Кампанія-аднарог з беларускімі каранямі заплаціць мільёны даляраў за злоўжыванне асабістымі данымі
Google і Flo Health пагадзіліся выплаціць агулам $56 млн, каб урэгуляваць калектыўны пазоў, паведамляе Devby.io. Іх абвінавачвалі ў зборы адчувальных медыцынскіх даных мільёнаў жанчын і выкарыстанні іх для таргетынгу рэкламы з парушэннем прыватнасці карыстальніц.
Умовы міравога пагаднення былі прадстаўлены 23 верасня вечарам у Федэральным судзе Сан-Францыска. Цяпер яны павінны атрымаць ухваленне суддзі Джэймса Доната.
Згодна з дакументамі, Google выплаціць $48 мільёнаў, а Flo — $8 мільёнаў. Кампанія Flurry, якая больш не існуе, а раней займалася мабільнай аналітыкай, яшчэ ў сакавіку ўрэгулявала прэтэнзіі на $3,5 мільёны.
Чацвёрты адказчык — Meta — ад здзелкі адмовілася і дайшла ў суд, а 4 жніўня пасля двухтыднёвага разбору была прызнаная вінаватай. Кампанія збіраецца падаць апеляцыю, а слуханне па вызначэнні сумы шкоды прызначанае на 30 верасня.
Google пайшла на здзелку за два тыдні да пачатку працэсу, Flo — ужо бліжэй да яго канца. Пры гэтым абедзве кампаніі не прызнаюць сябе вінаватымі.
Карыстальніцы сцвярджалі, што ў перыяд з лістапада 2016 года да лютага 2019 года Flo дзялілася асабістымі звесткамі пра менструацыі і цяжарнасці з іншымі адказчыкамі, хоць абяцала захоўваць усё ў таямніцы. Пазоўнікі спасылаліся на закон Каліфорніі аб недатыкальнасці прыватнага жыцця. Па ім за кожнае парушэнне можа прызначацца штраф у $5 тысяч, што ў тэорыі магло абярнуцца шматмільярднымі выплатамі.
Flo — гэта IT-кампанія, якую стварылі беларусы. Яна дабілася поспеху, распрацаваўшы папулярны дадатак для жаночага здароўя. Галоўны офіс кампаніі цяпер месціцца ў Вільні, штаб-кватэра — у Лондане, прадстаўніцтвы — у Нідэрландах і ЗША. Мінскі офіс цяпер закрыты.
Flo — другая кампанія-аднарог з беларускімі каранямі. Першай у 2021 годзе стала PandaDoc.
Цяпер чытаюць
«Лена 20 рублёў» узялася за старое: знакамітая махлярка зноў разводзіць даверлівых беларусаў3
Каментары