15 lipienia ŭ Połacku kala ścienaŭ hreka‑katalickaha chrama śv. Paraskievy Połackaj zaviaršyłasia CHIII pilihrymka biełaruskich hreka‑katalikoŭ, jakaja za 4 dni prajšła šlach ź Viciebska — miesca mučanickaj śmierci sv. biskupa Jazafata — u Połacak.
U staražytny Połack pilihrymy prybyli napiaredadni, u subotu. Uviečary ŭ chramie adbyłasia Viačernia (Niešpary) z udziełam pilihrymaŭ. Na nastupny dzień paśla ranišniaj Jutrani raspačałasia Boskaja Liturhija, celebracyju jakoj uznačaliŭ Apostalski vizitatar dla hreka‑katalikoŭ u Biełarusi ks. archimandryt Siarhiej Hajek MIS u sasłužeńni dvuch protapreźbiteraŭ (dekanaŭ): a. Andreja Abłamiejki ź Minska (Centralna‑Zachodni protapreźbiterat) i ijeramanacha Lavoncija z Połacka (Uschodni protapreźbiterat), a takasama śviataroŭ dvuch abradaŭ ź Biełarusi i z zamiežža. Siarod hanarovych haściej byŭ ihumien manachaŭ studytaŭ sa Śviata‑Uśpienskaj Unieŭskaj Łaŭry (Ukraina).
Pakolki ŭsie prysutnyja nie zmahli źmiaścicca ŭ nievialičkaj carkvie, Liturhija adbyvałasia na dvary, pad praliŭnym daždžom. Niahledziačy na niepahadź, pilihrymy i inšyja ŭdzielniki adčuvali dabradatnaje dziejańnie Božaj łaski i duchoŭna jadnalisia z sabranymi ŭ Hudahai na karanacyi cudatvornaha abraza Maci Božaj Škaplernaj bratami Łacinskaha, abo Rymskaha, abradu.
Hetuju duchoŭnuju jednaść asabliva padkreśliŭ u svaim pasłańni, skiravanym da ŭdzielnikaŭ CHIII pilihrymki biełaruskich hreka‑katalikoŭ, Apostalski Nuncyj u Biełarusi arcybiskup Marcin Vidavič. Pasłańnie było začytana adnačasova pierad Boskaj Liturhijaj u Połacku i naprykancy karanacyjnaj śviatoj Imšy ŭ Hudahai.
U hamilii padčas Boskaj Liturhii Apostalski vizitatar pryvitaŭ usich udzielnikaŭ uračystaści i vykazaŭ asablivuju padziaku Bratam pravasłaŭnym i pratestantam za ich malitoŭnuju salidarnaść. Słovy pašany i ščyryja pryvitańni skiravaŭ archimandryt i da vysokich pradstaŭnikoŭ dziaržaŭnych, abłasnych i haradskich uładaŭ. Miž inšym, jon skazaŭ:
«Siońnia Hospad źbiraje nas razam u staražytnym biełaruskim horadzie Połacku. Tak ščaśliva atrymlivajecca, što ŭ hetyja dni spaŭniajecca 490 hadoŭ z momantu, kali vialiki biełaruski pieršadrukar Francišak Skaryna, rodam z Połacka, pačaŭ vydavać u Prazie Bibliju ŭ pierakładzie na starabiełaruskuju movu. Hetyja ŭhodki — vielmi dobraja nahoda dla taho, kab zakaranić u sercach usich nas luboŭ da Božaha słova. Na hetym śviatočnym schodzie tut, u Połacku, my chočam siońnia z asablivaj uvahaj zhadać słovy Franciška Skaryny, jakija jon źmiaściŭ u Pradmovie da svajho vydańnia Biblii: «Šanujma, jak naležyć, śviatoje Jevanhielle, a šanujučy, naśledujma spravy našaha Zbaŭcy Isusa Chrysta! I hetak, ź Jaho dapamohaju, uvojdziem u žyćcio viečnaje« (F. Skaryna, Pradmova da Biblii).
490 hadoŭ tamu Hospad Čałaviekalubiec daŭ nam Bibliju ŭ pierakładzie na našu rodnuju movu. Užo sapraŭdy para, kab my sami, našy blizkija i siabry chacieli čytać Słova Božaje na našaj rodnaj biełaruskaj movie. Heta taksama šyrokaje pole da sumiesnaj dziejnaści ŭsich chryścijanskich Cerkvaŭ u Biełarusi. Molimsia ščyra, kab Boh, jaki jość luboŭ, uliŭ u našyja sercy i ŭ sercy našych suajčyńnikaŭ luboŭ da rodnaj biełaruskaj movy i rodnaj duchoŭnaj kultury».
Celebracyju nabaženstvaŭ u Połacku azdobili i nadali joj asabliva ŭračysty charaktar pryhožyja śpievy ŭ vykanańni minskaha mižparafijalnaha hreka‑katalickaha choru pad kiraŭnictvam studentki Biełaruskaj dziaržaŭnaj akademii muzyki Maryi Januškievič. Jana zusim niadaŭna zajmajecca z hetym maładym — i pa časie isnavańnia, i pa ŭzroście ŭdzielnikaŭ — choram (jaki navat pakul nie maje nazvy), ale śpievaki‑entuzijasty ŭžo dasiahnuli zaŭvažnych pośpiechaŭ.
Paśla całavańnia śviatoha kryža naprykancy liturhii nieba nad Połackam prajaśnieła i ź jaho hlanuła ciopłaje letniaje sonca, što chutka vysušyła ziamlu i zmokłych udzielnikaŭ śviata.
Kamientary