Śledstva pa spravie ab źbićci naviednika HC «Karona» praciahnuta

Śledstva pa spravie ab pryčynieńni achoŭnikam handlovaha centra «Karona» naviedvalniku cialesnych paškodžańniaŭ praciahnuta da 27 vieraśnia. Pra heta BiełaPAN paviedamili va ŭpraŭleńni Śledčaha kamiteta pa Minsku.

Nahadajem, infarmacyja pra źbivańnie minčanina Alaksandra Vaškieviča 9 maja ŭ staličnym handlovym centry «Karona» 23 maja źjaviłasia na sajcie pryvatnaj kulturna-aśvietnickaj ustanovy «Płatform inaviejšn».

Pavodle źviestak arhanizacyi, poźnim viečaram 9 maja Vaškievič ź siabram Dzianisam Łokcievym rabili ŭ «Karonie» pakupki. Łokcieŭ pryciahnuŭ uvahu achoŭnikaŭ, kali ŭziaŭ niekalki arechaŭ z adkrytaj jomistaści. Z achoŭnikami centra maładyja ludzi sustrelisia na vychadzie z handlovaj zały kala kasy. Jak adznačajecca, da Vaškieviča pretenzij u supracoŭnikaŭ achovy nie ŭźnikła, a Łokcieva jany paprasili prajści ź imi.

Vaškievič pasprabavaŭ prajści za achoŭnikami i svaim siabram, adnak jamu ŭ hrubaj formie paraili pajści. Maładoha čałavieka nie spynili ahresiŭnyja pavodziny adnaho z achoŭnikaŭ, jaki, pavodle jaho słoŭ, byŭ hatovy raspačać bojku.

Nieŭzabavie Vaškievič za śpinoj pačuŭ kryk: «Kruci jaho», paśla čaho jaho niekalki razoŭ udaryli ŭ žyvot i za ruki zaviali ŭ kabiniet u słužbovym pamiaškańni, u jakim znachodziŭsia jašče adzin nieviadomy ŭ spartyŭnym kaściumie. Na maładoha čałavieka nadzieli naručniki, paśla hetaha nieviadomy mocna ŭdaryŭ jaho nahoj u hałavu, da źbivańnia dałučylisia jašče piać-siem čałaviek, častka jakich byli ŭ formiennym adzieńni achovy «Karony».

Łokcieŭ tym časam znachodziŭsia kala kabinieta razam z dvuma achoŭnikami i praz pryadčynienyja dźviery bačyŭ siabra, jaki, skryvaŭleny, siadzieŭ na padłozie.

Niahledziačy na nieadnarazovyja prośby, miedycynskuju dapamohu Vaškieviču achova nie vyklikała. Heta zrabiŭ Łokcieŭ, jaki, skarystaŭšysia vypadkam, patelefanavaŭ u słužbu 103. Paśla hetaha achoŭniki nadzieli naručniki i na jaho.

U handlovy centr chutkaja dapamoha prybyła razam z vyklikanaj achoŭnikami milicyjaj. Maładoha čałavieka dastavili ŭ Frunzienskaje RUUS, adnak, bačačy jaho stan, supracoŭniki pravaachoŭnych orhanaŭ admovilisia jaho prymać, paśla čaho Vaškieviča ŭ naručnikach advieźli ŭ balnicu.

Miedyki dyjahnastavali ŭ Vaškieviča pierałom skułavoj kości, strasieńnie mozhu, pierałom aścistaha adrostka šostaha pazvanka šyjnaha adździeła pazvanočnika, rany na tvary.

Pa fakcie pryčynieńnia cialesnych paškodžańniaŭ Vaškieviču Frunzienskim rajonnym adździełam Śledčaha kamiteta Minska raspačata kryminalnaja sprava na padstavie častki 1 artykuła 149 KK (naŭmysnaje pryčynieńnie mienš ciažkaha cialesnaha paškodžańnia).

• 0
• 0
• 0
• 0
• 0
• 0
• 0
• 0