ЗША рыхтуюць новыя санкцыі супраць расійскай нафты, калі Расія адхіліць мірнае пагадненне
ЗША рыхтуюць новы пакет санкцый у дачыненні да энергетычнага сектара Расіі, каб узмацніць ціск, калі Масква адхіліць мірнае пагадненне з Украінай, піша Bloomberg са спасылкай на крыніцы.
Разглядаюцца меры супраць суднаў «ценявога флоту» Расіі і супраць трэйдараў, якія спрыяюць здзяйсненню здзелак. Гэтыя планы міністр фінансаў ЗША Скот Бесэнт абмяркоўваў падчас сустрэчы з групай еўрапейскіх паслоў на пачатку тыдня.
Прадставіць новыя санкцыі ЗША могуць ужо на гэтым тыдні — аднак канчатковае рашэнне застаецца за Дональдам Трампам, адзначаюць крыніцы.
Адначасова пасол Украіны ў ЗША Вольга Сцефанішына паведаміла, што чацвёра амерыканскіх сенатараў (двое рэспубліканцаў і двое дэмакратаў) унеслі ў Сенат двухпартыйны законапраект пад назвай «Decreasing Russian Oil Profits Act of 2025», які прадугледжвае санкцыі за куплю або садзейнічанне імпарту расійскай нафты і нафтапрадуктаў. Паводле яе слоў, у выпадку прыняцця законапраекта ён абавяжа прэзідэнта ЗША на працягу 90 дзён ужыць санкцыі ў дачыненні да тых, хто спрыяе імпарту расійскай нафты. Спіс будзе фармаваць міністр фінансаў пасля кансультацый з дзяржаўным сакратаром.
Прэс-сакратар Крамля Дзмітрый Пяскоў заявіў, што Маскве вядома пра планы распрацоўкі новых санкцый. «Тое, што ў шэрагу кабінетаў у Вашынгтоне такія планы існуюць, — пра гэта добра вядома. Любыя санкцыі шкодзяць справе наладжвання адносін. Гэта відавочна», — сказаў Пяскоў.
Каментары