і ў ініцыятыве СХОД.
Сёння Міляйкоўскі прыйшоў на сустрэчу са Святланай і Сяргеем Ціханоўскімі ў Вільні і ўзяў мікрафон. Міляйкоўскі заявіў, што Ціханоўскія — «пагроза нацыянальнай бяспецы Літвы» і пачаў скандаваць ім «ганьба». Пасля гэтага людзі пачалі скандаваць яму «ганьба» ў адказ, а паліцыя вывела Міляйкоўскага з натоўпу і апытала.
Святаслава Міляйкоўскага выводзяць са сцэны. Відэа «Нашай Нівы»
«Наша Нiва» — бастыён беларушчыны
ПАДТРЫМАЦЬ
Каментары