У ноч на 24 студзеня, на фоне мірных трохбаковых перамоў у Абу-Дабі, Расія нанесла новы масіраваны ўдар па Кіеве і яго энергетычнай інфраструктуры дронамі і рознымі тыпамі ракет. У сталіцы зноў знікаюць цяпло і вада, паведамляе Бі-бі-сі — Украіна.
Атака на Кіеў пачалася каля другой гадзіны ночы і працягвалася больш за тры гадзіны — да 5‑й раніцы. Расіяне атакавалі шахедамі, а затым паралельна нанеслі ўдары балістычнымі і крылатымі ракетамі наземнага базавання.
Пасля 6‑й раніцы атака шахедамі на Украіну працягнулася, і каля 7‑й гадзіны раніцы Кіеў зноў атакавалі дроны. Паводле даных мэра Віталя Клічко, ужо вядома пра аднаго загінулага ў сталіцы і чатырох параненых. Траіх пацярпелых медыкі шпіталізавалі.
На левым беразе, дзе ў апошнія дні рамонтнікі спрабавалі аднавіць ацяпленне пасля расійскіх удараў, зноў узніклі перабоі з цяпло– і водазабеспячэннем.
Электрычнасці ў Кіеве і без таго практычна няма.
Зараз у Кіеве — мінус 10 градусаў марозу.
У Дзяснянскім раёне адбылося падзенне абломкаў на нежылы будынак. У Дняпроўскім раёне ў выніку падзення абломкаў БПЛА ўзнік пажар у гаражным кааператыве. Таксама гарэў бензавоз на паркоўцы. Акрамя таго, выбіты вокны ў шматкватэрным жылым доме.
У Дарніцкім раёне ў прыватнай медыцынскай установе пашкоджаныя вокны ў будынку.
У Галасееўскім і Саламянскім раёнах таксама зафіксаваныя разбурэнні. Журналіст Ян Дабраносаў апублікаваў фота пашкоджанняў кандытарскай фабрыкі Roshen.
З-за пашкоджанняў метро цягнікі зялёнай лініі часова не курсуюць паміж правым і левым берагамі.
Адначасова адбыўся ўдар шахедаў па Харкаве, дзе параненыя 14 чалавек.
Былы міністр культуры Руслан Чарнецкі знайшоў сабе падпрацоўку9
Каментары