Sud admoviŭ Łohvinavu ŭ jahonaj sprobie viarnuć vydavieckuju licenziju
Dziasiatki piśmieńnikaŭ pryjšli padtrymać Łohvinava ŭ sud ź Ministerstvam infarmacyi.
U Vyšejšym haspadarčym sudzie adbyŭsia razhlad spravy pa pazovie vydaviectva «Łohvinaŭ» da Ministerstva infarmacyi. Mininfa zabrała ŭ vydaŭca licenziju. Ihar Łohvinaŭ abskardžvaŭ hetaje rašeńnie.
Žurnalistaŭ z fota- i videakamierami u zału pasiedžańniaŭ suda nie puściła achova pad kamandavańniem nieviadomaha mužčyny ŭ civilnym, jaki admoviŭsia nazvać siabie i svaju pasadu.
Padtrymać Ihara Łohvinava pryjšli vydatnyja dziejačy hramadstva i kultury Uładzimier Arłoŭ, Alhierd Bacharevič, Ihar Babkoŭ, Volha Šparaha, Pavał Kaściukievič.
«Sprava, jakaja razhladajecca siońnia, nie rucinnaja i nie šarahovaja, -- skazaŭ u sudzie piśmieńnik Uładzimir Arłoŭ. -- Havorka idzie pra los aŭtarytetnaha vydaviectva. Jano pracuje čatyrnaccaty hod. Za hety čas vyjšła kala 700 knih. Vydaviectva źjaŭlajecca adnym ź lidaraŭ pa vydańni mastackaj litaratury pa biełaruskaj movie. Vysoki sud, -- źviarnuŭsia jon da sudździ, -- vašaje rašeńnie, jakoje dazvoliła b praciahvać vydaviectvu svaju pracu, było b adnačasova i rašeńniem u padtrymku našaj biełaruskaj kultury».
Spravu razhladała sudździa Taćciana Prataščyk.
Intaresy Ministerstva infarmacyi ŭ sudzie baranili dźvie śpiecyjalistki ź jurydyčnaj słužby.
Sudździa admoviła vydaŭcu ŭ jahonym pazovie.
Kamientary